ပေႃးထိုင်မႃး ဝၼ်းတီႈ 2/7/2025 ၼႆႉ သင်ၶၸဝ်ႈမိူင်းတူၼ်လႄႈမိူင်းသၢတ်ႇ တေႁူမ်ႈၸတ်းပၢင်တွၼ်ႈသူး လုၵ်ႈႁဵၼ်းၸိူဝ်းဢွင်ႇပူၼ်ႉၸၼ်ႉ ၼႂ်းပီၵၢၼ်ႁဵၼ်း 2024-2025 တီႈထၢတ်ႈၵွင်းမူး ၽၼရေႊသူၼ် (ႁိုဝ်) ၵွင်းမူးလူင်မင်ႇၵလႃႇၸုမ်ႉမိူင်း ဝၢၼ်ႈႁူၺ်ႈဢေႃႈ ထုင်ႉၼႃးၵွင်းမူး ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ ။
ၸဝ်ႈၶူးၼၼ်ႇတိသေၼ ၵႅမ်ႁူဝ်ပဝ်ႈ ပၢႆးပၺ်ႇၺႃႇတူင်ႇဝဵင်းမိူင်းတူၼ်-မိူင်းသၢတ်ႇ လၢတ်ႈတီႈ ၽူႈတွႆႇႁွၵ်ႈဝႃႈ – “ ၸႂ်ႈယဝ်ႉၶႃႈ တေႁဵတ်းႁူမ်ႈၵၼ် တီႈၵွင်းမူးၽၼရေႊသူၼ် တီႈႁူၺ်ႈဢေႃႈၼၼ်ႉဢေႃႈ ”- ဝႃႈၼႆ။
ပၢင်တွပ်ႇလိၵ်ႈဢၼ်ၸတ်းမႃးၼႆႉ ၸႂ်ႉလၢႆးလၵ်းသုတ်ႇမႂ်ႇ (ဢၼ် ပရိယတ်တိ သတ်ထမ်မ ပႃလၵႅၼ်ႇၸဝ်ႈၸိုင်ႈတႆး ၵေႃၽႄ တီႈငဝ်ႈငုၼ်း မုၵ်ႉၸုမ်းသင်ၶၸိုင်ႈတႆးပၢင်လူင် ၼမ်းၸတ်း) ။
လုၵ်ႈႁဵၼ်းဢွင်ႇပူၼ်ႉၸၼ်ႉ တင်းသဵင်ႈ မီး 111 ပႃး ၼႂ်းၼၼ်ႉ မိူင်းတူၼ် 65 ပႃးလႄႈ မိူင်းသၢတ်ႇ 46 ပႃး ။ ဢဵၼ်ႁႅင်းၶူးသွၼ် မေႃသွၼ် ပွတ်းတၢင်းမိူင်းတူၼ် မိူင်းသၢတ်ႇ ၼႆႉ မီး30 ၸဝ်ႈ / ၵေႃႉ လႆႈႁူႉၼင်ႇ
တႃႇတေၸတ်းပၢင်တွၼ်ႈသူးၼႆႉ သင်ၶၸဝ်ႈလၢႆတူၼ်လၢႆၸဝ်ႈၸိူဝ်းၵဵဝ်ႇၶွင်ႈ ဢွၼ်ၵၼ်ႁူပ်ႉဢုပ်ႇၵၼ် မိူဝ်ႈဝၼ်းတီႈ 5/6/2025 ။
ၸဝ်ႈၶူးၼၼ်ႇတိသေၼ သိုပ်ႇလၢတ်ႈဝႃႈ – “ တႃႇႁႂ်ႈပၢႆးပၺ်ႇၺႃႇ လုၵ်ႈႁဵၼ်းၸိူဝ်းပဵၼ်ၸဝ်ႈသၢင်ႇၸဝ်ႈၸၢင်းၶဝ် ပေႃးတေၶိုပ်ႈၼႃႈ မီးၽွၼ်းလီတႃႇ တူင်ႇၵူၼ်း တႃႇသႃသၼႃၵႂႃႇၼၼ်ႉ ႁႂ်ႈၵူႈမူႇၵူႈၸုမ်းလႄႈ ၵူၼ်းမိူင်းၵူႈၵေႃႉ ဝႆႉၼမ်ႉၼၵ်ႉ လၵ်းသုတ်ႇမႂ်ႇ ဢၼ်ၸဝ်ႈၶူးလူင် တွၵ်ႊတိူဝ်ႊၶမ်းမၢႆ ထမ်ႇမသႃႇမိ ဢွၼ်ႁူဝ်ႁဵတ်းဝႆႉၼၼ်ႉသေၵမ်း ” -ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ