ဝၼ်းတီႈ 19/06/2025 သိုၵ်းမၢၼ်ႈ ပိုၼ်ၽၢဝ်ႇလႅၵ်ႈလၢႆႈ ပၵ်းပိူင်မၢႆမီႈ ၶွမ်ႊမသျိၼ်ႊၵၢၼ်လိူၵ်ႈတင်ႈ မိူင်းႁူမ်ႈတုမ် ပိူဝ်ႈတႃႇႁႂ်ႈၶႃႈႁၢပ်ႇၵၢၼ်ၶုၼ်ၵူႈၵေႃႉ ၶိုၼ်ႈပဵၼ်လႆႈထိုင် တၼ်းႁဵင်းႁူဝ်ပဝ်ႈ ၵၢၼ်ပိၼ်ႇလႅၵ်ႈ ပၵ်းပိူင်မၢႆမီႈပၢင်လိူၵ်ႈ တင်ႈၼႆႉ မီးၵႂႃႇၵမ်းထီႉသၢမ်ယဝ်ႉ။
ပၵ်းပိူင်မၢႆမီႈ ပၢင်လိူၵ်ႈတင်ႈမိူင်းႁူမ်ႈတုမ် ဢၼ်သိုၵ်းမၢၼ်ႈ ပိၼ်ႇလႅၵ်ႈပွၵ်ႈၼႆႉ ပဵၼ်ၼႂ်းၶၵ်ႉတွၼ်ႈ မတ်ႉတႃ 14 ၵၼ် 10 ၵိင်ႇၽႄ (ဂ) ၼၼ်ႉသေ မူၼ်ႉမႄးလႅၵ်ႈလၢႆႈဝႆႉဝႃႈ “တႃႇၶွတ်ႇၽွတ်ႈၵိင်ႇၽႄၶွမ်ႊမသျိၼ်ႊၵူႈၸၼ်ႉၸၼ်ႉၼၼ်ႉ သင်ပဵၼ်ၵူၼ်းတင်းၼမ်ယုမ်ႇယမ်ၸႂ်လႆႈလႄႈ ၼပ်ႉယမ်ၸိုင် ပဵၼ်ၶႃႈႁၢပ်ႇၵၢၼ်ၶုၼ်ၸၼ်ႉလႂ်သေဢမ်ႇဝႃႈ ဢေႇသုတ်း တေလႆႈၶဝ်ႈပႃး 3 ၵေႃႉသေ ၶွတ်ႇၽွတ်ႈၵႂႃႇ။ ၼႂ်းၼၼ်ႉ တေလႆႈလိူၵ်ႈဢဝ် ၵူၼ်းၵေႃႉဢၼ်သၢင်ႇထုၵ်ႇၼၼ်ႉ ၶိုၼ်ႈပဵၼ်ႁူဝ်ပဝ်ႈလႆႈ။ ၽူႈမီးၸၼ်ႉၸိူဝ်းၵဵဝ်ႇၶွင်ႈ တင်းၶွမ်ႊမသျိၼ်ႊၵၢၼ်လိူၵ်ႈတင်ႈၼႆႉ တေလႆႈမွပ်ႈပၼ်ၸၼ်ႉ ပဵၼ်ၽူႈၼမ်းၼႂ်းၵႂႃႇ” ဝႃႈၼႆ။
ဝၢႆးလင် သိုၵ်းမၢၼ်ႈယိုတ်းမိူင်းမႃး ၶၢဝ်းတၢင်းသီႇပီပၢႆ ၵၢၼ်ပိၼ်ႇလႅၵ်ႈလၢႆႈၾိင်ႈမိူင်း ဢၼ်ၵဵဝ်ႇတင်းၶွမ်ႊမသျိၼ်ႊ ၵၢၼ်လိူၵ်ႈတင်ႈမိူင်းႁူမ်ႈတုမ်ၼႆႉ မီးၵႂႃႇသၢမ်ပွၵ်ႈယဝ်ႉသေ မူၼ်ႉမႄးလႅၵ်ႈလၢႆႈၵႂႃႇဝႃႈ ၶႃႈႁၢပ်ႇၵၢၼ်ၶုၼ် ၸိူဝ်းမီး ၼႃႈတီႈပုၼ်ႈၽွၼ်းယူႇၼႂ်းၵိင်ႇၽႄ ၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းႁူမ်ႈတုမ်ၼၼ်ႉ မီးသုၼ်ႇလႆႈၶိုၼ်ႈပဵၼ် ႁူဝ်ပဝ်ႈ တီႈၵိင်ႇ ၽႄၶွမ်ႊမသျိၼ်ႊၵၢၼ်လိူၵ်ႈတင်ႈ မိူင်းႁူမ်ႈတုမ် ၼႆယဝ်ႉ။
ၼႂ်းမတ်ႉတႃ မိူဝ်ႈဢွၼ်တၢင်း ၽွင်းပႆႇလႅၵ်ႈလၢႆႈၼၼ်ႉ ၽူႈမီးၸၼ်ႉၸိူဝ်းၵဵဝ်ႇၶွင်ႈ တင်းၶွမ်ႊမသျိၼ်ႊၵၢၼ်လိူၵ်ႈတင်ႈၼႆႉ မီးသုၼ်ႇပဵၼ်လႆႈ ၽူႈၶဝ်ႈၸုမ်းၵူၺ်း။ ယၢမ်းလဵဝ် သိုၵ်းမၢၼ်ႈ ၶိုၼ်းလႅၵ်ႈလၢႆႈ ႁႂ်ႈမီးသုၼ်ႇပဵၼ်လႆႈ ၽူႈၼမ်းၵႂႃႇလႆႈ ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ