ၼႂ်းဝၼ်းတီႈ 23 လိူၼ်ၵျုၼ်ႊ ဝၼ်းၸၼ်ၼႆႉ ငဝ်ႈငုၼ်းၾၢႆႇၵုမ်းၵမ်သိုၵ်း တပ်ႉၸုမ်းယိပ်းၵွင်ႈၵၢင်ႇ ယူႊၶရဵၼ်ႊ ပိုၼ်ၽၢဝ်ႇဢွၵ်ႇမႃးဝႃႈ ရတ်ႉသျႃႊ ၸႂ်ႉၶိူင်ႈတရူၼ်ႊ 352 လမ်း လႄႈ ၶိူင်ႈမၢၵ်ႇၼူၾႆး 16 ဢၼ် ယိုဝ်းတိုၵ်းသႂ်ႇဝဵင်းလူင် ၶေႊယပ်ႊၾ် (Kyiv) မိူင်းယူႊၶရဵၼ်ႊ ဝႃႈၼႆ။

ၽႅၼ်ၵၢၼ်ယိုဝ်းတိုၵ်းပွၵ်ႈၼႆႉ တႄႇယၢမ်းၵၢင်ၶမ်ႈ 8 မူင်း ၼႂ်းဝၼ်းဢႃးတိတ်ႉ။ တပ်ႉသိုၵ်း ရတ်ႉသျႃႊ ဢဝ်ဝဵင်းလူင် ၶေႊယပ်ႊၾ် မိူင်းယူႊၶရဵၼ်ႊ ႁဵတ်းပဝ်ႉမၢႆသိုၵ်း ယိုဝ်းတိုၵ်းႁၢဝ်ႈႁႅင်း။ ၵူၼ်းမိူင်းလူႉတၢႆ ဢမ်ႇယွမ်း 7 ၵေႃႉ၊ ၵူၼ်းမၢတ်ႇၸဵပ်းမီးတင်းၼမ်၊ ႁိူၼ်းယေးၵူၼ်းမိူင်းၵေႃႈ ၾႆးမႆႈလူႉၵွႆ ၸွမ်ၸိုင်ႈ မိူင်းယူႊၶရဵၼ်ႊ လၢတ်ႈဝႆႉၼင်ႇၼႆ။

ပူၼ်ႉမႃးလၢႆဝၼ်းၼႆႉ ၸွမ်ၾၢႆႇၵွၼ်းသိုၵ်း ယူႊၶရဵၼ်ႊ လၢတ်ႈဝႃႈ တေထႅမ်ႁႅင်းတိုၵ်းတေႃႇ ရတ်ႉသျႃႊ ဝႃႈၼႆ။ ဝၢႆႊမၼ်းၸၢႆးပိုၼ်ၽၢဝ်ႇထႅင်ႈဝၼ်းၼိုင်ႈၵေႃႈ သိုၵ်း ရတ်ႉသျႃႊ ၸႂ်ႉၶိူင်ႈတရူၼ်ႊ ၼပ်ႉႁူဝ်ပၢၵ်ႇလမ်းသေ ယိုဝ်းတိုၵ်းသႂ်ႇ ဝဵင်းလူင် ၶေႊယပ်ႊၾ်။

မိူင်း ရတ်ႉသျႃႊ တင်း ယူႊၶရဵၼ်ႊၼႆႉ မီးလွင်ႈၶဵင်ႈၶႅင်ၵၼ်မႃးႁၢဝ်ႈႁႅင်းယဝ်ႉၵမ်းၼိုင်ႈ မိူဝ်ႈႁူဝ်ပီ 2014 ။ ထိုင်မႃးၼႂ်းပီ 2022 လိူၼ်ၾႅပ်ႉပိဝ်ႊရီႊ ဝၼ်းတီႈ 24 ၼႆႉ မိူင်း ရတ်ႉသျႃႊ ၸႂ်ႉၶိူင်ႈၵွင်ႈလူင်သေ တႄႇယိုဝ်းတိုၵ်းသႂ်ႇ မိူင်းယူႊၶရဵၼ်ႊႁၢဝ်ႈႁႅင်း။ ပၢင်တိုၵ်းႁိုင်မႃးၶၢဝ်းတၢင်း 3 ပီပၢႆယဝ်ႉသေတႃႉ တေႃႇထိုင်ယၢမ်းလဵဝ် တိုၵ်ႉၶဵင်ႈၶႅင်ၵၼ်ဝႆႉ။

ၾၢႆႇၼိုင်ႈသမ်ႉ တီႈပၢင်တိုၵ်း မိူင်းဢိတ်ႊၸရေႊ တင်း ဢီႊရၢၼ်ႊ ၼၼ်ႉ မိူင်းဢမေႊရိၵၼ်ႊ ၶဝ်ႈပႃးယိုဝ်းတိုၵ်းၸွမ်းလႄႈ ႁဵတ်းႁႂ်ႈ ႁူဝ်ၼႃႈၸိုင်ႈမိူင်းလၢႆလၢႆမိူင်း မႆႈၸႂ်ၼိူဝ်ၵၢၼ်တိုၵ်း ဢၼ်ပဵၼ်ယူႇၼိူဝ်လုမ်ႈၾႃႉ။ ဢွၼ်ၵၼ်လၢမ်းၶၢတ်ႈဝႃႈ တေပဵၼ်သိုၵ်းလုမ်ႈၾႃႉၵမ်းထူၼ်ႈ 3 တႄႉယဝ်ႉႁိုဝ်ၼႆၵေႃႈမီး။

ငဝ်ႈၶၢဝ်ႇ- AFP