ဝၼ်းတီႈ 29/06/2025 ယၢမ်းၵၢင်ၼႂ် 9 မူင်းထိုင် 1 မူင်းဝၢႆးဝၼ်း ယူႇတီႈ ႁူင်းႁဵၼ်းဝတ်ႉသီဝူဝ်ငိုၼ်းတင်း ႁူင်းႁဵၼ်းဝတ်ႉၵူႇတဝ်ႈသေ ၸတ်းႁဵတ်းပွႆးလိုဝ်ႈပၢင်သွၼ် လိၵ်ႈတႆးၶၢဝ်းမႆႈ တီႈဝတ်ႉၽူဝ်းထိမူင်းၶူၼ်း (ၵႃႈလပူဝ်ႇ) ဢိူင်းၶျႆးသထၢၼ် ဝဵင်းသရႃးၾီး ၸႄႈတွၼ်ႈၵဵင်းမႂ်ႇ ၸိုင်ႈထႆး မီးလုၵ်ႈႁဵၼ်းၶဝ်ႈႁူမ်ႈမွၵ်ႈ 50 ၵေႃႉ။
မေႃသွၼ် ယိင်းႁွမ် လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ မႃးယူႇမိူင်းပိူၼ်ႈသေတႃႉ ၼင်ႇႁိုဝ် ၽႃသႃၵႂၢမ်းလၢတ်း ၾိင်ႈထုင်းႁဝ်းၶႃႈ ပေႃးတေဢမ်ႇႁၢႆလူင်လိုမ်းၵႂႃႇၼၼ်ႉ ႁဝ်းၶႃႈ တေၶတ်းၸႂ်ႁဵတ်းသၢင်ႈၵႂႃႇၶႃႈဢေႃႈ။ တိုၵ်းသူၼ်းထိုင် ၵူၼ်းၼုမ်ႇတႆးႁဝ်းၶႃႈ ၶတ်းၸႂ်လဵပ်ႈႁဵၼ်းၵႂႃႇသေၵမ်း”- ဝႃႈၼႆ။
ပွႆးလိုဝ်ႈပၢင်သွၼ် လိၵ်ႈတႆးၶၢဝ်းမႆႈ တီႈဝတ်ႉၽူဝ်းထိမူင်းၶူၼ်းၼႆႉ မီးလုၵ်ႈႁဵၼ်း တီႈဝတ်ႉသီဝူဝ်ငိုၼ်း ၶဝ်ႈႁူမ်ႈ 37 ၵေႃႉလႄႈ တီႈဝတ်ႉၵူႇတဝ်ႈသမ်ႉ 12 ၵေႃႉ လိူဝ်ၼၼ်ႉ သင်ၶၸဝ်ႈ၊ ၽူႈယႂ်ႇၵူၼ်းလူင်၊ ၶူး သွၼ်မေႃသွၼ် ဢိၵ်ႇပႃး ပေႃႈမႄႈလုၵ်ႈဢွၼ်ႇႁဵၼ်း ၶဝ်ႈႁူမ်ႈထႅင်ႈ တင်းၼမ်။
“ယိူင်းဢၢၼ်း တီႈလႆႈပိုတ်ႇႁူင်းႁဵၼ်းမႃးၼႆႉ ယွၼ်ႉပေႃႈမႄႈလုၵ်ႈဢွၼ်ႇ ပၼ်တိုဝ်ႉတၢင်းပၼ်ႁႅင်းၸႂ် လုၵ်ႈဢွၼ်ႇသေ ၸင်ႇလႆႈပိုတ်ႇပၢင်သွၼ်လိၵ်ႈတႆး ၶၢဝ်းမႆႈၼႆႉမႃး။ ယဝ်ႉၵေႃႈ သင်ၶၸဝ်ႈ ၽူႈယႂ်ႇၵူၼ်းလူင် ယူႇၾၢႆႇလင်သေ ၵမ်ႉၸွႆႈႁႅင်းငိုၼ်း ပၼ်တိုဝ်ႉတၢင်းမႃးၵေႃႈ ပိူင်ၼိုင်ႈ ၼင်ႇႁိုဝ် လိၵ်ႈလၢႆးႁဝ်းၶႃႈ ပေႃးတေဢမ်ႇႁၢႆၼၼ်ႉ ၸင်ႇလႆႈပူင်သွၼ်မႃး။ ၵမ်းလိုၼ်းသုတ်းတႄႉ ယိၼ်းၸူမ်းၶွပ်ႈၸႂ်ထိုင် သင်ၶၸဝ်ႈ ၽူႈယႂ်ႇၵူၼ်းလူင် ပေႃႈမႄႈလုၵ်ႈႁဵၼ်း ၸုမ်းၶူးႁဝ်းၶႃႈ ၵူႈၵေႃႉၶႃႈဢေႃႈ”- မေႃသွၼ် ယိင်းႁွမ် သိုပ်ႇလၢတ်ႈၼႄၼင်ႇၼႆ။
ပၢင်သွၼ်လိၵ်ႈတႆး ၶၢဝ်းမႆႈ ပီၼႆႉ တီႈႁူင်းႁဵၼ်းဝတ်ႉသီဝူဝ်ငိုၼ်းတင်း ဝတ်ႉၵူႇတဝ်ႈၼၼ်ႉ လႆႈတႄႇပိုတ်ႇ သွၼ်မႃး မိူဝ်ႈဝၼ်းတီႈ 05/03/2025 တေႃႇထိုင် ဝၼ်းတီႈ 29/06/2025 ၼႆႉ။ မိူဝ်ႈပီၵၢႆၼၼ်ႉၵေႃႈ ယူႇတီႈ ႁူင်းႁဵၼ်းသီဝူဝ်ငိုၼ်းၼႆႉသေ လႆႈတႄႇပိုတ်ႇပၢင်သွၼ်လိၵ်ႈတႆး ၶၢဝ်းမႆႈမႃး မိူဝ်ႈဝၼ်းတီႈ 11/03/2024 မီး လုၵ်ႈႁဵၼ်းမွၵ်ႈ 40 ၵေႃႉ ၼႆယဝ်ႉ။
ပၢင်သွၼ်လိၵ်ႈတႆး ၶၢဝ်းမႆႈ ပီ 2025 ၼႂ်းၸႄႈတွၼ်ႈၵဵင်းမႂ်ႇ – လမ်းပုၼ်းၼႆႉ တင်းမူတ်း မီး 8 ဢွင်ႈတီႈ မိူၼ်ၼင်ႇ – တီႈဝၢၼ်ႈသၼ်ပႃႇႁဵင် ဝဵင်းလမ်းပုၼ်း၊ ဝၢၼ်ႈပူင်ႇယဵၼ်းၼွၵ်ႈ ဝဵင်းမႄႈလိမ်း၊ ဝတ်ႉသီဝူဝ် ငိုၼ်း ဝဵင်းၵဵင်းမႂ်ႇ၊ ဝၢၼ်ႈမႂ်ႇတႆးမၼ်ႈၵိုမ်း ဝဵင်းမႄႈလိမ်း၊ ဝတ်ႉၵူႇတဝ်ႈ ဝဵင်းၵဵင်းမႂ်ႇ၊ ႁူင်းႁဵၼ်းသၼ်ၽၵ်းဝၢၼ် ဝဵင်းႁၢင်လူင်း၊ ဝတ်ႉမႄႈၽႅၵ်ႇလူင် ဝဵင်းသၼ်သၢႆးလႄႈ ဝဵင်းမႄႈတႅင် ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ