တီႈဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼႆႉ ၸဝ်ႈၵၢၼ်ပၢႆးမၢၵ်ႇမီးယႂ်ႇ ႁၢၼ်ႉၶၢႆၶမ်း ၵျီးမႅတ်ႉတေႃးသူၺ်ႇမိၼ်း မိတ်ႊသတိူဝ်ႊ ဢႃးၶျၢင်ႇၼႆႉ ပဵၼ်ၵူၼ်းၵႃႉယႃႈမိုဝ်းယႂ်ႇလႄႈ ၸုမ်းၾၢႆႇၽဵဝ်ႈမူၺ်ႉယႃႈ မဝ်းၵမ်မိူင်းထႆး ပိုၼ်ၽၢဝ်ႇတီႉၺွပ်းဝႆႉ။

ၼႂ်းဝၼ်းတီႈ 18/06/2025 ၼႆႉ ၸုမ်းၾၢႆႇၽဵဝ်ႈမူၺ်ႉယႃႈမဝ်းၵမ် မိူင်းထႆး Office of the Narcotics Board – ONCB ၸတ်းႁဵတ်းပၢင်သပ်းၸႅင်ႈၶၢဝ်ႇသေလၢတ်ႈဝႃႈ ပူၼ်ႉမႃးမိူဝ်ႈဝၼ်းတီႈ 10/01/2025 ၼၼ်ႉ ၸဝ်ႈၼႃႈတီႈထႆးၵူတ်ႇထတ်းတီႉၺွပ်းလႆႈ ၵူၼ်းဢၼ်ထၢင်ႇထိူမ် 8 ၵေႃႉ၊ မဵတ်ႉယႃႈ မႅတ်ႊတႃႊၾႅတ်ႊတမိၼ်း မွၵ်ႈ 3 လၢၼ်ႉမဵတ်ႉ တီႈဝဵင်းလူင်ၵုင်းထဵပ်ႈ။ ဝၢႆးၵူတ်ႇထတ်းၸိူဝ်းၶဝ်ယဝ်ႉ လႆႈႁူႉမႃးဝႃႈ ၵူၼ်းၵုမ်းၵၢၼ်ၵႃႉၶၢႆယႃႈမဝ်းၵမ်လပ်ႉလပ်ႉၼႆႉ ပဵၼ်ၸဝ်ႈၵၢၼ်ပၢႆးမၢၵ်ႈမီးယႂ်ႇ တီႈဝဵင်းတႃႈၶီႈလဵၵ်း မိတ်ႊသတိူဝ်ႊ ဢႃးၶျၢင်ႇ ဝႃႈ ၼႆ။  

ယၢမ်းလဵဝ် တီႈၸႄႈတွၼ်ႈၵဵင်းႁၢႆး ဢၼ်မိတ်ႊသတိူဝ်ႊ ဢႃးၶျၢင်ႇ မီးဝႆႉႁိူၼ်းယေး 2 လင်၊ လွၵ်းလိၼ် 2 လွၵ်း၊ ရူတ်ႉၵႃးလႄႈ ဢွမ်မူင်းၼိုင်ႈလုၵ်ႈ ဢၼ်ၵိုင်ႇငိုၼ်းထႆး 15 လၢၼ်ႉပၢႆၼႆႉ ၾၢႆႇပလိၵ်ႈမိူင်းထႆး ယိုတ်းဢဝ်ဝႆႉမူတ်းယဝ်ႉ။  

မိတ်ႊသတိူဝ်ႊ ဢႃးၶျၢင်ႇၼႆႉ ပဵၼ်ၸဝ်ႈၵၢၼ်ပၢႆးမၢၵ်ႈမီးပိုတ်ႇႁၢၼ်ႉၶမ်းယဝ်ႉ ၵႃႉၶၢႆယႃႈမဝ်းၵမ် ၼႂ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇလႄႈ ၼႂ်းၸႄႈတွၼ်ႈၵဵင်းႁၢႆး မိူၼ်ၼင်ႇ တင်းဝဵင်းမႄႈသၢႆ ၸိူဝ်းၼၼ်ႉသေ လၵ်ႉသူင်ႇယႃႈမဝ်းၵမ် ၶၢႆၸူးၼႂ်းမိူင်းထႆးၸွတ်ႇတူဝ်ႈလၢႆတီႈၼႂ်းၸိုင်ႈမိူင်း ပဵၼ်ၵူၼ်းၵႃႉယႃႈမိုဝ်းယႂ်ႇၵေႃႉၼိုင်ႈ ၼႆယဝ်ႉ။

ၾၢႆႇလုမ်းတြႃး ၸႄႈတွၼ်ႈၵဵင်းႁၢႆး မိူင်းထႆး ထူပ်းႁၼ်လၵ်းထၢၼ် ဢၼ်ၵိုၵ်းၸွမ်း မိတ်ႊသတိူဝ်ႊ ဢႃးၶျၢင်ႇလႄႈ ၼႂ်းဝၼ်းတီႈ 30/05/2025 ပူၼ်ႉမႃးၼႆႉ ၾၢႆႇပလိၵ်ႈမိူင်းထႆး ပိုၼ် ၽၢဝ်ႇတေတီႉၺွပ်း တူဝ်မၼ်းၸၢႆးဝႆႉ ၼႆယဝ်ႉ။

ဢၼ်ၾၢႆႇပလိၵ်ႈထႆး ၶႂ်ႈတီႉၺွပ်းတူဝ်ဢႃးၶျၢင်ႇၼႆႉ ယၢမ်းလဵဝ်မီးဝႆႉၼႂ်းၸႄႈဝဵင်းတႃႈၶီႈလဵၵ်းသေ ပၢႆႈမူၵ်းဝႆႉလႄႈ တေငူပ်ႉငီႉၵၼ်တင်း ၾၢႆႇပလိၵ်ႈမၢၼ်ႈသေ တေၸတ်းၵၢၼ်ၵႂႃႇထႅင်ႈၼႆ ၼႂ်းသိုဝ်ႇၶၢဝ်ႇထႆးတႄႉ ပိုၼ်ၽၢဝ်ႇဝႆႉၼင်ႇၼႆ။