ၼႂ်းၵၢၼ်လိူၼ်ၵျုၼ်ႊ ပီ 2025 ၼႆႉ ၵူၼ်းၸၢဝ်းၶႄႇ ၸိူဝ်းႁဵတ်းၵၢၼ်ၵျႃးၽႅၼ်ႉ လွၵ်ႇလႅၼ်ၵိၼ်ငိုၼ်းၼိူဝ် ဢွၼ်ႊလၢႆႊလႄႈ ႁဵတ်းၵၢၼ်ၼႂ်းႁူင်းပၢင်တေႃႇလွင်း ၼႂ်းၸႄႈဝဵင်းမူႇၸေႊ ၺႃးၸုမ်းယိပ်းၵွင်ႈလမ်းၺွပ်းသေ ယိုဝ်းတၢႆၸွမ်းၵၢင်တၢင်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ၼႂ်းၸႄႈဝဵင်းမူႇၸေႊၼႆႉ မီးဢွင်ႈတီႈႁဵတ်းၵၢၼ်ၵျႃးၽႅၼ်ႉ လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆး၊ ႁူင်းပၢင်တေႃႇလွင်း၊ ႁူင်းပျေႃႇမူၼ်ႈ ဢၼ်ၸႂ်ႉတိုဝ်းလႆႈပႃးယႃႈမဝ်းၵမ် ၸိူဝ်းၼႆႉ ၼမ်လိူင်ႇႁႅင်းမႃးလိူဝ်ၵဝ်ႇလႄႈ ၵူၼ်းမိူင်းၼႂ်းပိုၼ်ႉတီႈ ဝဵင်းမူႇၸေႊ ၵူၼ်းၸၢႆးဢႃယု 40 ပၢႆ ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၵွပ်ႈလူၺ်ႈၵျႃးၽႅၼ်ႉ ၶဝ်ႈႁဵတ်းၵၢၼ် ႁူၺ်းၵူၼ်း ဢမ်ႇပဵၼ်လႆႈ ဢမ်ႇႁူၺ်းလႆႈယဝ်ႉႁႄ သမ်ႉၺႃး ၵူၼ်းၸိူဝ်းပႂ်ႉယၢမ်း (ၵုမ်းၵမ်) ၶဝ်ၼၼ်ႉ ၼိၵ်ႈၸၢၵ်ႈပေႉၵိၼ်လႄႈ ဢမ်ႇၶၢမ်ႇလႆႈသေ ၸင်ႇလႅၼ်ႈဢွၵ်ႇ ပၢႆႈမႃး တၢင်းၼွၵ်ႈ။ ယွၼ်ႉၼၼ် ၶဝ်ၸိူဝ်းၼၼ်ႉ ၸင်ႇလမ်းၺွပ်းလမ်းယိုဝ်း။ ၵေႃႉဢၼ်ၽႅၼ်ယူႇ ၼိူဝ်ႁူဝ်ႉလဵၵ်းၼၼ်ႉတႄႉ ၺႃးမၢၵ်ႇၵွင်ႈဝႆႉသေ တၢႆႁိုဝ်လိပ်းႁိုဝ်ဢမ်ႇႁူႉယဝ်ႉ။ ၽႂ်ၵေႃႈဢမ်ႇႁတ်းၵႂႃႇၸမ်”။

လႆႈႁူႉဝႃႈ ၸုမ်းၸိူဝ်းဢၼ်ဢဝ်ႁူမ်ႇလူမ်ႈပၼ် ၵူၼ်းႁဵတ်းၵျႃးၽႅၼ်ႉၼႆႉ ပဵၼ်ၸုမ်းသိုၵ်းပျီႇတူႉၸိတ်ႉ။ ယၢမ်းလဵဝ် ၼႂ်းဝဵင်းမူႇၸေႊၼႆႉ ႁူင်းႁဵတ်းၵၢၼ်ၵျႃးၽႅၼ်ႉၼႆႉ မီးၵႂႃႇၼပ်ႉႁူဝ်ပၢၵ်ႇဢွင်ႈတီႈမၼ်းယဝ်ႉၼႆ ၵူၼ်းၸၢႆးဢႃယု 40 ပၢႆ ၵေႃႉယူႇၼႂ်းဝဵင်းမူႇၸေႊ လၢတ်ႈၼႄၼင်ႇၼႆ။

“ၵျႃးၽႅၼ်ႇတီႈမူႇၸေႊၼႆႉ မိူဝ်ႈဢွၼ်တၢင်း ဢွင်ႈတီႈမၼ်းမီးမွၵ်ႈ 30 ၸုမ်းသေ ၵူၼ်းႁဵတ်းၵၢၼ် ၼိုင်ႈ ၸုမ်း ၼိုင်ႈတီႈၼႆႉ မီးမွၵ်ႈ 2,000 ၵေႃႉ ၸိူဝ်းၼႆႉ။ ယၢမ်းလဵဝ်သမ်ႉ ယွၼ်ႉသိုၵ်းမၢၼ်ႈၵေႃႈ ၵမ်းၵမ်း လမ်း ၺွပ်းဢဝ်ႁၢင်ႈဢဝ်ၾၢင်မၼ်းတိၵ်းတိၵ်းလႄႈ ၸုမ်းၸိူဝ်းၼႆႉ ၸင်ႇၸႅၵ်ႇၵူၼ်းၵၼ်ႁႄ ၵမ်းၵမ်းလၢႆႈဢွင်ႈ တီႈမၼ်း။ တင်းမူတ်းၼႆႉ ယၢမ်းလဵဝ် တေမီးယူႇမွၵ်ႈ 100 ၸုမ်းပၢႆးၼႆႉယဝ်ႉ။ ၵူၼ်းႁဵတ်းၵၢၼ်တႄႉ ၼိုင်ႈတီႈၼႆႉ ၶဝ်ဢမ်ႇႁတ်းဝႆႉႁူဝ်ႁဵင်ၵေႃႉမၼ်းၸိူင်ႉၼင်ႇဢွၼ်တၢင်းၼၼ်ႉယဝ်ႉ။ ၼိုင်ႈတီႈၶဝ်ဝႆႉ မွၵ်ႈ 30 -50 ၵေႃႉ ၸိူဝ်းၼႆႉၵူၺ်း”။

ၸွမ်းသၢပ်ႇဝဵင်းမူႇၸေႊၼႆႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်းလၢႆလၢႆၸုမ်း တူင်ႉၼိုင်ၵႂႃႇမႃး ဢဝ်ၼႃႈတီႈ ပၵ်းတပ်ႉပၢင်သဝ်းဝႆႉသေ ၼႂ်းဝဵင်းသမ်ႉ မီးသိုၵ်းမၢၼ်ႈလႄႈ ၸုမ်းပျီႇတူႉၸိတ်ႉ ၵုမ်းၵမ်ဝႆႉ။

ပဵၵ်ႉသမ်ႉဝႃႈ ပဵၼ်ဝဵင်းဢၼ်သိုၵ်းမၢၼ်ႈတင်း ၸုမ်းသိုၵ်းၸၢဝ်းၶိူဝ်း ဢမ်ႇယိုဝ်းၵၼ် ဢမ်ႇပဵၼ်ပၢင်တိုၵ်း ၵၼ်ၼႆသေတႃႉ ယွၼ်ႉမီးၸုမ်းၵျႃးၽႅၼ်ႉ ၵူၼ်းႁဵတ်းၵိၼ်ၵၢၼ် လွၵ်ႇလႅၼ်ငိုၼ်းၼိူဝ်ဢွၼ်ႊလၢႆႊ ၼမ်ႁႅင်းလူၼ်ႉလႄႈ ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈ ဢမ်ႇလႆႈယူႇသႃႇ။ ၵႆႉမီးလွင်ႈၸူၼ်ၵၼ် ၶႃႈႁႅမ်ၵၼ်တၢႆ ယူႇတႃႇသေႇ ၼႆယဝ်ႉ။

တႅမ်ႈ – ၽူၺ်းၼုမ်ႇ