မိူဝ်ႈဝႃး ဝၼ်းတီႈ 29/06/2025 ယၢမ်းဝၢႆးဝၼ်း 2 မူင်း သိုၵ်းမၢၼ်ႈ ယိုတ်းမိူင်း တင်ႈၸႂ် ဢဝ်ၶိူင်ႈမိၼ် Jet Fighter မႃးပွႆႇမၢၵ်ႇ တီႈပွၵ်ႉ 1 လႄႈ တီႈၵျွင်းတႆးၵၢမ်ႇပေႃးၸ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ယွၼ်ႉမၢၵ်ႇ ၶိူင်ႈမိၼ်သိုၵ်းမၢၼ်ႈၼႆႉသေ တိူဝ်ႉၺႃးၵူၼ်းမိူင်းမၢတ်ႇၸဵပ်း 5 ၵေႃႉ ၼႂ်းၼၼ်ႉ ပႃးၼၢင်းယိင်း 3 ၵေႃႉ ၵူၼ်းၸၢႆး 2 ၵေႃႉလႄႈ ႁိူၼ်းယေးလူႉၵွႆၸွမ်းထႅင်ႈ 15 လင်။

ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၶိူင်ႈမိၼ်ၶဝ် ဢဝ်မၢၵ်ႇမႃးပွႆႇသႂ်ႇ တၢင်းၾၢႆႇ ၸၢၼ်းၵျွင်းမုၼ်ၸဝ်ႈ တီႈၵျွင်းတႆးၼႆႉ တိူဝ်ႉၺႃးသိမ်ႇလႄႈ ၸလွပ်ႈလူႉၵွႆတင်းၼမ်။ ႁၢၼ်ႉၶၢႆၾူၼ်း၊ ႁၢၼ်ႉၶၢႆယႃ ၸိူဝ်းၼႆႉၵေႃႈ လူႉၵွႆၸွမ်းထႅင်ႈ။ လွင်ႈၵူၼ်းမၢတ်ႇၸဵပ်းတႄႉ မီး 5 ၵေႃႉ။ မၢၵ်ႇဢၼ်ၶဝ်မႃးပွႆႇၼႆႉ တင်းမူတ်း 2 လုၵ်ႈ”- ဝႃႈၼႆ။  

ၼႂ်းၶၢဝ်းတၢင်းၼိုင်ႈဝူင်ႈၵူၺ်း သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇတီႈဝဵင်းၵျွၵ်ႉမႄးၼႆႉ မီးၵႂႃႇဢမ်ႇယွမ်း 3 ပွၵ်ႈယဝ်ႉ ၸၢၵ်ႇမၢၵ်ႇတိူဝ်ႉၺႃးၵူၼ်းမိူင်းမၢတ်ႇၸဵပ်းလူႉတၢႆလႄႈ ႁိူၼ်းယေးလူႉၵွႆၸွမ်းၼမ်။

ၾၢႆႇတပ်ႉသိုၵ်းတဢၢင်းTNLA ပိုၼ်ၽၢဝ်ႇဢွၵ်ႇဝႆႉ – လွင်ႈသိုၵ်းမၢၼ်ႈပွႆႇမၢၵ်ႇသႂ်ႇ မိူဝ်ႈဝႃးၼႆႉ သိုၵ်းမၢၼ်ႈ ဢဝ်ၶိူင်ႈမိၼ် Jet fighter မႃးပွႆႇ ပဵၼ်မၢၵ်ႇၼမ်ႉၼၵ်းပွၼ်ႊ 250 ပွႆႇသႂ်ႇ 2 လုၵ်ႈလႄႈ တိူဝ်ႉၺႃး ၼၢင်းယိင်း 2 ၵေႃႉ ၵူၼ်းၸၢႆး 4 ၵေႃႉ လႆႈတိူဝ်ႉမၢတ်ႇၸဵပ်း ၊ လိူဝ်ၼၼ်ႉ ႁိူၼ်းယေးလူႉၵွႆ 10 လင် – ဝႃႈၼႆ။

ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉဝႃႈ ၼႂ်းဝၼ်းတီႈ 24-26/06/2025 ၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇသႂ်ႇ 4 လုၵ်ႈလႄႈ တိူဝ်ႉၺႃးၵူၼ်းမိူင်း လူႉတၢႆ 5 ၵေႃႉ မၢတ်ႇၸဵပ်း 16 ၵေႃႉ ၼႂ်းၼၼ်ႉ ပႃးလုၵ်ႈ ဢွၼ်ႇ 2 ၵေႃႉ၊ ႁူင်းႁဵၼ်းလူႉၵွႆ 2 လင်လႄႈ ႁိူၼ်းၵူၼ်းပိုၼ်ႉတီႈ လူႉၵွႆ 50 လင် ဝႃႈၼႆ။

ဝၢႆးလင် သိုၵ်းမၢၼ်ႈ ႁဵတ်းပၢင်ၵုမ်တီႈၼေႇပျီႇတေႃႇ လွင်ႈငမ်းယဵၼ်ၽူဝ်ႊရမ်ႊ ၼႂ်းဝၼ်း 25-27 ၼၼ်ႉမႃး သိုၵ်းမၢၼ်ႈ ၵႆႉဢဝ်ၶိူင်ႈမိၼ် ပွႆႇမၢၵ်ႇတီႈဝဵင်း ဢၼ်သိုၵ်းတဢၢင်း TNLA ၶဝ်ၵုမ်းၵမ် မိူၼ်ၼင်ႇ – မိူင်း ၵုတ်ႈ ၊ ၵျွၵ်ႉမႄးလႄႈ ဝဵင်းၼွင်ၶဵဝ် ၸိူဝ်းၼႆႉမႃး။  

ယၢမ်းလဵဝ် သိုၵ်းမၢၼ်ႈတင်း သိုၵ်းတဢၢင်းလႄႈ ၸုမ်းႁူမ်ႈႁွမ်းပဵၼ်ပၢင်တိုၵ်းၵၼ်ဝႆႉ ၼႂ်းၸႄႈဝဵင်းၼွင် ၶဵဝ် ႁၢဝ်ႈႁႅင်း၊ ၾၢႆႇသိုၵ်းမၢၼ်ႈသမ်ႉ ဢဝ်တရူၼ်ႊ ၊ ၶိူင်ႈၵွင်ႈလူင်လႄႈ ၶိူင်ႈမိၼ် ၸိူဝ်းၼႆႉ ပွႆႇမၢၵ်ႇပိုတ်း ယိုတ်းၸွႆႈ။ ႁဵတ်းႁႂ်ႈၵူၼ်းမိူင်းၼွင်ၶဵဝ် ပၢႆႈၽေးသိုၵ်း ဢမ်ႇယွမ်း 2 ႁဵင် လႆႈပၢႆႈယူႇဝႆႉၸွမ်းဝဵင်းၵျွၵ်ႉမႄး ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်ဝႆႉ။