ပျီႇတူႉၸိတ်ႉပဢူဝ်း PNO တဵၵ်းၸႂ်ႉၵူၼ်းၼႂ်းဢိူင်ႇၼွင်ၵႅဝ်း (နောင်ကျော) တင်း ဢိူင်ႇတွင်ႇသျေႉ (တောင်ရှေ့ကျေးရွာအုပ်စု) ၼႂ်းၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ႁူဝ်ၵူၼ်း 6 ႁဵင်ပၢႆ ႁႂ်ႈၶၢႆႉပၢႆႈ ယၢမ်းလဵဝ် ပဵၼ်ၶၢဝ်းၾူၼ် ၽွင်းလူဝ်ႇမၢႆသူၼ်ၶဝ်ႈၵၢပ်ႇ တႃႇႁႃၵိၼ်လဵင်ႉတွင်းလႄႈ ၵူၼ်းပိုၼ်ႉတီႈ ဢွၼ်ၵၼ်ယွၼ်းၶႂၢင်ႉသိုပ်ႇယူႇဝႆႉ။
ဝၼ်းတီႈ 07/06/2025 ၸုမ်းပျီတူႉၸိတ်ႉပဢူဝ်း PNO သူင်ႇလိၵ်ႈၸူး ႁႂ်ႈၵူၼ်းဝၢၼ်ႈတပူးထူဝ်း (တပူးထိုး) ၊ ၵွင်ထူဝ်ႇ (ကောင်ထို) ၊ လွႆငွၼ်း (လွယ်ငွန်း) ၊ ၼွင်ဝူဝ် (နောင်ဘို) ၊ ပၢင်ႇၸၢၵ်ႈ(ပင်စက်) ဢၼ်မီးၼႂ်းဢိူင်ႇ ၼွင်ၵႅဝ်းလႄႈ ဝၢၼ်ႈၼွင်ထဝ် ၸိူဝ်းၼႆႉ ႁႂ်ႈၶၢႆႉပၢႆႈ။ ၼႂ်းလိၵ်ႈၼၼ်ႉပႃးဝႆႉဝႃႈ တေလႆႈၶၢႆႉႁႂ်ႈယဝ်ႉ ၼႂ်းဝၼ်းတီႈ 15 ၼႆႉ ဝႃႈၼႆ။
ၼၢင်းယိင်း ၵူၼ်းပိုၼ်ႉတီႈဝဵင်းသီႇသႅင် လၢတ်ႈၽူႈတွႆႇႁွၵ်ႈဝႃႈ -“ၶဝ်ဝႃႈ သိုၵ်းမၢၼ်ႈတင်း PNO ၶဝ် တေထူဝ်းသိုၵ်းၶဝ်ႈမႃးၼႆလႄႈ ၸႂ်ႉၵူၼ်းဝၢၼ်ႈပၢႆႈဝႆႉ၊ ယၢမ်းလဵဝ်သမ်ႉ ပဵၼ်ၶၢဝ်းဢဝ်ၶဝ်ႈၶႄႇလႄႈ ၵူၼ်းဝၢၼ်ႈ ဢွၼ်ၵၼ်ယွၼ်းၶႂၢင်ႉ ပႂ်ႉဢဝ်ၶဝ်ႈၶႄႇၵွၼ်ႇ ၵူၼ်းဝၢၼ်ႈမၢင်ၸိူဝ်းတႄႉ ၶၢႆႉယူႇဝႆႉတၢင်းဝၢၼ်ႈၽြႃးၽိူၵ်ႇ ၼႂ်းဝၢင်းထမ်ႇမယူင်ႇယဝ်ႉ။ ယွၼ်ႉပဵၼ်ၶၢဝ်းၾူၼ်လႄႈ ၸႂ်ႉၵူၼ်းဝၢၼ်ႈၶၢႆႉၸိူင်ႉၼႆၼႆႉ ပဵၼ်ဢၼ်ယၢပ်ႇၸႂ်ၼႃႇ။ ပေႃးတေၶၢႆႉပၢႆႈၵေႃႈ ၵူၼ်းဝၢၼ်ႈသမ်ႉ လႆႈပိုင်ႈဢိင်သူၼ်ႁႆႈၼႃးၵူၺ်းလႄႈ တႃႇႁႃၵိၼ်လဵင်ႉတွင်ႉတႄႉ ဢမ်ႇၸၢင်ႈၸႂ်ယႂ်ႇသင်”- ဝႃႈၼႆ။
ဢၼ်ယူႇတီႈ ၸုမ်းပျီႇတူႉၸိတ်ႉပဢူဝ်း ၸႂ်ႉၵူၼ်းပိုၼ်ႉတီႈ ၼႂ်းဢိူင်ႇၼွင်ၵႅဝ်းလႄႈ ဢိူင်ႇတွင်ႇသျေႉ ၶၢႆႉပၢႆႈၵႂႃႇယူႇဝႆႉတီႈ ၵျွင်းမူၺ်ႇတေႃႇ ဢၼ်မီးတီႈဝၢၼ်ႈၽြႃးၽိူၵ်ႇၼၼ်ႉသေတႃႉ ၵူၼ်းဝၢၼ်ႈၵမ်ႈၼမ်တႄႉ ၶၢႆႉၵႂႃႇယူႇၸွမ်းႁိူၼ်းယေးပီႈၼွင်ႉၽႂ်မၼ်း ယဝ်ႉၵေႃႈ ၸွမ်းၼႂ်းႁႆႈၼႂ်းသူၼ် ၸိူဝ်းၼၼ်ႉ။
“မိူဝ်ႈသိုၼ်းၼၼ်ႉ ႁဝ်းၵႂႃႇတူၺ်းတီႈထမ်ႇမယူင်ႇ မီးၵူၼ်းဢိတ်းၵူၺ်း၊ ၵူၼ်းဝၢၼ်ႈမၢင်ၸိူဝ်းၵေႃႈ ပႆႇပၢႆႈ ၊ မၢင်ၸိူဝ်းၵေႃႈ ပၢႆႈၵႂႃႇယူႇတီႈႁိူၼ်းပီႈႁိူၼ်းၼွင်ႉ၊ ဢၼ်ပျီႇတူႉၸိတ်ႉ ၸႂ်ႉၶၢႆႉၼၼ်ႉ ယွၼ်ႉဝၼ်းမၼ်းတဵမ်ယဝ်ႉလႄႈ လႆႈငိၼ်းသဵင်ၶိူင်ႈမိၼ် မႃးပၼ်ႇလဵပ်ႈယူႇၵူႈဝၼ်း၊ ၵူဝ်ယူႇသေတႃႉ ပေႃးဢမ်ႇဢဝ်ၶဝ်ႈၵၢပ်ႇၵေႃႈ ဢမ်ႇမီးတႃႇၵိၼ်သင်ယဝ်ႉ”- ၵူၼ်းပိုၼ်ႉတီႈ ဝဵင်းသီႇသႅင်ႇ သိုပ်ႇလၢတ်ႈၼႄၼင်ႇၼႆ။
လိူဝ်ၼၼ်ႉ မူႇဝၢၼ်ႈ ဢၼ်ပျီႇတူႉၸိတ်ႉၸႂ်ႉၶၢႆႉပၢႆႈၼၼ်ႉ ၵမ်ႈၼမ် ပဵၼ်ၵူၼ်းဢႃယုယႂ်ႇ၊ ဢွၼ်ၵၼ်ပဵၼ် ၼၢဝ်ၼူၵ်ႉ(ၶႆႈဝတ်း) လႄႈ တွင်ႉၵႃႇတွင်ႈႁေႈသေ လႆႈသူင်ႇယူတ်းယႃတူဝ်ဝႆႉ တီႈႁူင်းယႃသီႇသႅင်ႇၵေႃႈ မီးတင်းၼမ်။
ၼၢင်းယိင်းၸွႆႈထႅမ် ၵူၼ်းပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ -“တေႃႈလဵဝ် လုၵ်ႈဢွၼ်လႄႈ ၵူၼ်း ၸိူဝ်း ဢႃယုယႂ်ႇတႄႉ လႆႈယူတ်းယႃဝႆႉတီႈႁူင်းယႃ၊ မၢင်ၸိူဝ်း ဢမ်ႇမီးငိုၼ်းၵေႃႈ ႁႃသိုဝ်ႉၵိၼ်ယႃၸိူင်ႉ ၼၼ်ၵူၺ်း ၊ ပဵၼ်ၽွင်းၶဝ်ႈၶၢဝ်းၾူၼ်လႄႈ ဢွၼ်ၵၼ်ပဵၼ်တွင်ႉၵႃႇတွင်ႉႁေႈ ၊ ၼၢဝ်ႇၼမ်ၼႃႇ”- ဝႃႈၼႆ။
ၼွၵ်ႈလိူဝ်ၼၼ်ႉ တၢင်းၾၢႆႇတပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA တႄႉ ပိုၼ်ၽၢဝ်ႇဢွၵ်ႇဝႆႉဝႃႈ – ပူၼ်ႉမႃး ၼႂ်းဝၼ်းတီႈ 12-13 /06/2025 ယၢမ်းႁူဝ်ၶမ်ႈ ၸုမ်းပျီႇတူႉၸိတ်ႉပဢူဝ်း PNO ဢဝ်ၾႆးၽဝ် ႁိူၼ်း ယေး ၵူၼ်းဝၢၼ်ႈတပူးထူဝ်း ႁဵတ်းႁႂ်ႈႁိူၼ်းယေးၵူၼ်းဝၢၼ်ႈ လူႉၵွႆ 6 လင်၊ ယၢမ်းလဵဝ် ၸုမ်းပျီႇတူႉၸိတ်ႉပ ဢူဝ်းၶဝ် မႃးပၵ်းတပ်ႉဝႆႉ တီႈၼႂ်းမူႇဝၢၼ်ႈ။
ဝဵင်းသီႇသႅင်ႇၼႆႉ ယူႇတီႈ တပ်ႉသိုၵ်းမၢၼ်ႈ ယိုတ်းၵုမ်းလႆႈၶိုၼ်း တီႈတပ်ႉသိုၵ်းပူတ်းပွႆႇၸိူဝ်ႉၸၢတ်ႈပ ဢူဝ်း PNLA မိူဝ်ႈႁၢင်လိူၼ်မၢတ်ႊၶျ် ပီ 2024 ၼၼ်ႉသေ ထိုင်မႃးၸမ်ပီယဝ်ႉ သိုၵ်းမၢၼ်ႈ ဢမ်ႇဢဝ်ပုၼ်ႈ ၽွၼ်း ပူၵ်းပွင်ပၼ်သင် တိုၵ်ႉထႅမ်ႁႅင်းသိုၵ်းသေ သိုပ်ႇပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉယူႇ ႁၢဝ်ႈႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ