ၵၢင်ႉၵႄႇလႄႈ ႁွင်ႈၵၢၼ် ၾၢႆႇၽွင်းငမ်းၵူႈလွင်ႈတႂ်ႈသိုၵ်းမၢၼ်ႈ လႄႇလမ်းႁႃႁွင်ႉ ၵူၼ်းပိုၼ်ႉတီႈဢၼ် ပႃးၼႂ်းသဵၼ်ႈမၢႆ တႃႇႁၢပ်ႇၵၢၼ်သိုၵ်းႁႂ်ႈၶဝ်ႈႁူမ်ႈၼႂ်းပၢင်ၵုမ် ၼႂ်းဢိူင်ႇၼႂ်းဝၢၼ်ႈ ၼႂ်းၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ ဝႃႈၼႆ။
မိူဝ်ႈဝႃး ဝၼ်းတီႈ 16/06/2025 ယၢမ်းဝၢႆးဝၼ်း 1 မူင်း ၵၢင်ႉၵႄႇၼႂ်းပွၵ်ႉမဵဝ်ႉမ ႁွင်ႉဢဝ်ၵူၼ်းၼႂ်းပွၵ်ႉသေ ႁဵတ်းပၢင်ၵုမ် လိူၵ်ႈၵူၼ်းတႃႇၵႂႃႇႁၢပ်ႇၵၢၼ်သိုၵ်း ငိူင်ႉဝႄႈဢမ်ႇလႆႈ ၊ ပေႃးပၢႆႈတေဢဝ်လိူင်ႈ ပေႃႈမႄႈ တီႈ ႁိူၼ်း ဝႃႈၼႆ။
ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝႃးၼႆႉ လိူၵ်ႈၵူၼ်းၼႂ်းပွၵ်ႉ ဢၼ်ၶဝ်ႈၼႂ်းသႅၼ်းပၢၼ် တႃႇႁၢပ်ႇၵၢၼ်သိုၵ်း။ ၼႂ်းပွၵ်ႉမဵဝ်ႉမၼႆႉ မီး124 ၵေႃႉ ၊ ၼႂ်းၼၼ်ႉ ပေႃးသိုၵ်းမၢၼ်ႈယွၼ်းၵူၼ်းမႃး တေလႆႈၵႂႃႇၵမ်းၸုပ်ႈ၊ ငိူင်ႉဝႄႈဢမ်ႇလႆႈ၊ ပေႃးပၢႆႈတေဢဝ်လိူင်ႈၸွႆးတြႃး ပေႃႈမႄႈၵူၼ်းႁိူၼ်း ၸိူဝ်းၵိုတ်းတင်းလင် ။ ၵူၼ်းဢၼ်ၶဝ်ႈႁူမ်ႈပၢင်ၵုမ်ဢေႇလႄႈ ထႅင်ႈပွၵ်ႈၼိုင်ႈ တေဢဝ်လိူင်ႈ ၵူၼ်းဢၼ်ဢမ်ႇၶဝ်ႈႁူမ်ႈပၢင်ၵုမ် ပႃး”- ဝႃႈၼႆ။
ၼႂ်းပွၵ်ႉမဵဝ်ႉမၼႆႉ မီးလင်ႁိူၼ်း 300 ပၢႆ ၊ ၼႂ်းၼၼ်ႉ ၵၢင်ႉၵႄႇလႄႈ ႁွင်ႈၵၢၼ်ၾၢႆၽွင်းငမ်းၶဝ် ၸႅၵ်ႇဢွၵ်ႇ ဝႆႉ ၵူၼ်းဢၼ်ဢမ်ႇပႃး တႃႇႁၢပ်ႇၵၢၼ်သိုၵ်း။ ပဵၼ်ၵူၼ်းၼႂ်းၶႃႈႁၢပ်ႇၵၢၼ်ၶုၼ်၊ ၽူႈထုၵ်ႇႁပ်ႉတင်းၸွႆႈ၊ လုၵ်ႈဢွၼ်ႇတိုၵ်ႉၶိုၼ်ႈႁူင်းႁဵၼ်း ၸိူဝ်းၼႆႉတႄႉလွတ်ႈ ဢမ်ႇပႃးတႃႇၵႂႃႇႁၢပ်ႇၵၢၼ်သိုၵ်း။ ၵူၼ်းၸိူဝ်းၶဝ်ႈ ၼႂ်းသႅၼ်းတႃႇႁၢပ်ႇၵၢၼ်သိုၵ်းမီး 124 ၵေႃႉ။ ၼႂ်းၵူၼ်း 124 ၵေႃႉၼၼ်ႉ ပေႃးသိုၵ်းမၢၼ်ႈ ယွၼ်းၵူၼ်းမႃး ၵေႃႈ တေလႆႈၵႂႃႇပဵၼ်ၸုပ်ႈၵူႈၵေႃႉ ငိူင်ႉဝႄႈဢမ်ႇလႆႈ ဝႃႈၼႆ။
ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “ၵူၼ်းဢမ်ႇၶႂ်ႈၵႂႃႇတႃႇႁၢပ်ႇၵၢၼ်သိုၵ်းၼၼ်ႉ တေလႆႈၵႂႃႇ ဢုပ်ႇ ၵၼ် တင်းၵၢင်ႉၵႄႇၼႂ်းပွၵ်ႉ၊ လႅပ်ႈတေလႆႈပၼ်ငိုၼ်း 100 သႅၼ်ထိုင် 200 သႅၼ်ပျႃး ၊ ၵူၼ်းႁဵတ်းႁႃၵိၼ် ဝၼ်းလႂ်ဝၼ်းၼၼ်ႉဢမ်ႇပဵၼ်လႆႈၶႃႈ ဢွၼ်ၵၼ်ပၢႆႈဢေႃႈ။ ၵူၺ်းႁဝ်းၶႃႈတႄႉ တေလႆႈၵႂႃႇတၢင်းလႂ်ၵေႃႈ ဢမ်ႇႁူႉ၊ တေႃႈလဵဝ်ၼႆႉ ၽႂ်ၵေႃႈ ဢမ်ႇႁတ်းဢွၵ်ႇႁိူၼ်းဢွၵ်ႇယေး မၢင်ၸိူဝ်းၵေႃႈ ပၢႆႈၵၼ်မူတ်းယဝ်ႉ ယၢပ်ႇ ၽိုတ်ႇၵိၼ်းၸႂ်တႄႉတႄႉ”- ဝႃႈၼႆ။
တႃႇႁၢပ်ႇၵၢၼ်သိုၵ်း တီႈဝဵင်းမိူင်းတူၼ်ၼႆႉၸုပ်ႈၼိုင်ႈလႄႈ ၸုပ်ႈၼိုင်ႈ ဢမ်ႇမိူၼ်ၵၼ် ၊ ငိုၼ်းတႄႉလႆႈ ပၼ်ၵူႈလိူၼ်။ ဢွၼ်တၢင်းသိုၵ်းမၢၼ်ႈ တဵၵ်းႁႂ်ႈၵၢင်ႉၵႄႇၶဝ် လူင်းၵဵပ်းငိုၼ်းၵူၼ်းမိူင်း တႃႇၸၢင်ႈၵူၼ်း ႁဵတ်းသိုၵ်း ၼိုင်ႈႁိူၼ်းလႂ် ဢမ်ႇယွမ်း 3 မိုၼ်ႇပျႃး။ ၸၢင်ႈၵူၼ်းၵႂႃႇတႅၼ်းၼိုင်ႈၵေႃႉလႂ် လႆႈပၼ်ဢမ်ႇယွမ်း 60 သႅၼ်ပျႃး – ၵူၼ်းပိုၼ်ႉတီႈလၢတ်ႈ။
တွၼ်ႈတႃႇ ၵူၼ်းၼုမ်ႇၸိူဝ်းၵႂႃႇႁဵၼ်းလိၵ်ႈလၢႆး တၢင်ႇတီႈတၢင်ႇဝဵင်း ဢမ်ႇၼၼ် တၢင်ႇၸိုင်ႈမိူင်းၼႆၸိုင် တၵ်းတေလႆႈဢဝ်လိၵ်ႈၵမ်ႉတီႈ ၸၼ်ႉၸွမ်/ ႁူင်းႁဵၼ်း (လွင်ႈဝႃႈ ၸၢႆးၵေႃႉၼႆႉ တိုၵ်ႉႁဵၼ်းလိၵ်ႈယူႇတီႈ ၸၼ်ႉၸွမ်ၼႆႉတႄႉတႄႉ) ၼႆမႃးၼႄပႃး – ၽူႈမီးပုၼ်ႈၽွၼ်းၶဝ်လၢတ်ႈၼင်ႇၼႆ။
မိူၼ်ၼင်ႇၼႆ တီႈဝၢၼ်ႈၾၢႆၶႄႇ ၼႂ်းဝဵင်းမိူင်းတူၼ်ၵေႃႈ လႆႈပၼ်ငိုၼ်း တႃႇႁၢပ်ႇၵၢၼ်သိုၵ်း ၵူႈလိူၼ် ၊ မၢင် လိူၼ် လႆႈပၼ်ၼမ် မၢင်လိူၼ် လႆႈပၼ်ဢေႇ ဝႃႈၼႆ။
ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “ဝၢၼ်ႈၾၢႆၶႄႇ တႃႇၸၢင်ႈၵူၼ်းႁၢပ်ႇၵၢၼ်သိုၵ်းၼႆသေ ၵဵပ်း ငိုၼ်းၵူႈလိူၼ် ၵႃႈမၼ်းၵေႃႈၶိုၼ်ႈမႃးတိၵ်းတိၵ်း ပေႃးဢမ်ႇပႃးလၢႆးၸိုဝ်ႈႁဵတ်းသိုၵ်း 17,000 ပေႃးပႃးၸိုဝ်ႈ သမ်ႉ 35,000 ပျႃး၊ ပေႃးၺွပ်းလႆႈၵူၼ်းၵေႃႈဢဝ်ၵူၼ်း”- ဝႃႈၼႆ။
မိူၼ်ၼင်ႇၼႆ ၼႂ်းဝၼ်းတီႈ 13/05/2025 ၼၼ်ႉၵေႃႈ သိုၵ်းမၢၼ်ႈ ၵိုင်ႉၵၢင်ႉၶဝ်ႈၵူတ်ႇထတ်းသဵၼ်ႈမၢႆၶႅၵ်ႇ ၼႂ်းပွၵ်ႉဝၢၼ်ႈမႂ်ႇလႄႈ မဵဝ်ႉမ၊ ယွၼ်းတူၺ်းသဵၼ်ႈမၢႆႁူဝ်ႁိူၼ်းသေ တီႉၺွပ်းၵႂႃႇၵူၼ်းၸၢႆးၼုမ်ႇ 2 ၵေႃႉ ဢႃ ယု 20 ပၢႆ ၼႂ်းပွၵ်ႉဝၢၼ်ႈမႂ်ႇ။ ၼႂ်းလိူၼ်ၼၼ်ႉၵူၺ်း ၼင်ႇၵဝ် ၾၢႆႇပလိၵ်ႈသိုၵ်းမၢၼ်ႈ လႄႇလမ်း ႁႃတီႉ ၺွပ်း ၵူၼ်းၼႂ်းမိူင်းတူၼ် ၊ ၼႃးၵွင်းမူး ၊ ပုင်ႇပႃၶႅမ် တင်းမူတ်း ၺွပ်းၵႂႃႇ 8 ၵေႃႉ – ၵူၼ်းပိုၼ်ႉတီႈ လၢတ်ႈ ၼင်ႇၼႆ။
တီႈၼႂ်းဝဵင်းမိူင်းတူၼ်ၼႆႉ မီးပွၵ်ႉယႂ်ႇ 3 ပွၵ်ႉ ပဵၼ်ပွၵ်ႉၼွင်ပႃယဵၼ်ႇ၊ ပွၵ်ႉမဵဝ်ႉမ၊ ပွၵ်ႉဝၢၼ်ႈမႂ်ႇ သိုၵ်းမၢၼ်ႈ တဵၵ်းၸႂ်ႉၵဵပ်းငိုၼ်းၵဵပ်းသိုၵ်း ၸိူင်ႉၼႆ ဢမ်ႇယွမ်း 14 ပွၵ်ႈယဝ်ႉ။ ၼိုင်ႈပွၵ်ႈၼႆႉ လႆႈပၼ်ၵူၼ်းသိုၵ်း ၼိုင်ႈ ဝၢၼ်ႈ/ ၼိုင်ႈပွၵ်ႉ 2 – 3 ၵေႃႉ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ