ၵူၼ်းဢၼ်ပႃးသဵၼ်ႈသၢႆမၢႆ တႃႇၶဝ်ႈႁၢပ်ႇၵၢၼ်သိုၵ်းၼၼ်ႉသင်ၸိူဝ်ႉဝႃႈ ဢမ်ႇၶႂ်ႈၶဝ်ႈႁၢပ်ႇၵၢၼ်သိုၵ်းၼႆၸိုင် လႆႈၵႂႃႇငူပ်ႉငီႉၵၼ်တၢင်းၵၢင်ႉၵႄႇ ၼႂ်းပွၵ်ႉသေ လႆႈပၼ်ငိုၼ်းတီႈၵၢင်ႉၵႄႇ ၼပ်ႉႁူဝ်သိပ်းသႅၼ်ပျႃး တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ ။
တႄႇၼႂ်းႁူဝ်လိူၼ်ၵျူႊလၢႆႊ ၼႆႉမႃးၵၢင်ႉၵႄႇ သူင်ႇလိၵ်ႈၸူးၵူၼ်းမိူင်း ၼႂ်းဝဵင်းတူၼ်ႈတီးလၢႆလၢႆပွၵ်ႉ လွင်ႈၵဵပ်းၵူၼ်းတႃႇႁၢပ်ႇၵၢၼ်သိုၵ်း ၸုပ်ႈ 15 ၊ၵၢင်ႉၵႄႇလၢတ်ႈဝႃႈ ပေႃးဢမ်ႇၶႂ်ႈၶဝ်ႈႁၢပ်ႇၵၢၼ်သိုၵ်း ၼႆၸိုင် တႃႇတေၸၢင်ႈၵူၼ်းၵႂႃႇတႅၼ်းၼၼ်ႉ တေလႆႈပၼ်ငိုၼ်းတီႈၵၢင်ႉၵႄႇ ၼပ်ႉႁူဝ်သိပ်းသႅၼ်ပျႃး ဝႃႈၼႆ ။
ၼႂ်းၼၼ်ႉ ၼႂ်းပွၵ်ႉၺွင်ႇၽိဝ်ႇသၶၢၼ်း ၽူႈပႃးၼႂ်းသဵၼ်ႈၸိုဝ်ႈ သေဢမ်ႇၶႂ်ႈၵႂႃႇၼၼ်ႉ လႆႈပၼ်ငိုၼ်း ၼိုင်ႈၵေႃႉလႂ် 85 သႅၼ်ပျႃး လႄႈ ပွၵ်ႉၼမ်ႉၵတ်း (ယေႇဢေးၵုၼ်း)သမ်ႉ လႆႈပၼ်ၼိုင်ႈၵေႃႉ 75 သႅၼ်ပျႃး ဝႃႈၼႆ ။
ၵူၼ်းၸၢႆးပိုၼ်ႉတီႈဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ – “တႆးၵေႃႉၶႃႈပႃးၼႂ်းတႃႇႁၢပ်ႇၵၢၼ်သိုၵ်း ၵႂႃႇငူပ်ႉငီႉၵၼ်တင်း ၵၢင်ႉၵႄႇယဝ်ႉ လႆႈပၼ်ငိုၼ်း 80 သႅၼ်ပျႃး ၊ ပေႃႈမႄႈၶဝ်ၵေႃႈ ဢမ်ႇၸၢင်ႈႁဵတ်းၸိူင်ႉႁိုဝ် ၊ ငိုၼ်းဢၼ်ႁႃမႃးလႆႈၸိူဝ်းၼၼ်ႉၵေႃႈ လႆႈပၼ်တႃႇၸၢင်ႈၵူၼ်းႁၢပ်ႇၵၢၼ်သိုၵ်း ပဵၼ်ဢၼ်ယၢပ်ႇၸႂ်ၼႃႇ ၊ ငိုၼ်းၸွႆႈၵူၼ်းၵႂႃႇႁၢပ်ႇၵၢၼ်သိုၵ်းၼႆႉၵေႃႈ လႆႈပၼ်ၵူႈလိူၼ် ”- ဝႃႈၼႆ ။
တီႈဝဵင်းတူၼ်ႈတီးၼႆႉ ၵူၼ်းဢၼ်ဢမ်ႇပႃးသဵၼ်ႈၸိုဝ်ႈ တႃႇႁၢပ်ႇၵၢၼ်သိုၵ်းၼၼ်ႉၵေႃႈ လႆႈပၼ်ငိုၼ်း တႃႇၵမ်ႉၸွႆႈ ၵူၼ်းၵႂႃႇႁၢပ်ႇၵၢၼ်သိုၵ်း ။ ပွၵ်ႉၼိုင်ႈလႄႈပွၵ်ႉၼိုင်ႈ လႆႈပၼ်ဢမ်ႇမိူၼ်ၵၼ်။ မၢင်ပွၵ်ႉ လႆႈ ပၼ် 5 မိုၼ်ႇပျႃး ၊ မၢင်ပွၵ်ႉ လႆႈပၼ် 7 မိုၼ်ႇပျႃး ။ ပွၵ်ႉဢၼ် လႆႈသႂ်ႇငိုၼ်းၼမ်သုတ်း ပဵၼ်ပွၵ်ႉ လၢၼ်းမတေႃႇ ၊ သူၺ်ႇတွင်ႇ (ရွှေတောင်) ၊ မဵဝ်ႉမ( မြို့မ ) ၊ ၵၢၼ်ႇဢွၵ်ႉ ( ကန်အောက် ) ၊ ပျီႇတေႃႇသႃႇ ( ပြည်တော်သာ) ၊ ပွၵ်ႉပႃႇမႆႉ ( သစ်တော ) ၊ ပွၵ်ႉၼမ်ႉၵတ်း ( ရေအေးကွင်း ) ၸိူဝ်းၼႆႉ ၊ ၸိူဝ်းၶဝ်လႆႈပၼ်ငိုၼ်းမႃးၼႆႉ မီးမွၵ်ႈ 2 ပီယဝ်ႉ ဝႃႈၼႆ ။
မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 20/6/2025 ယၢမ်းၵၢင်ၶမ်ႈ 11 မူင်း ၵၢင်ႉၵႄႇလႄႈသိုၵ်းမၢၼ်ႈ ဝႃႈတေၶဝ်ႈၵူတ်ႇထတ်း သဵၼ်ႈမၢႆၶႅၵ်ႇ တီႈၼႂ်းပွၵ်ႉၸဝ်ႈၸၢမ်ႇထုၼ်းၼႆသေ တီႉၺွပ်းၵႂႃႇ ၵူၼ်းၸၢႆးသႅၼ်းပၢၼ်ၼုမ်ႇ 10 ၵေႃႉ ဝႃႈၼႆ ။
ၵူၼ်းၸမ်ၸႂ်ထုၵ်ႇတီႉၺွပ်းၵႂႃႇလၢတ်ႈၽူႈတွႆႇႁွၵ်ႈဝႃႈ -“ဝၢႆးထုၵ်ႇၺွပ်းၵႂႃႇၼၼ်ႉယဝ်ႉ ဢမ်ႇလႆႈတၢင်းၵပ်းသိုပ်ႇသင် ၊ ၽိူဝ်ႇလႆႈၵေႃႈလၢတ်ႈဝႃႈ မီးႁူဝ်ပူင်းၼႆဢေႃႈ ၊ တေလႆႈၵႂႃႇၸႅတ်ႈပၢႆးယူႇလီတီႈ ဢွင်ႇပၢၼ်းၼႆႉ ၊ တေလႆႈၶဝ်ႈႁၢပ်ႇၵၢၼ်သိုၵ်းၼႆၶႃႈဝႃႇ ၊ တလဵဝ် ဢမ်ႇလႆႈတင်းၵပ်းသိုပ်ႇမီး 10 ဝၼ်းပၢႆ ယဝ်ႉဢမ်ႇၸၢင်ႈၵႂႃႇလၢတ်ႈတီႈလႂ် ”- ဝႃႈၼႆ ။
မိူၼ်ၼႆၼင်ႇၵဝ်ႇ တၢင်း ဝၢၼ်ႈလွႆဢွၼ်ႇ (လွယ်အွန်း) ၊ လူင်းတႃႈ (လုံးတာ) ၊ တႃႇယႃႇၵုင်း (သာယာကုန်း) ၼႂ်းၸႄႈဝဵင်း ႁူဝ်ပူင်းၵေႃႈ ၵၢင်ႉၵႄႇၵဵပ်းငိုၼ်း ၵူၼ်းဢၼ်ၸိူဝ်းဢမ်ႇၶႂ်ႈၶဝ်ႈ ႁၢပ်ႇထၢမ်းၵၢၼ်သိုၵ်း ၼိုင်ႈၵေႃႉလႂ် 80 သႅၼ်ပျႃး ဝႃႈၼႆ ။
“ပေႃးပႃးသဵၼ်ႈမၢႆႁၢပ်ႇၵၢၼ်သိုၵ်းဢမ်ႇၶႂ်ႈၶဝ်ႈႁၢပ်ႇၵၢၼ်သိုၵ်းၼႆႉ လႆႈပၼ် ၼိုင်ႈၵေႃႉ 80 သႅၼ်ပျႃး ၊တႃႇႁၢပ်ႇၵၢၼ်သိုၵ်းၼႆႉ တၢင်တူဝ်ဝၢၼ်ႈလႆႈၵႂႃႇ 2 ၵေႃႉ ၊ ၵူၼ်းၼႂ်းဝၢၼ်ႈဢၼ်ဢမ်ႇပႃး တႃႇႁၢပ်ႇ ၵၢၼ်သိုၵ်းၵေႃႈ ႁူမ်ႈၵၼ် လႆႈပၼ်ငိုၼ်းၵမ်ႉၸွႆႈၶဝ် 100 သႅၼ်ပျႃး ၊ တႃႇPNO ၼႆႉတေႃႇပီ ၼိုင်ႈႁိူၼ်းၼႆႉလႆႈပၼ် 5 သႅၼ် ၊ လႆႈပၼ်ၸိူင်ႉၼႆၼႆႉ မီးၸမ် 2 ပီယဝ်ႉ”- ဝႃႈၼႆ ။
ၽွင်းသိုၵ်းမၢၼ်ႈၵဵပ်းၵူၼ်းမိူင်းတႃႇၾိုၵ်းၵၢၼ်သိုၵ်းၼႆႉ ၶႂ်ႈႁႂ်ႈၵူၼ်းပိုၼ်ႉတီႈၾၢင်ႉၵၼ်ၵႂႃႇမႃး ယၢမ်းၵၢင်ၶမ်ႈၵၢင်ၶိုၼ်း ၊ ပေႃးထုၵ်ႇတီႉၺွပ်းၵႂႃႇယဝ်ႉ တိုၼ်းဢမ်ႇၸၢင်ႈၸွႆႈဢဝ်တူဝ်မႃးၶိုၼ်းလႆႈ ထုၵ်ႇသူင်ၾိုၵ်းၵၢၼ်သိုၵ်းၵမ်းလဵဝ် – ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ