ၽွင်းမိူဝ်ႈသွင်ၸိုင်ႈမိူင်း မီးလွင်ႈၶဵင်ႈၶႅင်ၵၼ်ၸွမ်းလႅၼ်လိၼ်ယူႇၼႆႉ ၸွမ်ၽွင်းလူင် မိူင်းၵမ်ႇပူးၶျႃး (ၵမ်ႊပေႃႊတီႊယိူဝ်ႊ) လၢတ်ႈၵႂႃႇ မိူဝ်ႈဝၼ်းတီႈ 23/06/2025 ၼႆႉဝႃႈ တေၵိုတ်းလိုဝ်ႈပႅတ်ႈ ၵၢၼ်တေႃႉတၢင်ႇၼမ်ႉမၼ်းၸိူဝ်ႉၾႆးလႄႈ ႁႅင်းထၢတ်ႈသၽႃႇဝ တၢင်းမိူင်းထႆးတင်းမူတ်းယဝ်ႉ ဝႃႈၼႆ။
ယွၼ်ႉသွင်ၸိုင်ႈမိူင်း ထဵင်မေႃးၵၼ်လွင်ႈပိုၼ်ႉတီႈသေ ၵူၼ်းသိုၵ်း မိူင်းၵမ်ႇပူးၶျႃး လူႉတၢႆ 1 ၵေႃႉ၊ ဝၢႆးလင်ၼၼ်ႉ လွင်ႈၶဵင်ႈၶႅင် ၼႂ်းၵႄႈၵၢင်သွင်ၸိုင်ႈမိူင်း တိူဝ်းၶိုၼ်ႈသုင်မႃး။
ၸွမ်ၽွင်းလူင် မိူင်းၵမ်ႇပူးၶျႃး လၢတ်ႈဝႃႈ – ၼမ်ႉမၼ်းၸိူဝ်ႉၾႆးလႄႈ ႁႅင်းထၢတ်ႈသၽႃႇဝ ဢၼ်ၼႂ်းမိူင်းလူဝ်ႇဝႆႉၼၼ်ႉ ယူႇတီႈၶွမ်ႊပၼီႊ ႁႅင်းထၢတ်ႈ မိူင်းၵမ်ႇပူးၶျႃး ၸၢင်ႈသိုဝ်ႉတၢင်ႇတီႈမႃးလႆႈ တဵမ်ထူၼ်ႈယူႇ – ဝႃႈၼႆ။
ပိူဝ်ႈတႃႇလွင်ႈႁူမ်ႇလူမ်ႈၼႆသေ မိူင်းထႆး မီးလွင်ႈႁႅတ်ႉႁၢမ်ႈၸွမ်းၵဵတ်ႉ/လၢၼ်ႇ တိတ်းၸပ်းၵၼ် တင်း မိူင်းၵမ်ႇပူးၶျႃး တင်းၼမ်။ တႃႇပဵၼ်ၵၢၼ်တုမ်ႉတွပ်ႇၶိုၼ်းၼႆသေ မိူဝ်းဝၼ်းတီႈ 22/06/2025 ၼႆႉ ၾင်ႇမိူင်းၵမ်ႇပူးၶျႃးၵေႃႈ ပိၵ်ႉဢိုတ်းပႅတ်ႈ ၵဵတ်ႉလၢၼ်ႇၶၢမ်ႈလႅၼ်လိၼ် 2 တီႈ။
ႁွင်ႈၵၢၼ် ၽွင်းလူင်ၾၢႆႇၼွၵ်ႈမိူင်း မိူင်းၵမ်ႇပူးၶျႃး တိုၵ်းသူၼ်းပၼ်ၾၢင်ႉထိုင်ၵူၼ်းမိူင်းၶဝ်ဝႆႉဝႃႈ သင်ဢမ်ႇလူဝ်ႇၸိုင် ယႃႇပေဢွၵ်ႇၶၢဝ်းတၢင်းၵႂႃႇၼႂ်းမိူင်းထႆး ဝႃႈၼႆ။
မိူၼ်ၼႆ လုမ်းၽွင်းတၢင်ထႆးၵေႃႈ ပၼ်ၾၢင်ႉၵူၼ်းမိူင်းထႆး ၸိူဝ်းမီးဝႆႉတီႈမိူင်းၵမ်ႇပူးၶျႃးၼၼ်ႉဝႃႈ ယႃႇပေဢွၼ်ၵၼ်ဢွၵ်ႇၼႄၵၢင်ၸႂ် ၼႆယဝ်ႉ။
ၾၢႆႇၼိုင်ႈၵေႃႈ ဝၢႆးသေမီးၶလိပ်ႉသဵင် ၸွမ်ၽွင်းလူင်မိူင်းထႆး ၽႄႊထွင်ႊထၢၼ်ႊ သျိၼ်ႊၼဝပ်ႊ ဢုပ်ႇၵုမ်ၵၼ်တင်း ၸွမ်ၽွင်းလူင်မိူင်းၵမ်ႇပူးၶျႃးၼၼ်ႉ ၽႄႈဢွၵ်ႇမႃးယဝ်ႉ မီးလွင်ႈတုၵ်းယွၼ်း ႁႂ်ႈၸွမ်ၽွင်းလူင်မိူင်းထႆး ထွၼ်တူဝ်ဢွၵ်ႇတၼ်းႁဵင်း၊ ႁဵတ်းႁႂ်ႈၵၢၼ်မိူင်း ၼႂ်းမိူင်းထႆး ႁူပ်ႉလွင်ႈၵပ်ႉၵိၼ်း။
ၸွမ်းၼင်ႇ ၶေႃႈမုလ်းတီႈယေးငိုၼ်းလုမ်ႈၾႃႉသေ မိူဝ်ႈပီ 2022 ၼၼ်ႉ မိူင်းထႆး ပဵၼ်မိူင်းႁူမ်ႈ ၽၢၵ်ႈၵၢၼ်ၵႃႉၶၢႆၸွမ်း မိူင်းၵမ်ႇပူးၶျႃး ယႂ်ႇလိူဝ်ပိူၼ်ႈထီႉ 3 ၊ ၵႃႈၶၼ်တေႃႉသူင်ႇၶူဝ်းၵုၼ်ႇၶဝ်ႈမိူင်းၵမ်ႇပူးၶျႃး မီးၵိုင်ႇငိုၼ်းတေႃႊလႃႊ 3.8 ပီႊလီႊယၼ်ႊ၊ ၼႂ်းၼၼ်ႉ လွင်ႈတေႃႉသူင်ႇၼမ်ႉမၼ်း ၸိူဝ်ႉၾႆး မီး 27% – သိုဝ်ႇၶၢဝ်ႇ CNA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ