ဝၼ်းတီႈ 21/06/2025 ၼႆႉ သိုၵ်းမၢၼ်ႈ ယိုတ်းမိူင်း တေႃႉဢဝ်ႁႅင်းၵူၼ်းသိုၵ်းၸမ်ႁူဝ်ႁဵင်ၵေႃႉလႄႈ ႁႅင်းၶိူင်ႈၵွင်ႈလူင် လၢႆလၢႆသႅၼ်း ၶဝ်ႈၵႂႃႇဢဝ်ဢွင်ႈတီႈ တင်ႈဝႆႉၶိုၼ်းၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ဝၼ်းၼၼ်ႉ သၢႆၵႃးသိုၵ်းမၢၼ်ႈ လုၵ်ႉတၢင်းၼွၵ်ႈ ၶဝ်ႈမႃးၼႂ်းဝဵင်းမီးမွၵ်ႈ 50 လမ်း ပႃးတင်းၵူၼ်းသိုၵ်း တဵမ်ၵႃး မွၵ်ႈၼိုင်ႈႁဵင်ၵေႃႉ။ ၵွၼ်ႇသိုၵ်းမၢၼ်ႈပႆႇတေႃႉဢဝ် ၵူၼ်းသိုၵ်းလႄႈ ၶိူင်ႈၸႂ်ႉတိုဝ်းၼႂ်းပၢင်တိုၵ်း ၶဝ်ႈမႃး ၼႂ်းဝဵင်းၼႆႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ လႆႈဢုပ်ႇဢူဝ်းငူပ်ႉငီႉၵၼ်ဝႆႉဢွၼ်တၢင်းၼႆ ၵူၼ်း မိူင်းပိုၼ်ႉတီႈ ၼႂ်းဝဵင်းလႃႈသဵဝ်ႈ လၢတ်ႈၼႄၼင်ႇၼႆ။

“ဝၼ်းၼၼ်ႉ ယၢမ်းၵၢင်ၼႂ်ၸဝ်ႉ လႆႈႁၼ်ၽူႈမီးၸၼ်ႉ ၼႂ်းသိုၵ်းၵဝ်ႈၵၢင်ႉတင်း သိုၵ်းမၢၼ်ႈ ၵႂႃႇႁူပ်ႉဢုပ်ႇ ၵၼ်တီႈဝၢၼ်ႈႁူဝ်ပိုၵ်ႉၼၼ်ႉယူႇ။ ၽိူဝ်ႇဝႃႈယၢမ်းႁူဝ်ၶမ်ႈ လႆႈႁၼ်သၢႆၵႃးသိုၵ်းမၢၼ်ႈၶဝ်ႈမႃးၼႂ်းဝဵင်းယဝ်ႉ ၼႃႇ။ လႅပ်ႈၶဝ် ငူပ်ႉငီႉၵၼ်လႆႈယဝ်ႉႁႄ ၸင်ႇပိုတ်ႇပၼ်သဵၼ်ႈတၢင်းႁႂ်ႈၶဝ်ႈမႃးလႆႈၸိူင်ႉၼၼ်ႉၵူၺ်း”။

လႆႈႁူႉဝႃႈ သိုၵ်းမၢၼ်ႈ ၸိူဝ်းၶဝ်ႈမႃးထႅင်ႈ ၼႂ်းဝဵင်းလႃႈသဵဝ်ႈၼႆႉ ပဵၼ်ၾၢႆႇတပ်ႉတေႃႉသူင်ႇ၊ ၾၢႆႇၵပ်းသိုပ်ႇ တိတ်းတေႃႇ ၸိူဝ်းၼႆၵူၺ်းဢမ်ႇၵႃး လႆႈႁၼ်ၵူၼ်းသိုၵ်းၶဝ် သႂ်ႇသိူဝ်ႈၶူဝ်း ဢၼ်ပႃးမိၵ်ႈမၢႆ တပ်ႉၵႃးတႅင်ႉ ၸိူဝ်းၼႆႉ။

ဝဵင်းလႃႈသဵဝ်ႈၼႆႉ မီး 12 ပွၵ်ႉလႄႈ 75 ဢိူင်ႇသေ ႁူဝ်ၼပ်ႉၵူၼ်းမိူင်းၸိူဝ်းယူႇသဝ်း ၼႂ်းၸႄႈဝဵင်းလႃႈသဵဝ်ႈ ၼႆႉ မီးယူႇမွၵ်ႈ သၢမ်သႅၼ်ၵေႃႉပၢႆ။ ဝၢႆးလင် သိုၵ်းၵဝ်ႈၵၢင်ႉ ထွႆဢွၵ်ႇပၼ် သိုၵ်းမၢၼ်ႈ ၼႂ်းဝဵင်းတႃႇ 12 ပွၵ်ႉ  ယဝ်ႉၼၼ်ႉ သိုၵ်းမၢၼ်ႈ မီးသုၼ်ႇလႆႈၶဝ်ႈမႃးၵုမ်းၵမ်ဝႆႉ တႃႇ 12 ပွၵ်ႉၵူၺ်း။ ၼွၵ်ႈလိူဝ်တႃႇ 75 ဢိူင်ႇ ၸွမ်းသၢပ်ႇဝဵင်းလႃႈသဵဝ်ႈတႄႉ ပဵၼ်သိုၵ်းၵဝ်ႈၵၢင်ႉ MNDAA ၵုမ်းၵမ်ဝႆႉ။

တႅမ်ႈ – ၽူၺ်းၼုမ်ႇ