တႄႇဢဝ် ဝၼ်းတီႈ 18/06/2025 ၼႆႉမႃး ၾၢႆႇပလိၵ်ႈၵုမ်းရူတ်ႉၵႃး တီႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ တႄႇတီႉၺွပ်းရူတ်ႉၵႃး ဢမ်ႇမီးဝႂ်လၢႆႊသိၼ်ႊလႄႈ ၵူၼ်းမိူင်းၸိူဝ်းမီးလုၵ်ႈလၢင်းၶိုၼ်ႈႁဵၼ်း၊ ၸိူဝ်းႁႃ ၵိၼ်လဵင်ႉတွင်ႉၵႃႉၶၢႆၶဝ် ဢွၼ်ၵၼ်ထူပ်းတၢင်းယၢပ်ႇႁႅင်း တႃႇလွင်ႈၵႂႃႇမႃး ၼႆယဝ်ႉ။

ၵူၼ်းမိူင်းပိုၼ်ႉတီႈ ဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇ လႆႈႁၼ်လိၵ်ႈဝႆႉတႄႉ ဝၼ်းတီႈ 18 တင်း ဝၼ်းတီႈ 21 ၼႆႉ ၶဝ်တေၺွပ်းၼႆ လႆႈႁၼ်လိၵ်ႈတႅမ်ႈဝႆႉၸိူင်ႉၼၼ်။ လွင်ႈတၢင်း ဢၼ်ၶဝ်လႆႈတီႉၺွပ်းရူတ်ႉၵႃး ဢၼ်ဢမ်ႇမီးဝႂ်ၼႆႉ ၶဝ်ဢမ်ႇလၢတ်ႈသင်ဝႆႉ။ ၶဝ်တေပႂ်ႉတီႈၵၢင်ဝဵင်း လႆႈႁူႉဝႃႈ ၶဝ်တီႉၺွပ်းလႆႈၼမ်ဝႆႉ။ တီႈၼႂ်းႁူင်းပလိၵ်ႈၶဝ်ၵေႃႈ ရူတ်ႉၵႃးပေႃးတဵမ်လူင်ဝႆႉၼႆၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈပလိၵ်ႈသိုၵ်းမၢၼ်ႈ တီႉၺွပ်းရူတ်ႉၵႃး ဢမ်ႇမီးဝႂ်လၢႆႊသိၼ်ႊၸိူင်ႉၼႆၼႆႉ ႁဵတ်းႁႂ်ႈတုမ်ႉတိူဝ်ႉၵူၼ်းမိူင်းၵႂႃႇမႃးႁႃၵိၼ်လဵင်ႉတွင်ႉယၢပ်ႇၽိုတ်ႇႁႅင်း လၢႆၸိူဝ်ႉလၢႆပိူင်။

“တၢင်းယၢပ်ႇၽိုတ်ႇတႄႉ ၵူႈၸိူဝ်ႉၵူႈလွင်ႈ။ မိူဝ်ႈလဵဝ်သမ်ႉ ပဵၼ်ၶၢဝ်းႁိုဝ်ႉၶၢဝ်းၾူၼ် လုၵ်ႈဢွၼ်ႇ ၸိူဝ်းလူဝ်ႇၵႂႃႇၶိုၼ်ႈႁဵၼ်း ၸိူဝ်းၼၼ်ႉၵေႃႈယၢပ်ႇ ပေႃႈမႄႈဢမ်ႇၸၢင်ႈဢဝ်ရူတ်ႉၵႃး ၵႂႃႇႁပ်ႉသူင်ႇ။ ၵူၼ်းၵႃႉ ၵူၼ်းၶၢႆၶဝ်ၵေႃႈ တႃႇတေတေႃႉၵုၼ်ႇၵႃႉတၢင်းၶၢႆၸိူဝ်းၼႆႉသမ်ႉ လူဝ်ႇၸႂ်ႉရူတ်ႉၵႃးတေႃႉသူင်ႇ ၼႂ်းၵႃႈရူတ်ႉၵႃးသမ်ႉ ၵမ်ႈၼမ် ပဵၼ်ၵႃးဢၼ်ဢမ်ႇမီးဝႂ်လၢႆႊသိၼ်ႊ။ ယွၼ်ႉၼၼ် ပေႃးတေၵုမ်ႇ တီႉၺွပ်းရူတ်ႉ ၵႃးၼႆတႄႉ ၵူၼ်းမိူင်းတေထူပ်းတၢင်းယၢပ်ႇၽိုတ်ႇ ၵူႈၵေႃႉၶႃႈယဝ်ႉ”- ၵူၼ်းပိုၼ်ႉတီႈ ဝဵင်းတၢင်ႉယၢၼ်း  သိုပ်ႇလၢတ်ႈၼႄၼင်ႇၼႆ။

ၼႂ်းမိူင်းတႆးပွတ်းႁွင်ႇၼႆႉ ၼွၵ်ႈလိူဝ်သိုၵ်းမၢၼ်ႈၵူတ်ႇထတ်းတီႉၺွပ်းရူတ်ႉၵႃး ဢမ်ႇမီးဝႂ်လၢႆႊသိၼ်ႊယဝ်ႉ ၸွမ်းၼႃႈတီႈၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၵုမ်းၵမ်ၸိူဝ်းၼၼ်ႉၵေႃႈ တဵၵ်းၸႂ်ႉႁဵတ်းဝႂ်လၢႆႊသိၼ်ႊ မိူၼ် ၵၼ်။ လိူဝ်ၼၼ်ႉ ၵဵပ်းၶွၼ်ႇပႃးထႅင်ႈ ၼၼ်ႉၵေႃႈ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇမိူၼ်ၵၼ်။

“တၢင်းႁဝ်းၼႆႉ မၼ်းလႆႈသႂ်ႇၶွၼ်ႇၼမ်ဢိူဝ်ႈ။ ပေႃးဝႃႈ ၸုမ်းလႂ်ၵေႃႈၵဵပ်းငိုၼ်းၼႆ မၼ်းမႃးတိူဝ်ႉၵူၼ်းမိူင်း ၵူၺ်းဢေႃႈ။ ၸွမ်းၼႃႈတီႈၸုမ်းသိုၵ်းၸၢဝ်းၶိူဝ်းၶဝ်ၵုမ်းၵမ်ၼၼ်ႉၵေႃႈ  ၶဝ်ၸႂ်ႉႁဵတ်းလၢႆႊသိၼ်ႊထႅင်ႈ ၼင်ႇၵဝ်ႇ မိူၼ်ၼင်ႇ တၢင်းဝဵင်းသႅၼ်ဝီၸိူဝ်းၼၼ်ႉ ပေႃးဢမ်ႇႁဵတ်းၵေႃႈ ပိူၼ်ႈတီႉၺွပ်းထႅင်ႈ ပေႃးဢမ်ႇ မီးလၢႆႊသိၼ်ႊၶဝ်သမ်ႉ ၶဝ်ႈဢွၵ်ႇဢမ်ႇလႆႈၼၼ်ႉၼႃႇ”– ၵူၼ်းပိုၼ်ႉတီႈ ဝဵင်းတၢင်ႉယၢၼ်း ၽူႈၸၢႆး ၵေႃႉၼိုင်ႈ လၢတ်ႈၼႄၼင်ႇၼႆ။

ၼႂ်းၸႄႈဝဵင်းတၢင်ႉယၢၼ်းၼႆႉ ၼွၵ်ႈလိူဝ်ၸုမ်းသိုၵ်းမၢၼ်ႈ တူင်ႉၼိုင်ယဝ်ႉ မီးသိုၵ်း SSPP ၊ သိုၵ်းဝႃႉ  UWSA လႄႈ ၸုမ်းပျီႇတူႉၸိတ်ႉ ၸိူဝ်းၼႆႉထႅင်ႈ။ တႄႇဢဝ်မိူဝ်ႈလိူၼ်ၵျူႊလၢႆႊ ပီ 2024 ၼၼ်ႉမႃး ၸုမ်းသိုၵ်းဝႃႉ UWSA ၶဝ်ႈမႃးယိုတ်းၵုမ်း ၸွမ်းပိုၼ်ႉတီႈ။ ၵူၺ်းၵႃႈ ၾၢႆႇသိုၵ်းမၢၼ်ႈၵေႃႈ တိုၵ်ႉၸတ်း ၵၢၼ်ၾၢႆႇၽွင်းငမ်းၼႂ်းဝဵင်းဝႆႉယူႇ တေႃႇထိုင်ဝၼ်းမိူဝ်ႈၼႆႉ။