မိူဝ်ႈၼႆႉ ဝၼ်းတီႈ 03/07/2025 သိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႃႈ ၶိူင်ႈမိၼ်တိုၵ်း ၵိုင်ႉၵၢင်ႉၶၢတ်ႇၵၢၼ် ၵပ်းသိုပ်ႇၵႂႃႇမိူဝ်ႈပူၼ်ႉမႃး ဝၼ်းတီႈ 1 ယၢမ်းၵၢင်ၶမ်ႈ ႁၢႆလၢႆၵႂႃႇၾၢႆႇၸဵင်ႇ ၸၢၼ်းဝၼ်းဢွၵ်ႇ ဝဵင်းၼေႇပျီႇတေႃႇ ဝႃႈၼႆ။

ၶိူင်ႈမိၼ်တိုၵ်းသိုၵ်းမၢၼ်ႈ ဢၼ်ႁၢႆလၢႆ ၶၢတ်ႇၵၢၼ်ၵပ်းသိုပ်ႇၵႂႃႇၼၼ်ႉ ပဵၼ်သႅၼ်းလႂ်ၼႆတႄႉ ဢမ်ႇပိုၼ် ၽၢဝ်ႇဝႆႉပႃး။ ယၢမ်းလဵဝ် ၽူႈမီးပုၼ်ႈၽွၼ်းၶဝ် ၶတ်းၸႂ်ၸွမ်းသွၵ်ႈႁႃ ၶိူင်ႈမိၼ်လမ်းၼၼ်ႉ ႁိမ်းႁွမ်းတူင်ႇ တၢင်ႇၸိူဝ်းဢၼ်ႁၢႆလၢႆၵႂႃႇၼၼ်ႉယူႇ ဝႃႈၼႆ။

ထိုင်မႃးယၢမ်းဝၢႆးဝၼ်းၼႆႉ ၸုမ်းသိုၵ်းၸၢဝ်းၶိူဝ်း မိူင်းယၢင်းလႅင် ၵႂႃႇထူပ်းႁၼ်ၶိူင်ႈမိၼ်တိုၵ်းသိုၵ်းမၢၼ်ႈ တူၵ်းဝႆႉႁိမ်းၾင်ႇၼမ်ႉၶူင်း ႁိမ်းဝဵင်းၽႃသွင်ႇ ၸႄႈမိူင်းယၢင်းလႅင် ဝႃႈၼႆ။  

လႆႈႁူႉဝႃႈ သိုၵ်းမၢၼ်ႈၼႆႉ ၸႂ်ႉၶိူင်ႈမိၼ်တိုၵ်း ဢၼ်မိူင်းရတ်ႉသျႃးႁဵတ်းဢွၵ်ႇ SU-30 ပဵၼ်ၶိူင်ႈမိၼ်တိုၵ်း သႅၼ်းဢၼ်ပူၼ်ႉဢႃယုယဝ်ႉ ၵမ်ႈၼမ်။ ယၢမ်းလဵဝ် ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ်သႅၼ်းၼႆႉသေ ၸႂ်ႉတိုဝ်းၼႂ်းပၢင်တိုၵ်း ပွႆႇမၢၵ်ႇသႂ်ႇ ၼႂ်းပိုၼ်ႉတီႈသိုၵ်းၸၢဝ်းၶိူဝ်း ၵုမ်းၵမ်။

ၼႂ်းပီ 2025 ၼႆႉ ၶိူင်ႈမိၼ်တိုၵ်းလႄႈ ၶိူင်ႈမိၼ်မႅင်းမီႈ သိုၵ်းမၢၼ်ႈတူၵ်းၵွႆ ဢမ်ႇယွမ်း 3 ပွၵ်ႈယဝ်ႉ။ မိူဝ်ႈဝၼ်းတီႈ 10/06/2025 ၼၼ်ႉၵေႃႈ ၶိူင်ႈမိၼ်သႅၼ်း F-7 တူၵ်းၵွႆဢွၼ်တၢင်းသုတ်း ၼႂ်းဝဵင်းပလႄး ဝၢၼ်ႈၵၢၼ်ႇတွင်ႉ။  

ဝၢႆးလင် သိုၵ်းမၢၼ်ႈ ယိုတ်းမိူင်းမႃးၼႆႉ ၶိူင်ႈမိၼ်တိုၵ်းလႄႈ ၶိူင်ႈမိၼ်မႅင်းမီႈ သိုၵ်းမၢၼ်ႈ တူၵ်းၵွႆၵႂႃႇ ၸွမ်းပၢင်တိုၵ်းၼႂ်းမိူင်း ဢမ်ႇယွမ်း 12 လမ်းယဝ်ႉ သိုၵ်းၶၢင် KIA ယိုဝ်းတူၵ်းၼမ်လိူဝ်ပိူၼ်ႈသုတ်း ၼႂ်းပိုၼ်းသိုၵ်းၸုမ်းၸၢဝ်းၶိူဝ်း ၼႆယဝ်ႉ။

တႅမ်ႈ – ၽူၺ်းၼုမ်ႇ