ဝၼ်းတီႈ 27/6/2025 ယၢမ်းၵၢင်ၼႂ် 9 မူင်း  သိုၵ်းမၢၼ်ႈလႄႈႁွင်ႈၵၢၼ်ၾၢႆႇၽွင်းငမ်း  ႁွင်ႉၵူၼ်းဝဵင်းမိူင်းၼွင် ၸႄႈဝဵင်းၵေးသီး မႃးထူပ်းသေ လၢတ်ႈႁႂ်ႈၵူၼ်းမိူင်း ၶဝ်ႈႁၢပ်ႇၵၢၼ်သိုၵ်း။

ၵူၼ်းၼုမ်ႇမိူင်းၼွင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၵမ်ႉလၢတ်ႈလၢႆးၶႅင် ၵမ်ႉလၢတ်ႈလၢႆးဢူၼ်ႈႁဵတ်းၼႆဢေႃႈ ။ ၶဝ်လၢတ်ႈဝႃႈ ပွၵ်ႈၼႃႈမႃး တေႁႂ်ႈၸူၵ်းၶႅပ်းမႄးတႃႇႁၢပ်ႇၵၢၼ်သိုၵ်းၼႆ ။ ၽႂ်ၵေႃႈ ပၢႆႈဢမ်ႇလွတ်ႈၼႆဝႃႈ ၊ ပေႃးပၢႆႈၵႂႃႇယူႇၼွၵ်ႈမိူင်းၵေႃႈ တေႁူမ်ႈၵၼ်တင်းၾၢႆႇၵဵဝ်ႇၶွင်ႈမိူင်းၼၼ်ႉသေ ႁႂ်ႈပွၵ်ႈမိူင်းၶိုၼ်း ” – ဝႃႈၼႆ။

ၸဵမ်မိူဝ်ႈ သိုၵ်းမၢၼ်ႈ ဢွၵ်ႇပိူင်ၵဵပ်းသိုၵ်း တီႈမိူင်းၼွင်ၼႆႉ ပႆႇယၢမ်ႈႁွင်ႉထူပ်းလၢတ်ႈလွင်ႈတေၵဵပ်းသိုၵ်းၸိူင်ႉၼႆ ၊ ပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်း ။ သမ်ႉပၢႆ ၸႅၵ်ႇပႃး ဝႂ်ပိဝ်ၵဵဝ်ႇလွင်ႈပိူင်သိုၵ်းမၢၼ်ႈၼႆယဝ်ႉ။

ၼႂ်းလိၵ်ႈဝႂ်ပိဝ်ၼႆႉ မီး- ၶေႃႈယိူင်းဢၢၼ်းပိူင်ၵဵပ်းသိုၵ်းမၢၼ်ႈ- ၼႂ်းၼၼ်ႉ ပႃးဝႆႉဝႃႈ သင်ၶဝ်ႈႁၢပ်ႇၵၢၼ်သိုၵ်းမၢၼ်ႈတေလႆႈသင် လႄႈ ၵူၼ်းၸိူင်ႉႁိုဝ်တေဢမ်ႇလွတ်ႈၵၢၼ်သိုၵ်း ၼႆၸိူဝ်းၼႆႉ။

ၵူၼ်းမိူင်းၼွင်လၢတ်ႈဝႃႈ – “ ၵူၼ်းၼုမ်ႇပွတ်းၼႆႉတႄႉ ပၢႆႈၸဵမ်မိူဝ်ႈၶဝ်ဢွၵ်ႇပိူင်မၼ်းပုၼ်ႉယဝ်ႉ ။ ဢၼ်တေၸူၵ်းမႄးၼႆႉတႄႉ ၶဝ်တေမႃးလၢတ်ႈထႅင်ႈၵမ်းၼိုင်ႈၼႆဝႃႇ။ ၼႆႉတေႃႇထိုင်ဝၼ်းၼၼ်ႉၵေႃႈ ၽႂ်ဢမ်ႇယူႇယဝ်ႉ။ ၸဵမ်မိူဝ်ႈသိုၵ်းမၢၼ်ႈပိုၼ်ၽၢဝ်ႇယိုတ်းၵႃးဢမ်ႇမီးဝႂ်ၼႆႉသေ ဢွၼ်ၵၼ်ပၢႆႈၵေႃႈၼမ်ၼႃႇယဝ်ႉ ” – ဝႃႈၼႆ။

ၸွမ်းၼင်ႇ ၼႂ်းဝႂ်ပိဝ်ၼၼ်ႉတႄႉ လၢတ်ႈဝႆႉဝႃႈ – ၵူၼ်းၸိူဝ်းၶဝ်ႈၼႂ်းသႅၼ်းတႃႇႁၢပ်ႇၵၢၼ်သိုၵ်း တၵ်းလႆႈႁၢပ်ႇၵၢၼ် 24 လိူၼ် ၊ သင်ပဵၼ်ၵူၼ်းမေႃတိၼ်မေႃမိုဝ်းသေ ၾၢႆႇသိုၵ်းမၢၼ်ႈႁွင်ႉၵႂႃႇၵမ်းသိုဝ်ႈတႄႉ လႆႈႁၢပ်ႇၵၢၼ် 36 လိူၼ် ။ ဢိင်ၼိူဝ် တၢင်းလူဝ်ႇတပ်ႉသိုၵ်းသေ ၸၢင်ႈလႆႈ ႁၢပ်ႇၵၢၼ်သိုၵ်း ၶၢဝ်းတၢင်း 5 ပီ ဝႃႈၼႆ။