ပၢင်လိူၵ်ႈတင်ႈ ဢၼ်သိုၵ်းမၢၼ်ႈ တေၸတ်းႁဵတ်းၼႂ်းႁၢင်ပီ 2025 ဢမ်ႇၼၼ် ႁူဝ်ပီ 2026 ၼႆႉ တေဢမ်ႇႁႂ်ႈၵူၼ်းမိူင်းတႅမ်ႈလူင်းၶိတ်ႇပၼ် ပႃႇတီႇလႂ်ပႃႇတီႇၼၼ်ႉ ၼႂ်းမၢင်ၸေႈယဝ်ႉ ႁူဝ်ပဝ်ႈ ၶွမ်ႊမသျိၼ်ႊၵၢၼ်လိူၵ်ႈတင်ႈ ဢၼ်ယူႇတႂ်ႈဢႃႇၼႃႇသိုၵ်းမၢၼ်ႈၼၼ်ႉ တႅပ်းတတ်းၵႂႃႇဝႃႈ တေၸႂ်ႉတိုဝ်းၶိူင်ႈၸၢၵ်ႈ ႁႂ်ႈပဵၼ်တၢင်းၵမ်ႉယၼ်ၵႂႃႇ ၼႆယဝ်ႉ။
မိူဝ်ႈဝၼ်းတီႈ 20/06/2025 ၼၼ်ႉ ႁူဝ်ပဝ်ႈ ၶွမ်ႊမသျိၼ်ႊၵၢၼ်လိူၵ်ႈတင်ႈ တႂ်ႈဢႃႇၼႃႇသိုၵ်းမၢၼ်ႈ ဢူးၵူဝ်ႇၵူဝ်ႇ လၢတ်ႈၵႂႃႇၼႂ်းဝၼ်းပၢင်ၵုမ် ၵဵဝ်ႇၵပ်းပိူဝ်ႈတႃႇၸတ်းပၢင်လိူၵ်ႈတင်ႈ ႁႂ်ႈပေႃးဢွင်ႇမၢၼ်ၵႂႃႇ တီႈႁွင်ႈပၢင်ၵုမ် ၼႂ်းလုမ်းၶွမ်ႊမသျိၼ်ႊၵၢၼ်လိူၵ်ႈတင်ႈ (UEC) ၼၼ်ႉ ဝႆႉၼင်ႇၼႆ။
“ၼင်ႇႁိုဝ် ၵူၼ်းမိူင်းပေႃးတေပၼ်သဵင်လႆႈငၢႆႈသေ ဢမ်ႇၵိူတ်ႇပဵၼ်လွင်ႈမၢပ်ႇမႂ်ၶႅပ်းမႄးတေႃႇၵၼ်ၼၼ်ႉ ပၢင်လိူၵ်ႈတင်ႈပွၵ်ႈၼႆႉ တေၸႂ်ႉတိုဝ်းၶိူင်ႈၸၢၵ်ႈသေ ၸွႆႈၼႂ်းၵၢၼ်တွၼ်ႈၶႅပ်းၵၢင်ၸႂ်ၵႂႃႇ တင်းမိူင်းပတ်းပိုၼ်ႉ။ ယၢမ်းလဵဝ် တိုၵ်ႉႁဵတ်းဢွၵ်ႇၶိူင်ႈၸၢၵ်ႈဝႆႉ တႃႇတင်းမိူင်းပတ်းပိုၼ်ႉယူႇ။ ၼင်ႇႁိုဝ် ၶိူင်ႈၸၢၵ်ႈႁဝ်း တေဢမ်ႇၵွႆလႄႈ ဢမ်ႇမီးပၼ်ႁႃၼၼ်ႉၵေႃႈ ႁွင်ႈၵၢၼ်ၸိူဝ်းၵဵဝ်ႇၶွင်ႈၼၼ်ႉ တေလႆႈႁပ်ႉပုၼ်ႈၽွၼ်း ႁၵ်ႉသႃလုမ်းလႃးၵႂႃႇ”။
ပၢင်လိူၵ်ႈတင်ႈ ၼႂ်းလိူၼ်တီႊသႅမ်ႊပိူဝ်ႊ ႁၢင်ပီ 2025 ဢမ်ႇၼၼ် ႁူဝ်ပီ 2026 ၼႆႉ သိုၵ်းမၢၼ်ႈ တေၸတ်းႁဵတ်းၵႂႃႇပဵၼ်ၶၵ်ႉပဵၼ်တွၼ်ႈ။ တေဢမ်ႇၸတ်းႁဵတ်းတင်းမိူင်းပတ်းပိုၼ်ႉ ပွၵ်ႈလဵဝ်ၵၼ်။
လႆႈႁူႉဝႃႈ ယၢမ်းလဵဝ် ၾၢႆႇသိုၵ်းမၢၼ်ႈ ၾိုၵ်းပၼ် ၶႃႈႁၢပ်ႇၵၢၼ် ၸိူဝ်းပဵၼ်ၽူႈၶဝ်ႈၸုမ်း ၼႂ်းၶွမ်ႊမသျိၼ်ႊၵၢၼ်လိူၵ်ႈတင်ႈ၊ ၸုမ်းၶွင်ႇသီႇၼေႇပျီႇတေႃႇ၊ ၸႄႈမိူင်းလႄႈ တိူင်းၸိူဝ်းၼႆႉ ႁႂ်ႈမေႃၸႂ်ႉတိုဝ်းၶိူင်ႈၸၢၵ်ႈ တွၼ်ႈတႃႇၸႂ်ႉတိုဝ်းပၼ်သဵင် ၼႂ်းပၢင်လိူၵ်ႈတင်ႈယူႇ ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ