တႄႇလိူၼ်မေႊ ပီ 2025 ၼႆႉမႃး ၵၢၼ်ၵႃႉၶၢႆ မၼ်းဢႃႇလူး ဢၼ်ဢွၵ်ႇၼႂ်းမိူင်းတႆးပွတ်းၸၢၼ်း ဢမ်ႇလႆႈ ၵႃႈၶၼ်သုင် မိူၼ်မိူဝ်ႈပီပူၼ်ႉမႃးလႄႈ ႁဵတ်းႁႂ်ႈၸဝ်ႈသူၼ် မၼ်းဢႃႇလူးၶဝ် ႁူပ်ႉတၢင်းယၢပ်ႇၽိုတ်ႇ ဝႃႈၼႆ။

ဝၢႆးလင် ၽႅၼ်ယၼ်ႇသိုၵ်း 1027 တၢင်းမိူင်းတႆးပွတ်းႁွင်ႇယဝ်ႉ ၸဝ်ႈပၢႆးမၢၵ်ႈမီးၶဝ် တေႃႉဢဝ်မၼ်း ဢႃႇလူး ဢၼ်ဢွၵ်ႇတၢင်းမိူင်းၶႄႇ ၶဝ်ႈမႃးသဵၼ်ႈတၢင်း မိူင်းတႆးပွတ်းဢွၵ်ႇ မိူင်းလႃး၊ ၾၢႆႇၼိုင်ႈၵေႃႈ တေႃႉဢဝ်မႃးသဵၼ်ႈတၢင်းမိူင်းတႆးပွတ်းႁွင်ႇ ၸိူဝ်းၼႆႉ ၼမ်ႁႅင်းလႄႈ ႁဵတ်းႁႂ်ႈၵႃႈၶၼ် ၼႂ်းလွၵ်းၵၢတ်ႇ ၸွမ်းၼႂ်းပိုၼ်ႉတီႈ လူတ်းယွမ်းၵႂႃႇ မွၵ်ႈ 2 ပုၼ်ႈပၢႆ ၼႆယဝ်ႉ။

မိူဝ်ႈႁူဝ်လိူၼ်ၵျုၼ်ႊၼႆႉ ၵႃႈၶၼ်မၼ်းဢႃႇလူး ယွမ်းလူင်းၵႂႃႇ ၼိုင်ႈၸွႆႉလႂ် ထိုင် 2,100 ပျႃး၊ ဢွၼ်တၢင်း ၼႆႉ ၼိုင်ႈၸွႆႉလႂ် လႆႈယူႇ 8,000 ပျႃး။ ယၢမ်းလဵဝ် ၵူၼ်းမိူင်းၼႂ်းပိုၼ်ႉတီႈ ဢမ်ႇလႆႈၵႃႈၶၼ်ၸွမ်းၼင်ႇ ယိူင်းဢၢၼ်းဝႆႉၼႆ ၵူၼ်းၵႃႉၶၢႆမၼ်းဢႃႇလူး ၼႂ်းမိူင်းတႆးပွတ်းၸၢၼ်းၶဝ် လၢတ်ႈၼႄၼင်ႇၼႆ။

ယၢမ်းလဵဝ် တီႈႁူင်းၵၢၼ်သိုဝ်ႉၶၢႆၽၵ်းယိူဝ်ႈၼၢင်းၶဵဝ် ဝဵင်းတႃႈၵုင်ႈၼႆႉ ႁပ်ႉသိုဝ်ႉမၼ်းဢႃႇလူး သႅၼ်း S-2 ၼိုင်ႈၸွႆႉလႂ် မီးယူႇ 2,800 ပျႃး၊ S-1 ၼႆႉ ၼိုင်ႈၸွႆႉ 3,200 ပျႃး၊ OK ၼႆႉ ၼိုင်ႈၸွႆႉ 2,900 ပျႃး။ ၶၼ်မၼ်း ဢႃႇလူး မိူင်းၶႄႇသမ်ႉ ၼိုင်ႈၸွႆႉလႂ် 3,300 ပျႃး ဝႃႈၼႆ။

လႆႈႁူႉဝႃႈ မၼ်းဢႃႇလူးမိူင်းၶႄႇၼႆႉ ၵမ်ႈၼမ် တေႃႉဢဝ်ၶဝ်ႈမႃးၼႂ်းမိူင်းတႆးပွတ်းဢွၵ်ႇ မိူင်းလႃးသေ လတ်းၵဵတ်ႉလၢၼ်ႇၵူတ်ႇထတ်း တီႈၵဵင်းတုင်၊ ၵဵတ်ႉလၢၼ်ႇၵူတ်ႇထတ်း တီႈၶူဝ်တႃႈၵေႃႈယဝ်ႉ ၶဝ်ႈမႃးၶၢႆ ထိုင်ၼႂ်းမိူင်းတႆးပွတ်းၸၢၼ်း ပတ်းပိုၼ်ႉ ဝႃႈၼႆ။

မၼ်းဢႃႇလူးမိူင်းၶႄႇၼႆႉ ၵႃႈၶၼ်မၼ်း သုင်လိူဝ်မၼ်းဢႃႇလူး ၼႂ်းမိူင်းသေတႃႉ ယွၼ်ႉၾၢင်ႁၢင်ႈမၼ်း ဢႃႇလူး တိူဝ်းၶႅမ်ႉလိူဝ် ဢႃႇလူးၼႂ်းမိူင်းလႄႈ ႁဵတ်းႁႂ်ႈၵႃႉငၢႆႈၶၢႆလီလိူဝ် ၶွင်ၼႂ်းမိူင်း ၼႆယဝ်ႉ။

တႅမ်ႈ – ၽူၺ်းၼုမ်ႇ