ၼႂ်းလိူၼ်ၵျုၼ်ႊၼႆႉ ၼႂ်းဝဵင်းၼမ်ႉၶမ်း ဢၼ်ၸုမ်းသိုၵ်းၸိူဝ်ႉၸၢတ်ႈတဢၢင်း TNLA ၵုမ်းၵမ်ဝႆႉ ဝၢႆးၽႅၼ်ယၼ်ႇသိုၵ်း 1027 မႃးၼႆႉ ယၢမ်းလဵဝ် တႄႇမီးၽူႈလၵ်ႉၸၵ်ႉၶုတ်ႈ ၼမ်လိူင်ႇမႃးၶိုၼ်းသေ ၵူၼ်းမိူင်းၼႂ်းပိုၼ်ႉတီႈ ႁဵတ်းၵၢၼ်ႁႃၵိၼ်လဵင်ႉတွင်ႉယၢပ်ႇၵိၼ်းမႃး ၵူႈမိုဝ်ႉၵူႈဝၼ်းယဝ်ႉ ဝႃႈၼႆ။

ဝၼ်းတီႈ 18/06/2025 ယၢမ်းဝၢႆးဝၼ်း 3 မူင်းပၢႆၼႆႉ ၼုမ်ႇၸၢႆး ဢႃယုမွၵ်ႈ 20 ပီ ၵူၼ်းမၢၼ်ႈဢွႆႈ ႁဵတ်းၵႅင်ႈ ၵႂႃႇသိုဝ်ႉၾူၼ်း ၼႂ်းႁၢၼ်ႉၶၢႆၾူၼ်း တီႈၼႂ်းၵၢင်ဝဵင်း ၼိူဝ်သဵၼ်ႈတၢင်းလူင် ပွၵ်ႉၼမ်ႉၶမ်းၽွင် ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ မၼ်းၸၢႆး ၸၵ်ႉၶုတ်ႈဢဝ်ၾူၼ်း လႅၼ်ႈၵႂႃႇၶီႇရူတ်ႉၶိူင်ႈသေပၢႆႈ ၵေႃႉပဵၼ်တူဝ် ၸဝ်ႈႁိူၼ်းလႄႈ ပီႈၼွင်ႉႁိမ်းႁွမ်း တၼ်းတီႉၺွပ်းဢဝ်ဝႆႉလႆႈၶိုၼ်းၼႆ – ၵူၼ်းမိူင်း ၼႂ်းဝဵင်းၼမ်ႉၶမ်း ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၸၢႆးဢွၼ်ႇ ၵေႃႉၼၼ်ႉ ႁဵတ်းၵႅင်ႈၵႂႃႇသိုဝ်ႉၾူၼ်းႁႄ ႁိမ်ၾူၼ်းႁႄလႅၼ်ႈဢွၵ်ႇမႃး ဢၢၼ်းၶီႇရူတ်ႉၶိူင်ႈပၢႆႈ။ ၸဝ်ႈႁိူၼ်း ၵႂႃႇတၢင်းၼွၵ်ႈတိုၵ်ႉပွၵ်ႈမႃး တိုၵ်ႉႁႃၽႅဝ်ႁိူၼ်းၵူၺ်း။ ႁၼ် ၸၢႆးဢွၼ်ႇၼၼ်ႉ လၵ်ႉၾူၼ်း လႅၼ်ႈ ၶိုၼ်ႈၼိူဝ်ရူတ်ႉၶိူင်ႈလႄႈ ၸင်ႇၼႅတ်ႈလႅၼ်ႈၵႂႃႇဢဝ်တိၼ်ပိတ်ႉ သႂ်ႇရူတ်ႉၶိူင်ႈမၼ်းလူမ်ႉၵႂႃႇၼၼ်ႉၼႃႇ။ ယဝ်ႉၵေႃႈ ႁႂ်ႈပလိၵ်ႈသိုၵ်းလွႆၶဝ် မႃးဢဝ်ၵႂႃႇၶင်ၶွၵ်ႈဝႆႉ တီႈႁူင်းပလိၵ်ႈၶဝ်ယဝ်ႉ”။  

ၼႂ်းဝဵင်းၼမ်ႉၶမ်းၼႆႉ ယွၼ်ႉသိုၵ်းတဢၢင်း TNLA ပၼ်ၵႃးလူင်တၢင်ႇၵုၼ်ႇ ဢၼ်တေၵႂႃႇဝဵင်းမူႇၸေႊၼၼ်ႉ လတ်းၶဝ်ႈၼႂ်းဝဵင်းၼမ်ႉၶမ်းၼမ်လူၼ်ႉႁႅင်းသေ ယၢမ်းလဵဝ် သဵၼ်ႈတၢင်းလူႉၵွႆၼမ်မႃးတႄႉတႄႉ။ သိုၵ်းတဢၢင်း TNLA ဢၼ်ပိုၼ်ၽၢဝ်ႇၼိူဝ်သိုဝ်ႇတူင်ႇဝူင်းၵူၼ်းဝႃႈ ႁဵတ်းပၼ်ၵၢၼ်ႁုၼ်ႈမုၼ်းၶိုၼ်ႈယႂ်ႇ တႃႇၵူၼ်းမိူင်းယူႇၼၼ်ႉ ယၢမ်းသဵၼ်ႈတၢင်းလူႉ ၵွႆ ၵူၼ်းမိူင်းၵႂႃႇမႃးယၢပ်ႇယူႇၼႆႉ ဢမ်ႇမူၼ်ႉမႄးပၼ်ၼႆ ၵူၼ်းမိူင်းၵေႃႉယူႇဝႆႉ ၼႂ်းဝဵင်းၼမ်ႉၶမ်းၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၶဝ်ၵူၺ်းတေႃႉတႄႉ မႄးၵုမ်း တီႈဢၼ်ၵွႆႁႅင်းႁႅင်းၼၼ်ႉၵူၺ်း။ တေႃႈလဵဝ် တီႈၼိူဝ်လွႆ 12 လၵ်းၵေႃႈ တၢင်းၵွႆဝႆႉလႄႈ ၶဝ်ၵႂႃႇမႄးဝႆႉ ရူတ်ႉၶိူင်ႈ ဢမ်ႇၸၢင်ႈၵႂႃႇမႃး တေႃႇထိုင်လိူၼ် ၼႆႉသဵင်ႈ”။

လႆႈႁူႉဝႃႈ ၼႂ်းဝဵင်းၼမ်ႉၶမ်းၼႆႉ မီးၸုမ်းႁဵတ်းၵၢၼ် လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊသေ ၾၢႆႇသိုၵ်းတဢၢင်း TNLA သမ်ႉ ဢဝ်ႁူမ်ႇလူမ်ႈပၼ်ဝႆႉၸုမ်းၸိူဝ်းၼၼ်ႉလႄႈ ၸိူဝ်းပဵၼ်ၵူၼ်းမိူင်း ဢမ်ႇမီးၽႂ်ၸၢင်ႈၶဝ်ႈၸမ်။ ယွၼ်ႉၼၼ် ပႆႇလႆႈႁူႉၸွမ်းၶေႃႈမုလ်းတႅတ်ႈတေႃးၼႆ – ၵူၼ်းပိုၼ်ႉတီႈလၢတ်ႈ။  

ယွၼ်ႉမီးၸုမ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊလႄႈ ယၢမ်းလဵဝ် ၼႂ်းဝဵင်းၼမ်ႉၶမ်းၼႆႉ ၵူၼ်းတိတ်းၸပ်းယႃႈမဝ်းၵမ်ၵေႃႈ လိူင်ႇၼမ်မႃးလိူဝ်ၵဝ်ႇသေ ၽူႈလၵ်ႉၸၵ်ႉ ၶုတ်ႈၵေႃႈ တႄႇမီးမႃး။

လိူဝ်ၼၼ်ႉ ၸုမ်းယိပ်းၵွင်ႈၵၢင်ႇၼမ်မႃးသေ ၵုမ်ႇမိုင်ႉၶိုင်ၵၢၼ်ဢုပ်ႉပိူင်ႇ ႁဵတ်းလၢႆးၽႂ်တၢင်းမၼ်းယူႇလႄႈ ႁဵတ်းႁႂ်ႈၵူၼ်းမိူင်းၵႂႃႇတႃႈပႆတၢင်းယၢပ်ႇၵိၼ်းမႃးလိူဝ်ၵဝ်ႇ။ ၵၢၼ်ၵႃႉၶၢႆၵေႃႈ ဢမ်ႇၶႅမ်ႉမိူၼ်မိူဝ်ႈဢွၼ်တၢင်းယဝ်ႉ ၵႃႈၶၼ်ၵုၼ်ႇၵေႃႈ ၶိုၼ်ႈမႃးၼမ်ႁႅင်း ဝႃႈၼႆ။

တႅမ်ႈ – ၽူၺ်းၼုမ်ႇ