ႁွင်ႈၵၢၼ်ၾၢႆႇလိူမ်ႈလႆႇ ဢၼ်ယူႇတႂ်ႈသိုၵ်းမၢၼ်ႈယိုတ်းမိူင်း ဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ ပႂ်ႉၵဵပ်းၶွၼ်ႇ ရူတ်ႉၶိူင်ႈ( ဘီးခွန်) တီႈဝၢၼ်ႈၾၢႆၶႄႇ ၼိုင်ႈလမ်းလႂ် 5000 ပျႃး   ။

ဝၢႆးသိုၵ်းမၢၼ်ႈပိုၼ်ၽၢဝ်ႇ ယိုတ်းရူတ်ႉၵႃးဢၼ်ဢမ်ႇမီးဝႂ် မိူဝ်ႈႁူဝ်လိူၼ်ၵျုၼ်ႊၼႆႉယဝ်ႉ ၵူၼ်းမိူင်းတူၼ် ဢမ်ႇသူႈဢွၵ်ႇႁိူၼ်းၵႂႃႇမႃး တၢင်းလႂ် ၊ သင်ဢွၵ်ႇၵေႃႈ ၵမ်ႈၼမ် တေႁေႃႈရူတ်ႉၶိူင်ႈပဵၼ်ပိူင်လူင်။ မိူဝ်ႈဝၼ်းတီႈ 23/6/2025 ၼႆႉ ႁွင်ႈၵၢၼ် ၾၢႆႇၵဵပ်းၶွၼ်ႇသမ်ႉ ပႂ်ႉၵဵပ်းၶွၼ်ႇရူတ်ႉၶိူင်ႈထႅင်ႈ ႁဵတ်းႁႂ်ႈ ၵူၼ်းမိူင်းသုၵ်ႉၸႂ် ။

ၵူၼ်းမိူင်းတူၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်မႃးၵဵပ်းထိုင်တီႈၼႂ်းပွၵ်ႉၼႂ်းယွမ်ႇ ၊ ၶဝ်မႃးလၢတ်ႈၵၢင်ႉၵႄႇႁွင်ႉႁႂ်ႈၵူၼ်းမိူင်းၵႂႃႇ သႂ်ႇၶွၼ်ႇရူတ်ႉၶိူင်ႈတီႈႁိူၼ်းၵၢင်ႉၵႄႇၽႂ်မၼ်း ။ ပေႃးၸၢႆႇငိုၼ်းယဝ်ႉ ၶဝ်ဢွၵ်ႇပၼ် ဝႂ်ၶွၼ်ႇ ႁႂ်ႈပႃႉဝႆႉတီႈရူတ်ႉၶိူင်ႈ ”- ဝႃႈၼႆ။

ၼႂ်းၸႄႈဝဵင်းမိူင်းတူၼ်ၼႆႉ တၢင်ႇဝၢၼ်ႈတၢင်ႇပွၵ်ႉတႄႉ ပႆႇမီးၸုမ်းလႂ် လူင်းၵဵပ်းၶွၼ်ႇရူတ်ႉထိုင်တီႈသေတႃႉ ဝၢၼ်ႈၾၢႆၶႄႇတႄႉ ၽႂ်မီးရူတ်ႉၶိူင်ႈၵေႃႈ တၵ်းလႆႈသႂ်ႇၶွၼ်ႇ  ၊  ၼိုင်ႈလမ်း 5000 ပျႃး  တႃႇၼိုင်ႈပီ ။ တႃႇၵႃးတႄႉ ပႆႇႁၼ်တူၵ်ႇတၵ်ႉသင်  ဝႃႈၼႆ။

ၵူၼ်းၼုမ်ႇမိူင်းတူၼ်ၵေႃႉၼိုင်ႈသိုပ်ႇလၢတ်ႈထႅင်ႈဝႃႈ – “ တီႈတႄႉမၼ်း ၶွၼ်ႇရူတ်ႉၶိူင်ႈ ဢၼ်ၶဝ်ၵဵပ်းၼႆႉ မၼ်းပဵၼ်တႃႇသိူဝ်ႇတၢင်းမႄးတၢင်း ၸင်ႇႁွင်ႉဝႃႈ ဘီးခွန် ။ မၼ်းပဵၼ်ၵႃႈလတ်းၽၢၼ်ႇသဵၼ်ႈတၢင်းၼႂ်းမိူင်း။ ၵူၺ်းၵႃႈ သမ်ႉပိုၼ်ၽၢဝ်ႇတီႉၺွပ်းၵႃးသေ သမ်ႉမႃးၵဵပ်းၶွၼ်ႇရူတ်ႉၶိူင်ႈတႄႉ မိူၼ်တၢင်းၶဝ်ၵဝ်းၵိၼ်ငိုၼ်းၵူၼ်းမိူင်း ၸိူဝ်းဢမ်ႇပွင်ႇၸႂ်လွင်ႈႁဵတ်းသၢင်ႈၶဝ်ၼၼ်ႉၵူၺ်း ” -ဝႃႈၼႆ။

သိုၵ်းမၢၼ်ႈၼႆႉ ၵႃႈၵွၼ်ႇပူၼ်ႉမႃးၵေႃႈ ပၼ်ၶေႃႈဢၢင်ႈဝႃႈ တႃႇမႄးလုမ်းလႃးသဵၼ်ႈတၢင်းၼႆသေ ယၢမ်ႈပႂ်ႉၵဵပ်းငိုၼ်းၸွမ်းၼိူဝ်တၢင်းၵူၺ်း ယၢမ်းလဵဝ် လူင်းၵဵပ်းထိုင်ၼႂ်းပွၵ်ႉၼႂ်းဝၢၼ်ႈလႄႈ တၢင်ႇဝၢၼ်ႈၵေႃႈ ဢွၼ်ၵၼ်မႆႈၸႂ်ပႂ်ႉထႃႈဝႆႉၵေႃႈမီး။

တႃႇတေႁဵတ်းဝႂ်ရူတ်ႉၵႃးပၼ်တႄႉ ထိုင်မိူဝ်ႈလဵဝ်ပႆႇမီးၸုမ်းလႂ်ဢွၵ်ႇလၢတ်ႈသင် ၊ ၶၢဝ်ႇလိုဝ်းၵၼ်ဝႃႈ သင်ႁဵတ်းၵေႃႈ တေႁဵတ်းပၼ် ၶႃႈႁၢပ်ႇၵၢၼ်ၶုၼ်လႄႈ မုၼ်ၸဝ်ႈမုၼ်ၸၢင်း ဢွၼ်တၢင်းၼႆ ၵူၼ်းပိုၼ်ႉတီႈသိုပ်ႇလၢတ်ႈၼင်ႇၼႆ။