ၼင်ႇႁိုဝ် တေၵႄႈလိတ်ႈလႆႈပၼ်ႁႃၵၢၼ်မိူင်း မိူင်းႁူမ်ႈတုမ် ဢၼ်ပဵၼ်ယူႇယၢမ်းလဵဝ်ၼႆႉ သင်ဢမ်ႇမီးၸုမ်း ယူႇၵႄႈၵၢင် ၸွႆႈၶပ်းၶိုင်ပၼ်ၸိုင် ပိူဝ်ႈတႃႇဢုပ်ႇဢူဝ်းၵၼ်လႆႈၼႆႉ တေဢမ်ႇငၢႆႈၼႆ ႁူဝ်ပဝ်ႈ တပ်ႉသိုၵ်းလွတ်ႈလႅဝ်းၸိူဝ်ႉ ၸၢတ်ႈပဢူဝ်း (PNLO) ၸဝ်ႈသိုၵ်းလူင် ၶုၼ်ႇဢူၵ်ႉၵႃႇ မွၵ်ႇလၢတ်ႈတီႈသိုဝ်ႇၶၢဝ်ႇဝႆႉ ၼႆယဝ်ႉ။

ပိူဝ်ႈတႃႇ တေဢုပ်ႇဢူဝ်းၵႄႈလိတ်ႈလႆႈ ပၼ်ႁႃၵၢၼ်မိူင်း ၵၢၼ်သိုၵ်း ၼႂ်းမိူင်းႁူမ်ႈတုမ်ၼႆႉ ထုၵ်ႇလီႁဵတ်းသၢင်ႈၵႂႃႇ ၸွမ်းၼင်ႇလူင်ပွင်ၸိုင်ႈ မိူင်းၶႄႇ၊ မိူင်းဢိၼ်ႊတီႊယိူဝ်ႊ၊ ဢႃႊသီႊယၼ်ႊ၊ ဢမေႊရိၵၼ်ႊလႄႈ ၸိုင်ႈမိူင်းယူႊရူပ်ႊ ၶဝ် တိုၵ်းသူၼ်းပၼ်တၢင်းႁၼ်ထိုင်ဝႆႉၼၼ်ႉၼႆ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်း ၼႂ်းမိူင်းႁူမ်ႈတုမ် ၸိူဝ်းလူင်းလၢႆးမိုဝ်း NCA ၵေႃႈ တိုၵ်းသူၼ်းဝႆႉၼင်ႇၼႆ။

ၸဝ်ႈသိုၵ်းလူင် ၶုၼ်ႇဢူၵ်ႉၵႃႇ တွပ်ႇလၢတ်ႈတီႈသိုဝ်ႇၶၢဝ်ႇဝႆႉဝႃႈ – “ပၼ်ႁႃၵၢၼ်မိူင်း မိူင်းႁူမ်ႈတုမ်ၼႆႉ ၵူၼ်းၼႂ်းမိူင်း ႁူမ်ႈတုမ်ၵူၺ်း တေၵႄႈလိတ်ႈလႆႈၼႆ လူင်ပွင်ၸိုင်ႈ လၢႆလၢႆၸိုင်ႈမိူင်းပၼ်တၢင်းႁၼ်ထိုင်ဝႆႉဝႃႈၼၼ်သေတႃႉ သင်ၵူၼ်းၼႂ်းမိူင်းႁူမ်ႈတုမ်ၼင်ႇၵၼ် ၵႄႈလိတ်ႈၵၼ်ႁင်းၵူၺ်းတႄႉ တေဢမ်ႇမီးၶေႃႈတွပ်ႇသင်ဢွၵ်ႇမႃးတႄႉတႄႉ။ ၵွပ်ႈ ၼၼ် လူဝ်ႇလႆႈမီးၸုမ်း ဢမ်ႇၼၼ် ၸိုင်ႈမိူင်း ဢၼ်ပဵၼ်မိူင်းထီႉသၢမ် ယူႇၵႄႈၵၢင်သေ ၶဝ်ႈၸွႆႈဢုပ်ႇဢူဝ်းၵႄႈ လိတ်ႈပၼ်ၵႂႃႇ။ ပေႃးၼၼ် ၸင်ႇတေလႆႈၶေႃႈတူၵ်းလူင်းၵၼ်ငၢႆႈလိူဝ်ၵဝ်ႇ”- ဝႃႈ ၼႆ။

ၵဵဝ်ႇလူၺ်ႈ တႃႇၵႄႈလိတ်ႈပၼ်ႁႃၵၢၼ်မိူင်း မိူင်းႁူမ်ႈတုမ်ၼႆႉသေ ႁူဝ်ပဝ်ႈပႃႇတီႇရၶႅင်ႇ (AFP) ၵေႃႈ တူၵ်ႇတၵ်ႉ လၢတ်ႈဝႆႉဝႃႈ -“သင်ၶႂ်ႈႁဵတ်းၵၢၼ်မႄးလီၵၼ် ပိူဝ်ႈတႃႇၸိူဝ်ႉၸၢတ်ႈတႄႉတႄႉၸိုင် ဢွၼ်တၢင်းသုတ်း တေလႆႈႁဵတ်း ယႃႇႁႂ်ႈၸုမ်းယိပ်းၵွင်ႈၵၢင်ႇ မီးပၼ်ႁႃၵၼ်၊ တွၵ်ႉတႅၵ်ႉၵၼ်၊ တုမ်ႉတိူဝ်ႉၵၼ်”- ၼႆယဝ်ႉ။

ၵူၺ်းၵႃႈ ယၢမ်းလဵဝ် ၼႂ်းမိူင်းႁူမ်ႈတုမ်ၼႆႉ သိုၵ်းမၢၼ်ႈတင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ပဵၼ်ပၼ်ႁႃၵၼ်ႁၢဝ်ႈႁႅင်း တင်းပတ်းပိုၼ်ႉၸိုင်ႈမိူင်းလႄႈ ၵူၼ်းမိူင်းမွၵ်ႈ 3 လၢၼ်ႉပၢႆ ယင်းတိုၵ်ႉလႆႈ ပၢႆႈၽေးပၢင်တိုၵ်းသိုၵ်းသိူဝ်ယူႇ။

ၾၢႆႇၼိုင်ႈၵေႃႈ ၼႂ်းၵႄႈပၼ်ႁႃၵၢၼ်မိူင်း သုၵ်ႉသၵ်ႉယုင်ႈယၢင်ႈလူင်ၼႆႉ သိုၵ်းမၢၼ်ႈ ႁၢင်ႈႁႅၼ်းၶိုင်ၸတ်းႁဵတ်း ပၢင်လိူၵ်ႈတင်ႈ ႁႂ်ႈပေႃးလႆႈၼႂ်းႁၢင်ပီ 2025 လိူၼ်တီႊသႅမ်ႊပိူဝ်ႊ ဢမ်ႇၼၼ် ႁူဝ်ပီ 2026 လိူၼ်ၵျႅၼ်ႊၼိဝ်ႊရီႊၼႆလႄႈ ၸုမ်းသိုၵ်းၸၢဝ်းၶိူဝ်းလႄႈ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ၵေႃႈ ပိုၼ်ၽၢဝ်ႇဢွၵ်ႇဝႃႈ တေၸႂ်ႉလၢႆးတၢင်း ၵူႈၾၢႆႇသေ ၸွမ်းယႃႉၵဝ်း ယႃႇႁႂ်ႈၸတ်းႁဵတ်းလႆႈပၢင်လိူၵ်ႈတင်ႈ ၼႆယဝ်ႉ။

တႅမ်ႈ – ၽူၺ်းၼုမ်ႇ