ၵူၼ်းမိူင်းပၼ်ႇ 2 ၵေႃႉ ၺႃးသိုၵ်းမၢၼ်ႈ ၸီႉၼႄးပဵၼ်ၵူၼ်းသိုၵ်း RCSS သေ ထဵတ်ႈထၢမ်တေႃႇမိူင်းလႅင်း လုင်းၵၢင်ႉ ၵႂႃႇႁပ်ႉႁွင်းဢဝ်လႄႈ ၸင်ႇပွႆႇပၼ်ၶိုၼ်း ဝႃႈၼႆ။
ဝၼ်းတီႈ 03/08/2018 ယၢမ်းၵၢင်ဝၼ်း သိုၵ်းမၢၼ်ႈ တပ်ႉၶလယ 296 ဢၼ်ဢွင်ႇၼႅင်ႇဝုၼ်း ၽူႈၵွၼ်းတပ့်ၵွင် ဢွၼ်ႁူဝ် ဢဵၼ်ႁႅင်းသိုၵ်း ႁိမ်း 40 ၵေႃႉ ၵႂႃႇတၢင်းဝၢၼ်ႈ ၼွင်လူမ်ႇ ဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ၵူတ်ႇထတ်း ထူပ်းႁၼ် ၸၢၵ်ႈလၢတ်ႈတီႈၵူၼ်းမိူင်း 2 ၵေႃႉ ၸီႉၼႄးဝႃႈ ပဵၼ်သိုၵ်းတႆးၼႆသေ ဢဝ်ထူင်ယၢင်လမ်သုပ်းႁူဝ် ၺွပ်းၵႂႃႇ ထဵတ်ႈထၢမ်တေႃႇမိူင်းလႅင်း ဝႃႈၼႆ။
ၵူၼ်းမိူင်းပၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူင်းႁဝ်းၼႆႉ လၢႆးၾူၼ်းဢမ်ႇပေႃးလီလႄႈ ပိူၼ်ႈသူင်ႇၵၼ် ၸႂ်ႉၸၢၵ်ႈလၢတ်ႈဢေႃႈ ၶဝ်သမ်ႉၼႄးၵူၼ်းဝၢၼ်ႈ 2 ၵေႃႉ ပဵၼ်ၵူၼ်း RCSS သေတီႉၺွပ်း။ ၶဝ်ၺႃး တီႉၵႂႃႇၼၼ်ႉ ယၢမ်းၵၢင်ဝၼ်း တင်းၶိုၼ်း ထိုင်မႃးမိူင်းလႅင်း ထႅင်ႈဝၼ်းၼိုင်ႈ လုင်းႁဵင် ၸင်ႇၵႂႃႇ ႁူပ်ႉၽူႈၼမ်းသိုၵ်းမၢၼ်ႈ ႁပ်ႉႁွင်းဢဝ်လႄႈ ၸင်ႇပွႆႇဢွၵ်ႇမႃးၶိုၼ်း။ လိူဝ်ၼၼ်ႉတႄႉ ဢမ်ႇလႆႈႁၼ် လွင်ႇမၢတ်ႇၸဵပ်းသင် လႆႈႁူႉဝႃႈ သိုၵ်းမၢၼ်ႈ ဢဝ်ထူင်ယၢင်သုပ်းႁူဝ်သေ ထဵတ်ႈထၢမ်။ လွင်ႈၼႆႉ တေၺႃးယူႇၵႂႃႈလွင်ႈထုပ်ႉပေႃႉဢိတ်းဢွတ်းတႄႉ” ဝႃႈၼႆ။
ၵူၼ်းမိူင်း 2 ၵေႃႉ ဢၼ်ၺႃးသိုၵ်းမၢၼ်ႈ တီႉၺွပ်း ပဵၼ်ၸၢႆးၸိၵ်ႉတ ဢႃယု 20 ပီပၢႆလႄႈ ၸၢႆးၸိင်ႇၼ ဢႃယု 40 ပီပၢႆ။ ပဵၼ်ၵူၼ်းဝၢၼ်ႈၼွင်လူမ်ႇ ဢၼ်ယူႇၾၢႆႇၸၢၼ်း ဝဵင်းမိူင်းပၼ်ႇ မွၵ်ႈ 16 လၵ်းပၢႆ ဝႃႈၼႆ။
သိုၵ်းမၢၼ်ႈ တပ်ႉၶလယ 296 ၼႆႉ ငဝ်ႈတပ်ႉပၵ်းတပ်ႉဝႆႉတီႈ တႃႈၵေႃႈ – ၵုၼ်ႁဵင် ၾၢႆႇတႂ်ႈၵုမ်းၵမ် တိူင်းသိုၵ်း ဝၼ်း ဢွၵ်ႇၵၢင် (ယလၶ) ၶူဝ်လမ် ၸိုင်ႈတႆးပွတ်းၸၢၼ်း ဝႃႈၼႆ။
