မိူဝ်ႈၼႆႉ ဝၼ်းတီႈ 19/06/2025 ယၢမ်းၵၢင်ၼႂ် ၵၢင်ႉၵႄႇလႄႈ ႁွင်ႈၵၢၼ် ၾၢႆႇၽွင်းငမ်းၵူႈလွင်ႈလွင်ႈ တႂ်ႈသိုၵ်းမၢၼ်ႈ သူင်ႇလိၵ်ႈၸူး ၵူၼ်းမိူင်းၼႂ်းပွၵ်ႉ 3 ဝဵင်းပၢင်လူင် ၸိုင်ႈတႆးပွတ်း ၸၢၼ်း ႁွင်ႉၸူၵ်းမႄး တႃႇႁၢပ်ႇၵၢၼ်သိုၵ်း ဝႃႈၼႆ။
ၼႂ်းလိၵ်ႈၼၼ်ႉပႃးဝႆႉဝႃႈ ပေႃးထိုင်မႃး ဝၼ်းတီႈ 22/06/2025 ယၢမ်းၵၢင်ၼႂ် 9 မူင်း ၵူၼ်းၼႂ်းပွၵ်ႉဢၼ် ၶဝ်ႈတၢင်းတိုဝ်းတႃႇႁၢပ်ႇထၢမ်းၵၢၼ်သိုၵ်း တေလႆႈၶဝ်ႈႁူမ်ႈၼႂ်းပၢင်ၵုမ်ၵူႈ ၵေႃႉ တီႈႁူင်းႁေႃးဝၢၼ်ႈၸၢင်ႈၶမ်း ဢၼ်မီးတီႈပွၵ်ႉ(3) ဝဵင်းပၢင်လူင် ဝႃႈၼႆ။
ၵူၼ်းပိုၼ်ႉတီႈ ဝဵင်းပၢင်လူင် လၢတ်ႈၽူႈတွႆႇႁွၵ်ႈဝႃႈ -“မိူဝ်ႈၼႆႉ ၵၢင်ႉၵႄႇသူင်ႇလိၵ်ႈ တႃႇၶဝ်ႈပၢင်ၵုမ် ႁၢပ်ႇၵၢၼ်သိုၵ်း ၊ ဢမ်ႇၶဝ်ႈဢမ်ႇလႆႈ ၊ ပေႃးဢမ်ႇၶဝ်ႈၵေႃႈ တေၸႂ်ႉၵူၼ်းတၢင်ႇ ၵေႃႉ ၸူၵ်းမႄးတႅၼ်းတၢင်ဢဝ်ၼႆ ၊ ပေႃးၸူၵ်းၺႃးၵေႃႈ ငိူင်ႉဝႄႈဢမ်ႇလႆႈ ၊ ပေႃးပၢႆႈၵေႃႈ ၵူဝ်ၵူၼ်းတီႈႁိူၼ်းလႆႈယၢပ်ႇၸွမ်း ဢမ်ႇၸၢင်ႈ ႁဵတ်းႁိုဝ်လူဝ်ႇပႂ်ႉတူၺ်းဝၼ်းၶိုၼ်ႈပၢင်ၵုမ် ၵူၺ်းယဝ်ႉ”- ဝႃႈၼႆ။
မိူၼ်ၼင်ႇၼႆ မိူဝ်ႈဝႃးဝၼ်းတီႈ 18/06/2025 ယၢမ်းၵၢင်ၼႂ်ၵေႃႈ ၵၢင်ႉၵႄႇၼႂ်းဝဵင်းလွႆလႅမ် ႁွင်ႉပၢင်ၵုမ် ၼႂ်းပွၵ်ႉၼႂ်းယွမ် ၸႂ်ႉၵူၼ်းႁိူၼ်းၵႂႃႇၸူၵ်းမႄးၵၼ် ပေႃးၵူၼ်းၸူၵ်းၺႃးမႄး တၵ်းတေလႆႈၵႂႃႇႁၢပ်ႇထၢမ်းၵၢၼ်သိုၵ်း ငိူင်ႉဝႄႈဢမ်ႇလႆႈ ဝႃႈၼႆ။
ၵူၼ်းပိုၼ်ႉတီႈ ဝဵင်းလွႆလႅမ် လၢတ်ႈၽူႈတွႆႇႁွၵ်ႈဝႃႈ -“ဢွၼ်တၢင်းတႄႉ ဢမ်ႇယၢမ်ႈႁွင်ႉၸိူင်ႉၼႆသေပွၵ်ႈ တေႃႈလဵဝ် ပဵၼ်ပွၵ်ႈဢွၼ်တၢင်းသုတ်းယဝ်ႉ၊ ပေႃးၵူၼ်းပွၵ်ႈမႄး (ၸူၵ်း ၺႃး) လႆႈၸိုင် ၵႂႃႇမီးတၢင်ႇတီႈ တၢင်ႇတၢင်းဢမ်ႇလႆႈ ပေႃးထိုင်ၶၢဝ်းမႃး တၵ်းတေလႆႈၵႂႃႇႁၢပ်ႇၵၢၼ်သိုၵ်းၶႃႈဝႃႇ”- ဝႃႈၼႆ။
လိူဝ်ၼၼ်ႉ တႄႇႁၢင်လိူၼ်ၵျႃၼ်ႊၼႆႉမႃး ၸုမ်းပိဝ်ႇသေႃးထီး တႂ်ႈသိုၵ်းမၢၼ်ႈ တီႈဝဵင်းယႂႃႇငၢၼ်ႇၵေႃႈ လႄႇလမ်းႁႃၵဵပ်းသဵၼ်ႈမၢႆၵူၼ်း တႃႇႁၢပ်ႇထၢမ်းၵၢၼ်သိုၵ်းသေဢမ်ႇၵႃး ယဝ်ႉၵေႃႈ ၵူၼ်းမိူင်းလႆႈသႂ်ႇ ပၼ်ငိုၼ်းတႃႇၸုမ်းပိဝ်ႇသေႃးထီး ၵူႈလိူၼ် ဝႃႈၼႆ။
ၵူၼ်းပိုၼ်ႉတီႈ ဝဵင်းယႂႃႇငၢၼ်ႇ လၢတ်ႈၽူႈတွႆႇႁွၵ်ႈဝႃႈ -“ပိဝ်ႇသေႃးထီးၶဝ်ၼႆႉယဝ်ႉ ၵႆႉႁွင်ႉသိုၵ်းမၢၼ်ႈ ၶဝ်ႈၼႂ်းဝၢၼ်ႈ၊ တေႃႈလဵဝ်ၵေႃႈၶဝ်လႄႇလမ်းႁႃၵဵပ်းၵူၼ်းတႃႇပၼ်သိုၵ်းမၢၼ်ႈ ၼႆ၊ ပႃးၽႂ်ဢၼ်ဝႃႈၼၼ်ႉတႄႉ ၶဝ်ဢမ်ႇလၢတ်ႈ ပေႃးလၢတ်ႈၵူဝ်ၵူၼ်းပၢႆႈၼႆ ပေႃးသိုၵ်းမၢၼ်ႈ မႃးၸင်ႇပၼ်ၵမ်းသိုဝ်ႈဝႃႇ၊ ၶဝ်မီးၵွင်ႈၵၢင်ႇလႄႈ ၶႂ်ႈႁဵတ်းသင်ၵေႃႈ ႁဵတ်းၵႂႃႇတိၵ်းတိၵ်း ”- ဝႃႈၼႆ။
လိူဝ်ၼၼ်ႉ ၵူၼ်းဝၢၼ်ႈၶဝ် လႆႈပၼ်ငိုၼ်း တႃႇၸုမ်းပိဝ်ႇသေႃးထီး ၵူႈလိူၼ် ၊ ၼိုင်ႈလိူၼ် 7 သႅၼ်ပျႃး၊ ၵူၼ်းဝၢၼ်ႈၼိုင်ႈႁိူၼ်းလႂ် လႆႈၽတ်ႉၽဵင်ႇၵၼ်သႂ်ႇ 2,000 ပျႃး ပၼ်ၵူႈလိူၼ် – ဝႃႈၼႆ။
မိူၼ်ၼင်ႇၼႆ တႄႇႁၢင်လိူၼ်မေႊၼႆႉမႃး ၵၢင်ႉၵႄႇၼႂ်းပွၵ်ႉလႄႈ ႁွင်ႈၵၢၼ် ၾၢႆႇၽွင်းငမ်းၵူႈလွင်ႈလွင်ႈ လႄႇလမ်းႁႃသူင်ႇလိၵ်ႈၸူး ၵူၼ်းမိူင်းၼႂ်းၸႄႈဝဵင်းလၢႆလၢႆတီႈ။ မိူၼ်ၼင်ႇ ဝဵင်းၼမ်ႉၸၢင် ၊ ဝဵင်းမိူင်းတူၼ် ၸိူဝ်းၼႆႉ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ