တပ်ႉသိုၵ်းထၼူႉ DPLA ၸတ်းႁဵတ်းပွႆးလူင်းပၢင်သွၼ်ၵၢၼ်သိုၵ်း ၸုပ်ႈထီႉ 6 မိူဝ်ႈဝၼ်းတီႈ 21/06/2025 ၼႂ်းၸိုင်ႈတႆးပွတ်းၸၢၼ်းတီႈၼိုင်ႈ။ တီႈပွႆးလူင်းပၢင်သွၼ်ၼၼ်ႉ ၵူၼ်းမႂ်ႇၾိုၵ်းၵၢၼ်သိုၵ်း ၸဵမ်ယိင်းလႄႈၸၢႆး ဢဵၼ်ႁႅင်းမီးမွၵ်ႈ 300 ၵေႃႉ။

ႁူဝ်ပဝ်ႈတပ်ႉသိုၵ်းထၼူႉ DPLF ဢူးထုၼ်းထုၼ်းၼၢႆႇၶဝ်ႈႁူမ်ႈပွႆးလူင်းပၢင်သွၼ်သေလၢတ်ႈဝႃႈ – ႁႂ်ႈၵႅတ်ႇၶႄပၼ်ၵူၼ်းၶိူဝ်းထၼူႉ၊ ႁႂ်ႈမေႃထွမ်ႇၶေႃႈပူင်၊ ထိုင်ငဝ်းလၢႆးၸိူင်ႉႁိုဝ်ၵေႃႈယႃႇယွမ်းၵၢၼ်ႉသေ ႁႂ်ႈတိုၵ်းလိုပ်ႈၸဝ်ႈဢႃႇၼႃႇသိုၵ်းလႆႈတင်းတူၼ်ႈတင်းႁၢၵ်ႈ၊ ယိူင်းဢၢၼ်းႁႂ်ႈၸဵဝ်းထိုင် – ဝႃႈၼႆ။

ပၢင်သွၼ်ၵၢၼ်သိုၵ်းၵမ်းၼႆႉ ၸႂ်ႉၶၢဝ်းယၢမ်း 3 လိူၼ်ၼႆ DPLF ၵေႃႈပိုၼ်ၽၢဝ်ႇဝႆႉၼင်ႇၼႆ။

ၸူဝ်ႈသိုၵ်းမၢၼ်ႈပိုၼ်ၽၢဝ်ႇၵဵပ်းသိုၵ်းၵူၼ်းမိူင်းမႃးၼႆႉ ၵူၼ်းၼုမ်ႇၸၢဝ်းၶိူဝ်းၼႂ်းမိူင်းတႆးပွတ်းၸၢၼ်း ပွတ်းႁွင်ႇ ဢွၼ်ၵၼ်ပၢႆႈသိုၵ်းမၢၼ်ႈ ၶဝ်ႈၾိုၵ်းၵၢၼ်သိုၵ်းၼႂ်းတပ်ႉသိုၵ်းၸၢဝ်းၶိူဝ်းၽႂ်မၼ်း။ သိုၵ်းထၼူႉ DPLF ၵေႃႈ ၾိုၵ်းၵၢၼ်သိုၵ်းပၼ်ၵူၼ်းၼုမ်ႇထိုင်ၸုပ်ႈထီႉ 6 ယဝ်ႉ။

တပ်ႉသိုၵ်းထၼူႉၼႆႉ  တူင်ႉၼိုင်ယူႇသဝ်းၼႂ်းထုင်ႉၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇၸိုင်ႈတႆးပွတ်းၸၢၼ်းလႄႈ ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။ မီးယိူင်းဢၢၼ်းတႃႇၵုမ်းလႆႈပိုၼ်ႉတီႈဢၼ်တူင်ႉၼိုင်ဝႆႉ  ၼၼ်ႉ ပဵၼ်ၸႄႈမိူင်း ၼႆဝႆႉ။ ယၢမ်းလဵဝ်ၵေႃႈ ႁူမ်ႈၵၼ်တင်းၸုမ်းသိုၵ်းတဢၢင်း TNLA,  သိုၵ်းၵႅတ်ႇၶႄၵူၼ်းမိူင်း PDF ထုင်ႉလိၼ်ပဵင်းသေ  ပိုတ်းယိုဝ်းၵၼ်တင်းသိုၵ်းမၢၼ်ႈဝႆႉႁၢဝ်ႈႁႅင်းၼႂ်းၸႄႈဝဵင်းၼွင်ၶဵဝ်။