ဝၼ်းတီႈ 30/06/2025 ၼႆႉ ၸုမ်းပလိၵ်ႈၵူႈမိူင်းမိူင်း INTERPOL ပိုၼ်ၽၢဝ်ႇဢွၵ်ႇၵႂႃႇဝႃႈ ၵူၼ်းၸိူဝ်းၺႃးၶၢႆတူဝ် ၵႂႃႇႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ ၽႄႈၼမ်တိူဝ်းမႃးႁႅင်း ၼႂ်းလုမ်ႈၾႃႉသေ ၵၢၼ်ပေႉၵိၼ်လူလၢႆ ပေႃႉႁႅမ်ၼိၵ်ႈၸၢၵ်ႈတေႃႇၵၼ်ၸိူဝ်းၼႆႉ ၵိူတ်ႇပဵၼ်မႃး ၼႂ်းၵုၼ်ၶဵဝ်ဢေးသျႃး ၸဵင်ႇၸၢၼ်းဝၼ်းဢွၵ်ႇ ၸႂ်ႉတိုဝ်းပႃးလွၵ်းလၢႆး AI သေ လွၵ်ႇလႅၼ်တေႃႇၵၼ်မႃး။

ၼႂ်းၽိုၼ်ႁၢႆးငၢၼ်းၼၼ်ႉ ပိုၼ်ၽၢဝ်ႇဝႆႉဝႃႈ ၵူၼ်းၸိူဝ်းထုၵ်ႇဢဝ်ၵႂႃႇၶၢႆတူဝ်ပၼ် ၸုမ်းလွၵ်ႇလႅၼ်ၵိၼ် ငိုၼ်းၼိူဝ်ဢွၼ်ႊလၢႆႊၼႆႉ ၸွတ်ႇၽႄႈလုမ်ႈၾႃႉသေ ပဵၼ်ၵူၼ်းမိူင်းၼႂ်း 66 ၸိုင်ႈမိူင်း ၼပ်ႉႁူဝ်သႅၼ်လၢၼ်ႉမၼ်းယဝ်ႉလႄႈ ၸၢင်ႈၵိူတ်ႇပဵၼ်ပၼ်ႁႃယႂ်ႇလူင် ဢၼ်ၼိုင်ႈယူႇ ၼႆယဝ်ႉ။

ယၢမ်းလဵဝ် ၸုမ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၼႆႉ ၵမ်ႈၼမ်လႆႈႁၼ်မီးၼႂ်း သုၼ်ၵၢင် ဢမေႊရိၵၼ်ႊလႄႈ ပွတ်းတူၵ်း၊ ပွတ်းၵၢင်ဢႃႇၾရိၵ ၸိူဝ်းၼႆႉ။ ၵူၼ်းၸိူဝ်းၺႃးလွၵ်ႇလႅၼ်ၵႂႃႇၶၢႆတူဝ်ၼၼ်ႉ ၵမ်ႈၼမ် ဢဝ်လွင်ႈၵၢၼ်ငၢၼ်းမႂ်ႇသေ ၺႃးႁူၺ်းႁွင်ႉၵႂႃႇ ၶင်ဝႆႉဢွင်ႈတီႈႁဵတ်းၵၢၼ်ၵျႃးၽႅၼ်ႉ ဝႃႈၼႆ။

ၵူၼ်းၸိူဝ်းၺႃးလွၵ်ႇလႅၼ်ၵႂႃႇၶၢႆၼၼ်ႉ ထုၵ်ႇၵုမ်းၶင်တူဝ်ဝႆႉသေ ၺႃးလွၵ်ႇငိုတ်ႈဝႃႈ မီးၼီႈငိုၼ်းတွင်းဝႆႉ ၼမ်ၼႆသေ ၵမ်ႈၽွင်ႈၺႃးပေႃႉထုပ်ႉႁႅမ်၊ သင်ပဵၼ်ၼၢင်းယိင်းၸိုင် ၺႃး ၵၼ်ႉၸၼ်လူလၢႆ ၸိူဝ်းၼႆႉ။  

လႆႈႁူႉဝႃႈ ၵူၼ်းၸိူဝ်းၺႃးၶၢႆတူဝ် ပၼ်ၸုမ်းလွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၼႆႉ မိူဝ်ႈဢွၼ်တၢင်း ၵမ်ႈၼမ် လၢတ်ႈၵႂၢမ်းၶႄႇသေ ပဵၼ်ၵူၼ်းမိူင်းၶႄႇ၊ မိူင်းမလေးသျႃး၊ မိူင်းထႆးလႄႈ မိူင်းသိင်ႊၵပူဝ်ႊၸိူဝ်းၼႆႉသေတႃႉ ယၢမ်းလဵဝ် ၵူၼ်းမိူင်းဢမေႊရိၵၼ်ႊ ပွတ်းၸၢၼ်း၊ မိူင်းဢႃႇၾရိၵ ပွတ်းဢွၵ်ႇလႄႈ မိူင်းယူႊရူပ်ႊ ပွတ်းတူၵ်း ၸိူဝ်းၼႆႉၵေႃႈ ၺႃးလွၵ်ႇလႅၼ်ၵႂႃႇမိူၼ်ၵၼ် ၼႆယဝ်ႉ။

ၽူႈယႂ်ႇၵူၼ်းလူင်ၸူဝ်ႈၶၢဝ်း ၼႂ်းႁွင်ႈၵၢၼ်ပလိၵ်ႈၵူႈၸိုင်ႈမိူင်း Interpol လၢတ်ႈဝႃႈ – “ယၢမ်းလဵဝ် ၵၢၼ်လွၵ်ႇငိုတ်ႈႁူၵ်းႁၢႆႉလူင် ၽႄႈလၢမ်းၼႂ်းလုမ်ႈၾႃႉယဝ်ႉလႄႈ ပိူဝ်ႈတႃႇၵႄႈလိတ်ႈပၼ်ႁႃလႆႈၼႆႉ လူဝ်ႇတၢင်းႁူမ်ႈ မိုဝ်းၵူႈၸိုင်ႈမိူင်းယူႇ”- ဝႃႈၼႆ။

ၸွမ်းၼင်ႇ ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ ပိူင်းၼႄဝႆႉ လွင်ႈၵၢၼ်ၸွႆႈထႅမ်ၵူၼ်းၺႃးလွၵ်ႇၶၢႆတူဝ်ပၼ် ၸုမ်းၵျႃးၽႅၼ်ႉၼႆႉ တႃႇ 90 ဝၢၵ်ႈ (%) ပဵၼ်ၵူၼ်းမိူင်းၼႂ်းၵုၼ်ၶဵဝ်ဢေးသျႃးသေ တႃႇမွၵ်ႈ 10 ဝၢၵ်ႈ (%) ၼႆႉ ပဵၼ်ၵူၼ်းမိူင်းၸိူဝ်းယူႇၼႂ်းၸိုင်ႈမိူင်းဢမေႊရိၵၼ်ႊ ပွတ်းၸၢၼ်း ဢမ်ႇၼၼ် ဢႃႇၾရိၵ။ ၵမ်ႈၼမ် ပဵၼ်ၵူၼ်းၸၢႆး မီးယူႇမွၵ်ႈ 80 ဝၢၵ်ႈ (%) သေ ပဵၼ်ၵူၼ်းသႅၼ်းဢႃယု 20 ပီ တေႃႇ 39 ပီ ၼႆယဝ်ႉ။

ၸုမ်းၵျႃးၽႅၼ်ႉၼႆႉ မိူဝ်ႈတႄႇမၼ်းပၵ်းလုမ်းဝႆႉ တီႈမိူင်းၵမ်ႇပူးၶျႃး ၼမ်လိူဝ်ပိူၼ်ႈသုတ်းသေ ဝၢႆးလင်မႃး ၶိုၼ်းၽႄၶဝ်ႈမႃး ပၵ်းလုမ်းႁဵတ်းၵၢၼ်ၼႂ်းမိူင်းလၢဝ်းလႄႈ မိူင်းမၢၼ်ႈသေ ႁဵတ်းၵၢၼ်ၵႃႉၶၢႆၵူၼ်း၊ ၵၢၼ်လွၵ်ႇလႅၼ်ၵိၼ်ငိုၼ်း၊ ပၢင်တေႃႇလွင်း ၸဵမ်ၸိူဝ်းၼႆႉၼမ်ႁႅင်းသေ ႁဵတ်းႁႂ်ႈၵိူတ်ႇပၼ်ႁႃ ၵၢၼ်ၶႃႈႁႅမ်ၵၼ်တၢႆ လူၺ်ႈဢမ်ႇမီးလွင်ႈတၢင်းသင် ၸဵမ်ၸိူဝ်း ၼႆႉ။

တႅမ်ႈ – ၽူၺ်းၼုမ်ႇ