ဝၼ်းတီႈ 1/7/2025 ယၢမ်းၵၢင်ၼႂ် 9 -30  မူင်း (ၶၢဝ်းယၢမ်းမိူင်းထႆး) လုမ်းတြႃးလၵ်းမိူင်း မိူင်းထႆး ပိုၼ်ၽၢဝ်ႇ ႁႂ်ႈၸွမ်ၽွင်းလူင်ၸိုင်ႈထႆး ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်ႊ ၵိုတ်းလိုဝ်ႈၵၢၼ်ပဵၼ် ၸွမ်ၽွင်းလူင် ဝႃႈၼႆ။

ဢိင်ၼိူဝ် ၸွမ်ၽွင်းလူင်ၸိုင်ႈထႆး ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်ႊ သိုပ်ႇၾူၼ်းလၢတ်ႈတေႃႇ ၸွမ်ၽွင်းလူင်မိူင်းၵမ်ႊပေႃႊတီႊယိူဝ်ႊ ႁုၼ်ႊသဵၼ်ႊ မိူဝ်ႈဝၼ်းတီႈ 17/06/2025 – မၼ်းၼၢင်းလၢတ်ႈသေႉၼေးတပ်ႉသိုၵ်းထႆး ၽူႈၵွၼ်းသိုၵ်း ၽၢၵ်ႈ  2  ၊  မၼ်းၼၢင်းလၢတ်ႈမိူၼ်တေယွမ်းပၼ်ၵမ်ႊပေႃႊတီႊယိူဝ်ႊ ၵူႈလွင်ႈ  တႃႇႁႂ်ႈဢမ်ႇပဵၼ်ပၼ်ႁႃ 2 ၸိုင်ႈမိူင်း  ၸဵမ်ၸိူဝ်းၼႆႉ-ဝႃႈၼႆ။

လွင်ႈၼႆႉၵူၼ်းမိူင်းထႆးဢမ်ႇၽွမ်ႉၸွမ်း ႁၼ်ထိုင်ဝႃႈမၼ်းၼၢင်းလၢတ်ႈၵႂၢမ်း တုမ်ႉတိူဝ်ႉၼႃႈတႃၸိူဝ်ႉၸၢတ်ႈ ၼႆသေ ၼႄၵၢင်ၸႂ်သၢၼ်ၶတ်းမၼ်းၼၢင်း ႁႂ်ႈမၼ်းၼၢင်းထွၼ်တူဝ်ဢွၵ်ႇ။

လွင်ႈၼႆႉ ၾၢႆႇတၢင်းၽွင်းတႅၼ်းသၽႃးၼိူဝ် 36 ၵေႃႉၵေႃႈ တၢင်ႇလိၵ်ႈၸူး လုမ်းတြႃးပိူင်ပိုင်းလၵ်းမိူင်း ၊ လွင်ႈၼႆႉမၼ်းၼၢင်းပူၼ်ႉပႅၼ်ပိူင်တိုဝ်းၵမ်ၸွမ်ၽွင်းလူင် လႄႈႁႂ်ႈလုမ်းတြႃးထတ်းထွင်တၢင်းၽိတ်းမၼ်းၼၢင်းဝႃႈၼႆဝႆႉ။

လွင်ႈၼႆႉ ယူႇၾၢႆႇလုမ်းတြႃး ယွမ်းႁပ်ႉၶေႃႈယိုၼ်ႈယွၼ်း ၽွင်းတႅၼ်းသၽႃးၼိူဝ်သေ တေထတ်းထွင် ၶိုၼ်း။  ၵွပ်ႈၼႆ ၼႂ်းၸူဝ်ႈလုမ်းတြႃးပႆႇတႅပ်းတတ်းတြႃးၼႆႉ သင်ႇႁႂ်ႈ ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်ႊ ၵိုတ်းလိုဝ်ႈၵၢၼ်ပဵၼ်ၸွမ်ၽွင်းလူင်ထႆးဝႆႉၸူဝ်ႈၶၢဝ်း။ ၵူၺ်းၵႃႈ ၼႃႈတီႈၽွင်းလူင်ၾၢႆႇ ၾိင်ႈငႄႈ ဢၼ်မၼ်းၼၢင်းႁပ်ႉဝႆႉၼၼ်ႉတႄႉ သိုပ်ႇႁဵတ်းၸွမ်းၼႃႈတီႈပုၼ်ႈၽွၼ်းၵႂႃႇလႆႈယူႇ – ဝႃႈၼႆ။

ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်ႊ ၼႆႉ ပဵၼ်လုၵ်ႈယိင်း ၸွမ်ၽွင်းလူင်ၵဝ်ႇ ထၵ်ႊသိၼ်ႊ သျိၼ်ႊၼဝတ်ႊ။ မၼ်းၼၢင်းၼႆႉပဵၼ်ၸွမ်ၽွင်းလူင်ၸိုင်ႈထႆးၵေႃႉထူၼ်ႈ 31 ၶွင်မိူင်းၸိုင်ႈထႆး။