ဝၼ်းတီႈ 16/06/2025 တႄႇယၢမ်းဝၢႆးဝၼ်း 4:30 မူင်း တေႃႇထိုင်ယၢမ်းႁူဝ်ၶမ်ႈ 6:30 မူင်း သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းလႄႈ ၶိူင်ႈၵွင်ႈလူင် ပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းတဢၢင်း TNLA ၵုမ်းၵမ်သေ တိူဝ်ႉၺႃးႁိူၼ်းယေးၵူၼ်းမိူင်း လူႉၵွႆၵႂႃႇပႃး ဝႃႈၼႆ။
ၵူၼ်းၸမ်ၸႂ်ၵၼ်တင်း တပ်ႉသိုၵ်းတဢၢင်း TNLA လၢတ်ႈတီႈၽူႈတွႆႇႁွၵ်ႈဝႃႈ -“ၶိူင်ႈမိၼ်တိုၵ်း သိုၵ်းမၢၼ်ႈ မႃးပွႆႇမၢၵ်ႇၵႂႃႇ တီႈႁိမ်းႁွမ်းမၢၼ်ႈသႃႇ ဝူင်ႈၵၢင်ၸႄႈဝဵင်းၼမ်ႉတူႈလႄႈ ဝဵင်းၵူတ်ႉၶၢႆ။ ၶဝ်ၸႂ်ႉၶိူင်ႈမိၼ် 4 လမ်း။ ၼိုင်ႈလမ်းၼႆႉ မၼ်းပွႆႇၼိုင်ႈပွၵ်ႈ 2 လုၵ်ႈ။ လွင်ႈလူႉမၢတ်ႇၸဵပ်းတႄႉ ပႆႇႁူႉၸွမ်းတႄႉတႄႉ”- ဝႃႈၼႆ။
ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ သိုၵ်းမၢၼ်ႈ ၸႂ်ႉၶိူင်ႈၵွင်ႈလူင် ပွႆႇမၢၵ်ႇၵႂႃႇတူၵ်းသႂ်ႇတၢင်းပွၵ်ႉပူႇတႃႇ ဝဵင်းၼွင်ၶဵဝ်လႄႈ ႁဵတ်းႁႂ်ႈတိူဝ်ႉၺႃးႁိူၼ်းၵူၼ်းမိူင်းလူႉၵွႆၵႂႃႇ 2 လင်ၼႆ – ၵူၼ်း ၸမ်ၸႂ်ၵၼ် တင်းတပ်ႉသိုၵ်းတဢၢင်း TNLA လၢတ်ႈၼႄၼင်ႇၼႆ။
“ၶဝ်ပွႆႇမၢၵ်ႇလူင်မႃး တေမီးယူႇမွၵ်ႈ 6 လုၵ်ႈ။ တႃႇသွင်လုၵ်ႈၼႆႉ ၵႂႃႇတိူဝ်ႉၺႃးႁိူၼ်းၵူၼ်းမိူင်း။ ထႅင်ႈ လုၵ်ႈၼိုင်ႈသမ်ႉ ၵႂႃႇတူၵ်းၺႃးၼိူဝ်သဵၼ်ႈတၢင်းရူတ်ႉၾႆး (ရထား)။ ထႅင်ႈလုၵ်ႈၼိုင်ႈသမ်ႉ ၵႂႃႇတူၵ်းၼႂ်း ထိူၼ်ႇ။ တူၵ်းၺႃးၼႂ်းဝၢင်းၵျွင်းမုၼ်ၸဝ်ႈသမ်ႉ 3 လုၵ်ႈ”။
လႆႈႁူႉဝႃႈ ယၢမ်းလဵဝ် သိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်း ၼႂ်းထုင်ႉ တွင်းၶမ်း ၸႄႈဝဵင်းၼွင်ၶဵဝ် ၵူၺ်းဢမ်ႇၵႃး သိုၵ်းမၢၼ်ႈ ၸိူဝ်းၵုမ်းၵမ်ယူႇဝႆႉၼႂ်းဝဵင်းလႃႈသဵဝ်ႈၼၼ်ႉ တီႉၺွပ်းလႆႈ ၵေႃႉဢၼ်ထၢင်ႇထိူမ်ဝႃႈ ပဵၼ်ၵူၼ်းသိုၵ်းတဢၢင်းၼႆ – ၽူႈႁၢပ်ႇၵၢၼ်ၵဝ်ႇ ၼႂ်းတပ်ႉသိုၵ်း မၢၼ်ႈ ၵေႃႉႁဵတ်း CDM သိၼ်ႇယေႃႇ ပိုၼ်ၽၢဝ်ႇ ၼိူဝ်သိုဝ်ႇတူင်ႇဝူင်းၵူၼ်းသုၼ်ႇတူဝ်မၼ်းဝႆႉ ၼင်ႇၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ