ၵူၼ်းဝၢၼ်ႈၽြႃးၽိူၵ်ႇ တီႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ၵႂႃႇႁဵတ်းသမၢတ်ႉၵၢတ်ႉၵၼ် လႆႈပၼ်ငိုၼ်း တီႈၵၢင်ႉၵႄႇလႄႈ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ တႂ်ႈသိုၵ်းမၢၼ်ႈၵုမ်းၵမ် ၼပ်ႉႁူဝ်မိုၼ်ႇပျႃး။
ႁွင်ႈၵၢၼ် ၾၢႆႇၽွင်းငမ်းၵူႈလွင်ႈလွင်ႈၸီႉသင် ႁႂ်ႈၵူၼ်းမိူင်းဝဵင်းသီႇသႅင် ႁဵတ်းသမၢတ်ႉၵၢတ်ႉဝႆႉ ဝႃႈၼႆသေ တႃႉ ယွၼ်ႉပဵၼ်ပၢင်တိုၵ်းသိုၵ်းသိူဝ်လႄႈ ၵူၼ်းမိူင်းသီႇသႅင်ႇ လႆႈငိူင်ႉပၢႆႈၽေးသိုၵ်းသေ ဢမ်ႇလႆႈႁဵတ်း ယွၼ်ႉၼၼ်ႉ ၽူႈမီးပုၼ်ႈၽွၼ်း တႂ်ႈသိုၵ်းမၢၼ်ႈၶဝ် ၸီႉသင်ႇ တေလႆႈႁဵတ်းႁႂ်ႈယဝ်ႉ ၼႂ်းလိူၼ်ၵျုၼ်ႊၼႆႉ။
ၵူၼ်းပိုၼ်ႉတီႈ ဝဵင်းသီႇသႅင်ႇ လၢတ်ႈၽူႈတွႆႇႁွၵ်ႈဝႃႈ -“ၵူၼ်းၵႂႃႇႁဵတ်း ၸုပ်ႈၼိုင်ႈသမ်ႉ လႆႈပၼ် 5,000 ပျႃး၊ ၵူၼ်းၼႂ်းပွၵ်ႉၽြႃးၽိူၵ်ႇသမ်ႉလႆႈပၼ် 15,000 ပျႃး ၊ တၢင်ႇဝဵင်းတႄႉ ဢမ်ႇလႆႈပၼ်ငိုၼ်း၊ တီႈၼႆႈ လႆႈပၼ် ၵႃႈၸႂ်ႉၸၢႆႇသင်ၵေႃႈ ဢမ်ႇႁူႉ။ ပေႃးဢမ်ႇႁဵတ်း မိူဝ်ႈၽွင်းဢွၵ်ႇတႃႈဢွၵ်ႇတၢင်းၼၼ်ႉ ၶဝ်တေၵူတ်ႇထတ်း ပႃးသမၢတ်ႉၵၢတ်ႉဢေႃႈ”- ဝႃႈၼႆ။
ယူႇတီႈ ႁွင်ႈၵၢၼ် ၾၢႆႇၵူတ်ႇထတ်း ၵူၼ်းၶဝ်ႈဢွၵ်ႇမိူင်း (လဝၵ) ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ်ၼၼ်ႉ ပိုၼ်ၽၢဝ်ႇဝႆႉ ၼႂ်းႁူဝ်ပီ 2024 ၼၼ်ႉဝႃႈ – ၸိူဝ်းဢမ်ႇမီးဝႂ်သမၢတ်ႉၵၢတ်ႉ တေဢမ်ႇပၼ်ၶႂၢင်ႉ ၶၢမ်ႈလႅၼ် လိၼ် ၶဝ်ႈၵႂႃႇၸိုင်ႈမိူင်းႁိမ်းႁွမ်း မိူၼ်ၼင်ႇ – မိူင်းထႆး၊ မိူင်ၶႄႇလႄႈ မိူင်းဢိၼ်ႊတီႊယိူဝ်ႊ ၸိူဝ်းၼၼ်ႉ ဝႃႈ ၼႆ။
တွၼ်ႈတႃႇ တေယိပ်းသဵၼ်ႈမၢႆႁူဝ်ၵူၼ်း တႃႇၵူၼ်းၶဝ်ႈဢွၵ်ႇမိူင်း လႆႈတႅတ်ႈတေႃးထႅင်ႈၼႆသေ ၾၢႆႇတၢင်းသိုၵ်းမၢၼ်ႈ ၸင်ႇတဵၵ်းၸႂ်ႉၵူၼ်းမိူင်းႁဵတ်းဝႂ်သမၢတ်ႉၵၢတ်ႉ UIN ၵၼ်ၵူႈ ၵေႃႉ။ လွင်ႈၼႆႉ ႁဵတ်းႁႂ်ႈၵူၼ်းမိူင်း မီးလွင်ႈၶွင်ႈၶမ်လၢႆလွင်ႈ။
“ပေႃးဢမ်ႇမီးသမၢတ်ႉၵၢတ်ႉၼႆႉ ဢမ်ႇဢွၵ်ႇတၢင်းလႆႈ ယၢပ်ႇၼႃႇ၊ ယဝ်ႉၵေႃႈ တီႈၵဵတ်ႉလၢၼ်ႇ ၸိူဝ်းၼၼ်ႉ ၸႅတ်ႈသမၢတ်ႉၵၢတ်ႉ ပေႃးဢမ်ႇမီးလႆႈပၼ်ငိုၼ်း 10,000 မိုၼ်ႇပျႃး ထိုင် 15,000 ပျႃး၊ မၢင်ပွၵ်ႈ ပေႃးဢမ်ႇ မီးသမၢတ်ႉၵၢတ်ႉ ၶဝ်ဢမ်ႇၶႂ်ႈပၼ်ၵႂႃႇလူးၵွၼ်ႇ”- ၵူၼ်းပိုၼ်ႉတီႈ ဝဵင်းသီႇသႅင်ႇ သိုပ်ႇလၢတ်ႈၼႄၼင်ႇၼႆ။
မိူၼ်ၼႆ တီႈဝဵင်းယႂႃႇငၢၼ်ႇၵေႃႈ ယၢမ်းလဵဝ် ၸုမ်းပိဝ်ႇသေႃးထီးၶဝ် ဢဝ်သဵၼ်ႈမၢႆၵူၼ်းၵႂႃႇႁဵတ်းသမၢတ်ႉ ၵၢတ်ႉ ၼႂ်းပိုၼ်ႉတီႈသေ လႄႇလမ်းႁႃ ႁွင်ႉၵူၼ်း တႃႇႁၢပ်ႇထၢမ်းၵၢၼ်သိုၵ်းၼႆ – ၵူၼ်းပိုၼ်ႉတီႈလၢတ်ႈ။
ၵဵဝ်ႇလူၺ်ႈ လွင်ႈႁဵတ်းဝႂ်သမၢတ်ႉၵၢတ်ႉၼႆႉသေ ယူႇတီႈ ၽွင်းလူင် ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇမိူင်း လဝၵ (လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန) ဢၼ်ယူႇတႂ်ႈသိုၵ်းမၢၼ်ႈၵုမ်းၵမ်ၼၼ်ႉ သင်ႇႁႂ်ႈၵူၼ်းမိူင်း ၵႂႃႇပၼ်သဵၼ်ႈမၢႆၸိုဝ်ႈ တီႈလုမ်းသေ တႄႇႁဵတ်းပၼ်မၢႆၾၢင် (ဢမ်ႇၼၼ်) သမၢတ်ႉၵၢတ်ႉမႃး တင်ႈတႄႇမိူဝ်ႈလိူၼ်ၵျုၼ်ႊ ပီ 2023 ၼၼ်ႉမႃးယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ