မိူဝ်ႈဝၼ်းတီႈ 01/07/2025 ၼႆႉ ပဵၼ်လွင်ႈတႅၵ်ႇၽူင်ႉသေ ၾႆးမႆႈတီႈႁူင်းၵၢၼ်ႁဵတ်းယႃႈယႃ ၼႂ်းၸႄႈတွၼ်ႈတီႇလၢၼ်ႇၵႃႇၼႃႇ မိူင်းဢိၼ်ႊတီႊယိူဝ်ႊပွတ်းၸၢၼ်း မီးၵူၼ်းလူႉတၢႆ 34 ၵေႃႉ ဝႃႈၼႆ။

လွင်ႈၼႆႉ ပဵၼ်ၵႂႃႇတီႈႁူင်းၵၢၼ် Sigachi Industries၊ ၽွင်းယၢမ်းၵူၼ်းႁဵတ်းၵၢၼ်ၶဝ် တိုၵ်ႉႁဵတ်းၵၢၼ်ယူႇၼၼ်ႉ ပဵၼ်လွင်ႈတႅၵ်ႇၽူင်ႉလႄႈ မီးၵူၼ်းလူႉတၢႆမၢတ်ႇၸဵပ်းတင်းၼမ်၊ မၢင်ၸိူဝ်း လႆႈမႆႈၸႂ် သၢႆၸႂ်ဝႆႉ။ ဢွင်ႈတီႈပဵၼ်ၽေးၵိုင်ႉၵၢင်ႉၼၼ်ႉ လႆႈဝႆႉၶၢပ်ႈတူဝ်ၵူၼ်း 31 ၵေႃႉ၊ ဢၼ်ၵႂႃႇလူႉတၢႆ တီႈႁူင်းယႃသမ်ႉမီး 3 ၵေႃႉ ၼႆယဝ်ႉ။

ၸဝ်ႈၼႃႈတီႈ ပလိၵ်ႈၶဝ် လၢတ်ႈဝႃႈ – မိူဝ်ႈၽွင်းပဵၼ်လွင်ႈတႅၵ်ႇၽူင်ႉၼၼ်ႉ ၼႂ်းႁူင်းၵၢၼ် မီးၵူၼ်းႁဵတ်းၵၢၼ်ဝႆႉ တင်းမူတ်း 60 ၵေႃႉ။ ၵူၼ်းႁဵတ်းၵၢၼ်ၵမ်ႈၼမ် ပဵၼ်ႁႅင်းၵၢၼ် ၸိူဝ်းလုၵ်ႉၼႂ်းမိူင်းဢိၼ်ႊတီႊယိူဝ်ႊ ပွတ်းဢွၵ်ႇလႄႈ တၢင်းပွတ်းႁွင်ႇ မႃးႁဵတ်းၵၢၼ် ဝႃႈၼႆ။

ယၢမ်းလဵဝ် ၶိူင်ႈၶူဝ်းၼႂ်းႁူင်းၵၢၼ်တင်း ဢွင်ႈတီႈယူႇသဝ်း လူႉၵွႆၵႂႃႇလႄႈ လႆႈပိၵ်ႉဢိုတ်းႁူင်းၵၢၼ်ဝႆႉ တႃႇ 3 လိူၼ်။ ယူႇတီႈ ၸုမ်းပလိၵ်ႈၶဝ် လႆႈပိုတ်ႇလိူင်ႈၸွႆးတြႃးၶွမ်ႊပၼီႊၼႆႉဝႆႉသေ သိုပ်ႇၵူတ်ႇထတ်းၸႅတ်ႈထၢမ်ဝႆႉ။

ၵဵဝ်ႇလူၺ်ႈလွင်ႈၼႆႉ ၸွမ်ၽွင်းလူင် မိူင်းဢိၼ်ႊတီႊယိူဝ်ႊ ပိုၼ်ၽၢဝ်ႇလၢတ်ႈဝႃႈ တေပၼ်ငိုၼ်းသၢႆႈတႅၼ်း တႃႇမုင်ႉႁေႃႁိူၼ်း ၵူၼ်းၸိူဝ်းလူႉတၢႆ 1 ၵေႃႉလႂ် 2 သႅၼ်ရူႊပီႊ၊ ၵူၼ်းၸိူဝ်း မၢတ်ႇၸဵပ်းသမ်ႉ 1 ၵေႃႉလႂ် 5 မိုၼ်ႇရူႊပီႊ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။