ဝၼ်းတီႈ 22/06/2025 ၼႆႉ သိုၵ်းမၢၼ်ႈ ယိုတ်းမိူင်းလႄႈ ႁွင်ႈၵၢၼ်ၾၢႆႇၵူတ်ႇထတ်း ၶဝ်ႈဢွၵ်ႇမိူင်း (လဝၵ) ဢိၵ်ႇပႃးၸုမ်းပလိၵ်ႈ ႁူမ်ႈၵၼ် ပႂ်ႉၵူတ်ႇထတ်းၵႃးလူင် ၸိူဝ်းတၢင်ႇၵုၼ်ႇ လုၵ်ႉတၢင်းၾင်ႇမိူင်းၶႄႇလႄႈ တိူင်းဝဵင်းလိူဝ်ႇ (မၼ်းတလေး) တီႈတႃႈရူတ်ႉၵႃး တဵင်းတၢၼ်းၶျီႇ (သိန်းသန်းချီကားကွင်း) ႁၢဝ်ႈႁႅင်းလႄႈ ၸဝ်ႈၵႃးလူင်ၸိူဝ်းတၢင်ႇၵုၼ်ႇၶဝ် ဢမ်ႇႁတ်းၶဝ်ႈဝဵင်း လႆႈၵိုတ်းဝႆႉတၢင်းၼွၵ်ႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ။
သိုၵ်းမၢၼ်ႈ ႁူမ်ႈတင်း ပလိၵ်ႈလႄႈ ၶႃႈႁၢပ်ႇၵၢၼ်ၶုၼ်လၢႆလၢႆႁွင်ႈၵၢၼ် ပႂ်ႉၵူတ်ႇထတ်း ၵႃးလူင်ၸိူဝ်းတေႃႉတၢင်ႇၵုၼ်ႇ ဢၢၼ်းၶဝ်ႈၼႂ်းဝဵင်းမူႇၸေႊၼၼ်ႉ ႁၢဝ်ႈႁႅင်းလႄႈ ႁဵတ်းႁႂ်ႈၸဝ်ႈၵုၼ်ႇၶဝ် ႁူပ်ႉပၼ်ႁႃမီးတၢင်းယၢပ်ႇၼႆ ၸဝ်ႈပၢႆးမၢၵ်ႈမီး ၵေႃႉႁဵတ်းၵၢၼ်ၵႃႉၶၢႆယူႇ ၼႂ်းဝဵင်းမူႇၸေႊၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“ၶဝ်ၵူတ်ႇထတ်း ၵုၼ်ႇၸိူဝ်းဢၼ်ၶဝ်ႈမႃးၼႂ်းမိူင်းၼႆႉ။ ၶဝ်ဢမ်ႇပၼ်ႁေႃႈၵႃးၶဝ်ႈမႃးထိုင် ၼႂ်းဝဵင်းမူႇၸေႊ။ ၶူဝ်းဢၼ် လုၵ်ႉတၢင်းဝဵင်းမၼ်းတလေးၶိုၼ်ႈမႃးၵေႃႈယဝ်ႉ၊ ဢၼ်လုၵ်ႉတၢင်းမိူင်းၶႄႇမႃးၵေႃႈယဝ်ႉ ၶဝ်တိုၼ်းဢမ်ႇပၼ်ၶဝ်ႈၼႂ်းဝဵင်း။ ၵွပ်ႈၼၼ် ႁဝ်းလႆႈဢဝ်ၵႃးဢွၼ်ႇဢွၵ်ႇၵႂႃႇတေႃႉဢဝ်ၵုၼ်ႇႁဝ်း ၶဝ်ႈမႃးၼႂ်း ဝဵင်းၵမ်းဢိတ်းဢိတ်း။ ၵႃးလူင်ၸိူဝ်း တၢင်ႇၵုၼ်ႇဢမ်ႇႁတ်းၶဝ်ႈၼႂ်းတဵင်းတၢၼ်းၶျီႇ။ ပေႃးၶဝ်ႈၵႂႃႇၵေႃႈ တေၺႃးၵူတ်ႇထတ်း”။
လႆႈႁူႉဝႃႈ ၸုမ်းပလိၵ်ႈ ၸိူဝ်းယူႇတႂ်ႈဢႃႇၼႃႇသိုၵ်းမၢၼ်ႈၼၼ်ႉၵေႃႈ ပႂ်ႉတီႈၵဵတ်ႉလၢၼ်ႇၸၢင်ႉၽိူၵ်ႇ ဝဵင်းမူႇၸေႊၼၼ်ႉသေ ၵဵပ်းငိုၼ်းၵူၼ်းၸိူဝ်းတေႃႉၵုၼ်ႇတၢင်းမိူင်းၶႄႇ ၶၢမ်ႈမႃးၾၢႆႇတၢင်းမိူင်းတႆး။ ၵူၼ်းၸိူဝ်းဢဝ်သၢမ်လေႃႉ တေႃႉၶူဝ်းၵုၼ်ႇမႃးၼၼ်ႉ ပလိၵ်ႈၶဝ် ယွၼ်းၼိုင်ႈၵေႃႉ ၼိုင်ႈပွၵ်ႈလႂ်သၢမ်ႁဵင်ပျႃး။ ၵူၼ်းၸိူဝ်းဢဝ်ရူတ်ႉၶိုင်ႈတေႃႉသမ်ႉ ၼိုင်ႈ ၵေႃႉ ၼိုင်ႈပွၵ်ႈလႂ် ၼိုင်ႈမိုၼ်ႇပျႃး ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ