တႄႇႁၢင်လိူၼ်ၵျႃၼ်ႊၼႆႉမႃး ၵူၼ်းပၢႆႈၽေးသိုၵ်း ဝၢၼ်ႈသွင်းပျွင်း ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ဢွၼ်ၵၼ်ပွၵ်ႈၶိုၼ်းႁိူၼ်းယေးယဝ်ႉသေတႃႉ ယွၼ်ႉလႆႈငိၼ်းသဵင်ၵွင်ႈတႅၵ်ႇထႅင်ႈလႄႈ ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈ ဝႃႈၼႆ။
သဵင်ၵွင်ႈသဵင်မၢၵ်ႇ ဢၼ်ၵူၼ်းဝၢၼ်ႈသွင်းပျွင်း လႆႈငိၼ်းယူႇၼၼ်ႉ လုၵ်ႉမႃးတၢင်းဝၢၼ်ႈတွင်ႇမႄးတိၼ်းလႄႈ ဝၢၼ်ႈၼမ်ႉၼဵင်ႈ ၼႂ်းၶၢဝ်းတၢင်း 2-3 ဝၼ်းၼႆႉ ပျီႇတူႉၸိတ်ႉပဢူဝ်းတင်း ၸုမ်းၵႅတ်ႇၶႄႇၵူၼ်းမိူင်း PDF ပဵၼ်ပၢင်တိုၵ်းၵၼ် ၼႆယဝ်ႉ။
ၵူၼ်းပိုၼ်ႉတီႈဝဵင်းပၢင်လွင်း ၵူၼ်းၸၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈဝၢၼ်ႈသွင်းပျွင်းၼႆႉတႄႉ ယဵၼ်ဝႆႉယဝ်ႉ ၵူၼ်းပၢႆႈၽေးသိုၵ်းဢၼ်ပၢႆႈမႃးၸိူဝ်းၼၼ်ႉၵေႃႈ တေႃႈလဵဝ် ဢွၼ်ၵၼ်ပွၵ်ႈမိူဝ်းၵၼ် ၶိုၼ်းယဝ်ႉ ၵမ်ႈၼမ်၊ ၵူၺ်းၵႃႈ တိုၵ်ႉလႆႈမႆႈၸႂ်ဝႆႉလွင်ႈႁူမ်ႈလူမ်ႈယူႇ ၾၢႆႇတၢင်းတူၵ်းဝၢၼ်ႈသွင်းပျွင်း တၢင်း ဝၢၼ်ႈၼမ်ႉၼဵင်ႈ၊ တွင်ႇမႄးတိၼ်း ၸိူဝ်းၼႆႉၵေႃႈ ပၢင်တိုၵ်းတႄႉ တိုၵ်ႉသိုပ်ႇပဵၼ်ဝႆႉယူႇ”- ဝႃႈၼႆ။
ဝၢၼ်ႈတွင်ႇမႄးတိၼ်းၼႆႉ ယၢၼ်ၵႆၵၼ်တင်းဝၢၼ်ႈသွင်းပျွင်းမွၵ်ႈ 5 လၵ်း။ ယွၼ်ႉၼၼ် ႁဵတ်းႁႂ်ႈၵူၼ်း ပိုၼ်ႉတီႈမႆႈၸႂ်လွင်ႈႁူမ်ႇလူမ်ႈ ဢမ်ႇႁတ်းၵႂႃႇမႃးႁဵတ်းၵၢၼ်ႁႃၵိၼ်လဵင်ႉတွင်ႉၵၼ် ဝႃႈၼႆ။
ၼႂ်းႁၢင်လိူၼ်မေႊၼၼ်ႉ ယွၼ်ႉသိုၵ်းမၢၼ်ႈတင်း ပျီႇတူႉၸိတ်ႉပဢူဝ်း ပဵၼ်ပၢင်တိုၵ်းၵၼ်ႁၢဝ်ႈႁႅင်း ႁဵတ်း ႁႂ်ႈၵူၼ်းဝၢၼ်ႈသွင်းပျွင်း ပၢႆႈဢွၵ်ႇဝၢၼ်ႈ ႁူဝ်ၵူၼ်း 2,000 ပၢႆ ၊ လႆႈဢွၼ် ၵၼ်ပၢႆႈယူႇၸွမ်းသူၼ်ၸွမ်းႁႆႈ ႁိူၼ်းယေးပီႈၼွင်ႉၽႂ်မၼ်း ၼႂ်းဝဵင်းပၢင်လွင်း။ ယၢမ်းလဵဝ် ပၢင်တိုၵ်းယဵၼ် ၵူၼ်းဝၢၼ်ႈဢွၼ်ၵၼ်ပွၵ်ႈမိူဝ်း ၶိုၼ်းႁိူၼ်းယေးယဝ်ႉသေတႃႉ ဢမ်ႇႁတ်း ၵႂႃႇသူၼ်ႁႆႈၼႃး ႁဵတ်းၵၢၼ်ႁႃၵိၼ်လဵင်ႉတွင်ႉ။
ၵူၼ်းပၢႆႈၽေးသိုၵ်း ဝၢၼ်ႈသွင်းပျွင်း လၢတ်ႈၽူႈတွႆႇႁွၵ်ႈဝႃႈ -“ဢမ်ႇမီးလွင်ႈႁူမ်ႇလူမ်ႈၶႃႈ ပၢႆႈယူႇၸွမ်း ႁိူၼ်းပိူၼ်ႈဝၢၼ်ႈပိူၼ်ႈၵေႃႈ တႃႇႁႃၵိၼ်လဵင်ႉတွင်ႉၼႆႉ ယၢပ်ႇၸႂ်ၼႃႇ။ သူၼ် ႁႆႈၼႃးတႄႉ မီးတီႈဝၢၼ်ႈ ၵူၺ်း ယွၼ်ႉၼၼ် ဢွၼ်ၵၼ်ပွၵ်ႈမိူဝ်းၵၼ်ၶိုၼ်း၊ မၢင်ၸိူဝ်းၵေႃႈ ပွၵ်ႈမႃးဢဝ် ၶူဝ်းႁိူၼ်းယေးၵူၺ်း ၊ မၢင် ၸိူဝ်း ၶႂ်ႈပွၵ်ႈယူႇသေတႃႉၵေႃႈ ဢမ်ႇမီးႁိူၼ်းယဝ်ႉ ထုၵ်ႇၾႆးမႆႈပႅတ်ႈယဝ်ႉၶႃႈ”- ဝႃႈၼႆ။
ယၢမ်းလဵဝ် တီႈၼႂ်းဝၢၼ်ႈသွင်းပျွင်းတႄႉ ၸုမ်းပျီႇတူႉၸိတ်ႉပဢူဝ်းၶဝ် ပၵ်းတပ်ႉဝႆႉၼႂ်းဝၢၼ်ႈသေ ပၼ် ၵွင်ႈၵၢင်ႇၵူၼ်းၸၢႆး ပၢႆႈၽေးသိုၵ်းပွၵ်ႈၶိုၼ်းႁိူၼ်း ဢဝ်လွင်ႈႁူမ်ႇလူမ်ႈဝၢၼ်ႈဝႆႉ – ၵူၼ်းပိုၼ်ႉတီႈလၢတ်ႈ။
ၸုမ်းၵူၼ်းၼုမ်ႇပဢူဝ်း PYO ပိုၼ်ၽၢဝ်ႇလၢတ်ႈဝႆႉဝႃႈ ယွၼ်ႉပၢင်တိုၵ်းၼႂ်းၵႄႈ သိုၵ်းမၢၼ်ႈတင်း ပျီႇတူႉ ၸိတ်ႉပဢူဝ်းလႄႈ ၸုမ်းၵႅတ်ႇၶႄႇၵူၼ်းမိူင်း PDF တီႈထုင်ႉသွင်းပျွင်း မိူဝ်ႈလိူၼ်မေႊ ပီ 2025 ၼၼ်ႉသေ ၾၢႆႇသိုၵ်းမၢၼ်ႈ ဢဝ်ၵွင်ႈလူင်ယိုဝ်းသႂ်ႇ 300 ၵမ်း၊ ယဝ်ႉၵေႃႈ ဢဝ်ၶိူင်ႈမိၼ်ယိုဝ်းၸွႆႈထႅင်ႈ 25 ၵမ်း ။ ႁဵတ်းႁႂ်းႁူင်းႁဵၼ်း ၊ ႁူင်းယႃလႄႈ ႁိူၼ်းယေး ၵူၼ်းမိူင်း လူႉၵွႆ 285 လင် ဝႃႈၼႆ။
တႄႇဢဝ်ၵၢင်လိူၼ်ၵျုၼ်ႊ ပီ 2024 ၼၼ်ႉမႃး ၾၢႆႇသိုၵ်းမၢၼ်ႈထႅမ်ႁႅင်း ၵႂႃႇတၢင်းဝဵင်းၾၢႆၶုၼ် ၽွင်းႁွတ်ႈထိုင်တီႈဝၢၼ်ႈသွင်းပျွင်း ဢၼ်ယၢၼ်ၵႆၵၼ် တၢင်းဝဵင်းၾၢႆၶုၼ်မွၵ်ႈ 11 လၵ်းၼၼ်ႉ ၺႃးၸုမ်းလုၵ်ႉၽိုၼ်ႉၶဝ် ႁႅၼ်းသိုၵ်းလေႃႇတိုၵ်းလႄႈ သွင်ၾၢႆႇပဵၼ်ပၢင်တိုၵ်းၵၼ်မႃးႁၢဝ်ႈႁႅင်း။ ၵူၼ်းဝၢၼ်ႈသွင်းပျွင်း လႆႈပၢႆႈၽေးသိုၵ်းမႃးယဝ်ႉ ပွၵ်ႈၼိုင်ႈ၊ ထိုင်မႃး ၼႂ်းႁၢင်လိူၼ်မေႊၼႆႉ ပၢင်တိုၵ်းပဵၼ်ႁၢဝ်ႈႁႅင်းၶိုၼ်းထႅင်ႈ ပွၵ်ႈၼိုင်ႈလႄႈ ၵူၼ်းပိုၼ်ႉတီႈလႆႈပၢႆႈၽေးသိုၵ်းထႅင်ႈ ပွၵ်ႈၵမ်းသွင်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ