ႁၢင်လိူၼ်ၵျုၼ်ႊပူၼ်ႉမႃးၼႆႉ သိုၵ်းမၢၼ်ႈ ဢွၵ်ႇၶေႃႈၸီႉသင်ႇ ႁႄႉႁၢမ်ႈဢမ်ႇပၼ်ၵူၼ်းမိူင်း လတ်းၵႂႃႇမႃး ၶၢဝ်းၵၢင်ၶမ်ႈၵၢင်ၶိုၼ်း ၼိူဝ်သဵၼ်ႈတၢင်းလူင် တႃႈၶီႈလဵၵ်း – ၵဵင်းတုင်လႄႈ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ဢိၵ်ႇပႃး ၵူၼ်းဢွၵ်ႇၶၢဝ်းတၢင်း ႁူပ်ႉတၢင်းယၢပ်ႇၽိုတ်ႇ လွင်ႈၵၢၼ်ၵႃႉၶၢႆ လွင်ႈပၢႆးယူႇလီ ၸဵမ်ၸိူဝ်းၼႆႉ။
မိူဝ်ႈဝၼ်းတီႈ 29/06/2025 ယၢမ်းၵၢင်ၶမ်ႈမွၵ်ႈ 8 မူင်းပၢႆၼၼ်ႉ ၸုမ်းၸွႆႈထႅမ်ၵၢၼ်တူင်ႇဝူင်းၵူၼ်း တေႃႉဢဝ်ၵူၼ်းပဵၼ်ထူပ်းၽေးၵိုင်ႉၵၢင်ႉ ရူတ်ႉၶိူင်ႈလူမ်ႉသေ မိုဝ်းႁၵ်းၼၼ်ႉ ၶၢမ်ႈၶူဝ်ဝဵင်းတႃႈလိူဝ်ႇ ၵႂႃႇယူတ်းယႃတူဝ်တီႈႁူင်းယႃလူင် တၢင်းဝဵင်းမိူင်းၽျၢၵ်ႈ။ ၽွင်းပွၵ်ႈမႃးၶိုၼ်းၼၼ်ႉ ၺႃးသိုၵ်းမၢၼ်ႈႁၢမ်ႈဢမ်ႇပၼ် လတ်းၶၢမ်ႈၶူဝ် ၼႆယဝ်ႉ။
ၽူႈမီးၼမ်ႉၸႂ် ႁဵတ်းၵၢၼ်ၸွႆႈထႅမ်ၵူၼ်း ၼႂ်းၸုမ်းၸွႆႈထႅမ်တေႃႉသူင်ႇၵူၼ်းပဵၼ် ၵေႃႉၼိုင်ႈလၢတ်ႈၼႄဝႃႈ –“လၢတ်ႈၼႄၶဝ် သပ်းလႅင်းၼႄၶဝ် ၵႃႈႁိုဝ်ၵေႃႈ ၶဝ်ဢမ်ႇယွမ်းပိုတ်ႇပၼ် ၽၵ်းတူၵဵတ်ႉ။ တိုၼ်းဢမ်ႇပၼ် ၵႃးႁဝ်းလတ်းၶၢမ်ႈၶူဝ်လႃးလႃး။ ပေႃးမိူၼ်ၼႆၼႆႉ ႁဝ်းတေလႆႈၵိုတ်းဝႆႉ ၵၢၼ်ၸွႆႈထႅမ်ႁပ်ႉၵူၼ်းပဵၼ်ၽေးၵိုင်ႉၵၢင်ႉ၊ ၵူၼ်းတေၵိူတ်ႇလုၵ်ႈ၊ ၵူၼ်းၼၢဝ်၊ ၵူၼ်းပဵၼ်ၵိၼ်းႁႅင်း ၶၢဝ်းၵၢင်ၶမ်ႈၵၢင်ၶိုၼ်းၵူၺ်းယဝ်ႉ”- ဝႃႈၼႆ။
ၶူဝ်တႃႈလိူဝ်ႇၼႆႉ မီးဝႆႉၼိူဝ်သဵၼ်ႈတၢင်းလူင်မိူင်းႁူမ်ႈတုမ် ၼႂ်းၵႄႈၵၢင်ဝဵင်းတႃႈၶီႈလဵၵ်း – ဝဵင်းၵဵင်းတုင် သေ ပဵၼ်ၶူဝ်ဢၼ်လမ်ႇလွင်ႈ တွၼ်ႈတႃႇၵူၼ်းၼႂ်းပိုၼ်ႉတီႈၵူၺ်းဢမ်ႇၵႃး လွင်ႈယႂ်ႇတႃႇၼႂ်းၶၵ်ႉၵၢၼ် တေႃႉသူင်ႇၵၢၼ်ၵႃႉၶၢႆ၊ ၵၢၼ်ပၢႆးမၢၵ်ႈမီး ၸဵမ်ၸိူဝ်းၼႆႉ။
ယၢမ်းလဵဝ် သိုၵ်းမၢၼ်ႈႁၢမ်ႈဢမ်ႇပၼ်ရူတ်ႉၵႃး၊ ရူတ်ႉၶိူင်ႈ လတ်းၵႂႃႇမႃး ၶၢဝ်းၵၢင်ၶမ်ႈၵၢင်ၶိုၼ်းသေ ပိၵ်ႉဢိုတ်းပႅတ်ႈ တင်ႈတႄႇၶၢဝ်းၵၢင်ၶမ်ႈ 10 မူင်းတေႃႇထိုင် ၵၢင်ၼႂ်မိူင်းလႅင်း ၸင်ႇပိုတ်ႇပၼ်ၶိုၼ်း။ ၵူၼ်းမိူင်းၸိူဝ်းဢွၵ်ႇၶၢဝ်းတၢင်းၵေႃႈ ၵူၼ်းၼႂ်းပိုၼ်ႉတီႈၸိူဝ်းလူဝ်ႇလတ်းၵႂႃႇမႃးၵႃႉၶၢႆ၊ ၶၢမ်ႈၵႂႃႇပွၵ်ႉ ၼိုင်ႈလႄႈ ပွၵ်ႉၼိုင်ႈၵေႃႈဢမ်ႇလႆႈသေ ႁူပ်ႉတၢင်းယၢပ်ႇၽိုတ်ႇဝႆႉ ၼႆယဝ်ႉ။
လႆႈႁူႉဝႃႈ တီႈၶူဝ်တႃႈလိူဝ်ႇၼၼ်ႉ ပဵၼ်တပ်ႉသိုၵ်းမၢၼ်ႈ ၶမယ 316 ႁပ်ႉပုၼ်ႈၽွၼ်း ဢဝ်ႁူမ်ႇလူမ်ႈပႂ်ႉဝႆႉသေ တီႉၺွပ်းပႃးရူတ်ႉၵႃး ၸိူဝ်းဢမ်ႇမီးဝႂ်လၢႆႊသိၼ်ႊယူႇ ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ