ၼႂ်းဝူင်ႈပူၼ်ႉမႃးၼႆႉ လူမ်းလႅင်ႉတၢႆႇၾူၼ်း ဝူႇတိတ်ႉ လတ်းၽၢၼ်ႇ ၽတ်ႉၶဝ်ႈမိူင်းဝႅတ်ႉၼၢမ်းသေ သိုပ်ႇၽတ်ႉထွင်းၶဝ်ႈၵႂႃႇ ၼႂ်းမိူင်းၶႄႇပွတ်းၸၢၼ်းယဝ်ႉ ႁႅင်းဢူၼ်ႈၵႂႃႇ။

မိူင်းဝႅတ်ႉၼၢမ်း ပွတ်းၵၢင် လႆၶၢမ်ႇတၢမ်ႇလူမ်းလႅင်ႉ ႁၢဝ်ႈႁႅင်းလိူဝ်ပိူၼ်ႈသုတ်း၊ မီးၵူၼ်းလူႉတၢႆ 7 ၵေႃႉ၊ ႁိူၼ်းယေးတီႈယူႇသဝ်း လူႉၵွႆၼပ်ႉႁူဝ်ပၢၵ်ႇ၊ တီႈလိၼ်ၽုၵ်ႇသွမ်ႈ ၺႃးၼမ်ႉၼွင်းထူမ်ႈၵႂႃႇ 6 မိုၼ်ႇႁႅတ်ႇတႃႇၼႆ – လူင်ပွင်ၸိုင်ႈမိူင်းဝႅတ်ႉၼၢမ်း ပိုၼ်ၽၢဝ်ႇဝႆႉ ၼႂ်းဝၼ်းတီႈ 16/06/2025 ၼႆႉ ၼင်ႇၼႆ။

မိူင်းဝႅတ်ႉၼၢမ်းၼႆႉ ၵႆႉၺႃးၽေးလူမ်းလႅင်ႉတၢႆႇၾူၼ်းယူႇ ၵူႈပီသေတႃႉ ဝၢႆးလင်မႃးၼႆႉ ယွၼ်ႉၾိင်ႈၾႃႉရႃႇသီႇ လႅၵ်ႈလၢႆႈသေ ငဝ်းလၢႆးႁၢႆႉႁႅင်းမႃးလိူဝ်ၼႆႉ – ၽူႈလူင်ႉလႅၼ်ႇၾၢႆႇပၢႆးသၢႆႈၶဝ် ပၼ်ၾၢင်ႉဝႆႉၼင်ႇၼႆ။

မိူဝ်ႈပီၵၢႆပူၼ်ႉမႃးၼႆႉ ယွၼ်ႉၽေးသၽႃႇဝသေ ၵူၼ်းမိူင်းဝႅတ်ႉၼၢမ်း လူႉတၢႆ 514 ၵေႃႉ၊ ၼမ်လိူဝ် မိူဝ်ႈပီ 2023 ၼၼ်ႉ 3 ပုၼ်ႈ။

ၼႂ်းပီ 2024 လိူၼ်သႅပ်ႊထႅမ်ႊပိူဝ်ႊၼၼ်ႉ လူမ်းလႅင်ႉႁႅင်းယႂ်ႇ ယႃႇၵီႇ ၽတ်ႉထွင်းၶဝ်ႈ မိူင်းဝႅတ်ႉၼၢမ်း ပွတ်းႁွင်ႇ မီးၵူၼ်းလူႉတၢႆ 345 ၵေႃႉ၊ သင်ဢဝ်ၵၢၼ်ပၢႆးမၢၵ်ႈမီးဝႃႈၸိုင် လူႉသုမ်းၵႂႃႇ ၵိုင်ႇငိုၼ်းတေႃႊလႃႊ 3.3 ပီႊလီႊယၼ်ႊ – သိုဝ်ႇၶၢဝ်ႇ People’s Spring ဢွၵ်ႇဝႆႉၼင်ႇၼႆ။