ၼႂ်းလိူၼ်ၵျုၼ်ႊ ဝူင်ႈထီႉသွင်ၼႆႉ သိုၵ်းမၢၼ်ႈ ၶဝ်ႈပၵ်းတပ်ႉပၢင်သဝ်း ဢိူင်ႇၵျွၵ်ႉၵူႇ ႁိမ်းဝဵင်းဢၢင်ႇတေႃး ၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်းသေ တဵၵ်းၸႂ်ႉၵူၼ်းဝၢၼ်ႈၼႂ်းပိုၼ်ႉတီႈ ၶၢႆႉဢွၵ်ႇဝၢၼ်ႈတင်းသဵင်ႈ။

ယၢမ်းလဵဝ် သိုၵ်းမၢၼ်ႈ ၶဝ်ႈဢဝ်တီႈယူႇ ပၵ်းတပ်ႉယူႇ ၸွမ်းၼႂ်းဝၢၼ်ႈၼႂ်းသူၼ် ဢိူင်ႇၵျွၵ်ႉၵူႇ ဢွၵ်ႇၶေႃႈၸီႉသင်ႇ ႁႂ်ႈၵူၼ်းဝၢၼ်ႈပူင်းဢိၼ်းလႄႈ လွႆႁွင်ႇ ဢွၵ်ႇဝၢၼ်ႈၵႂႃႇယူႇတၢင်းဝဵင်းဢၢင်ႇတေႃးၼႆ ၵူၼ်းၼႂ်း ပိုၼ်ႉတီႈ ဝဵင်းဢၢင်ႇတေႃးၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ယွၼ်ႉၶိူင်ႈမိၼ် မႃးပွႆႇမၢၵ်ႇသႂ်ႇတိၵ်းတိၵ်းလႄႈ ၶဝ်ၸင်ႇၸႂ်ႉၵူၼ်းဝၢၼ်ႈၶၢႆႉ။ ယၢမ်းလဵဝ် ၵူၼ်းဝၢၼ်ႈ ဢွၼ်ၵၼ်ပၢႆႈၵႂႃႇယူႇတီႈၵျွင်းမုၼ်ၸဝ်ႈလွႆႁွင်ႇ။ သိုၵ်းမၢၼ်ႈ ဢမ်ႇပၼ်ယူႇၼႂ်းဝၢၼ်ႈ။ သိုၵ်းမၢၼ်ႈၶဝ် ၶဝ်ႈယူႇဝႆႉၼႂ်းဝၢၼ်ႈ။ ဢမ်ႇပၼ်ၵူၼ်းဝၢၼ်ႈၶဝ်ႈမိူဝ်းဢဝ်ၶိုၼ်း ၶဝ်ႈၼမ်ႉတၢင်းၵိၼ်”။

လႆႈႁူႉဝႃႈ သင်မီးၵူၼ်းဝၢၼ်ႈၵေႃႉလႂ် ၽႂ်သေဢမ်ႇဝႃႈ ၶဝ်ႈၵႂႃႇၼႂ်းဝၢၼ်ႈၸိုင် တေၺႃးမၢပ်ႇၼႄးဝႃႈ ပဵၼ်ၵူၼ်းၵေႃႉဢၼ်လီထၢင်ႇထိူမ် ယဝ်ႉၵေႃႈ တေၺႃးႁွင်ႉၵႂႃႇၵူတ်ႇထတ်းၼႆ ၾၢႆႇသိုၵ်းမၢၼ်ႈၶဝ် လွၵ်ႇငိုတ်ႈၵူၼ်းပိုၼ်ႉတီႈဝႆႉ – ၵူၼ်းၸၢႆးၵေႃႉယူႇၼႂ်းပိုၼ်ႉတီႈ ဝဵင်းဢၢင်ႇတေႃး လၢတ်ႈၼႄၼင်ႇၼႆ။

“ၶဝ်ၸႂ်ႉပီႈၼွင်ႉဝၢၼ်ႈပူင်းဢိၼ်းၼႆႉ မီးၵႂႃႇမွၵ်ႈ 10 ဝၼ်းယဝ်ႉ။ လွႆႁွင်ႇၼႆႉသမ်ႉ ၶဝ်ၸႂ်ႉၶၢႆႉ မီးမွၵ်ႈ 5 ဝၼ်းယဝ်ႉ။ ၵူၼ်းၸိူဝ်းပၢႆႈမႃးယူႇတီႈ ၼႂ်းၵျွင်းမုၼ်ၸဝ်ႈဝႆႉၼၼ်ႉသမ်ႉ ၶဝ်ႁုင်ၵိၼ်ႁင်းၵူၺ်းၶဝ်။ မိူဝ်ႈ လဵဝ် သိုၵ်းမၢၼ်ႈႁၢမ်ႈဝႆႉဢမ်ႇပၼ်ၶဝ်ႈၼႂ်းဝၢၼ်ႈ။ ပေႃးၶဝ်ႈၵႂႃႇၼႂ်းဝၢၼ်ႈလႄႈ ၶဝ်ႁၼ်ၸိုင် တေၺႃးမၢပ်ႇ ၼႄးဝႃႈ ပဵၼ်ၵူၼ်းဢၼ်လီထၢင်ႇထိူမ်ၼႆႁႄ ႁွင်ႉၵႂႃႇၸႅတ်ႈထၢမ်”။

မိူဝ်ႈဝၼ်းတီႈ 20/05/2025 ၼၼ်ႉၵေႃႈ ၾၢႆႇသိုၵ်းထၼု DPLA ပိုၼ်ၽၢဝ်ႇဢွၵ်ႇဝႆႉဝႃႈ ဢမ်ႇမီးပၢင်တိုၵ်း သင်ၼႂ်းပိုၼ်ႉတီႈသေ သိုၵ်းမၢၼ်ႈၸႂ်ႉၶိူင်ႈမိၼ် ပွႆႇမၢၵ်ႇငူၼ်ႉၵွင်ႉသႂ်ႇၼႂ်းဢိူင်ႇၵျွၵ်ႉၵူႇ ဝႃႈၼႆ။

တႄႇႁူဝ်ပီ 2025 မႃး သိုၵ်းမၢၼ်ႈတင်း သိုၵ်းထၼု ပဵၼ်ပၢင်တိုၵ်းၵၼ် ၼႂ်းၸႄႈဝဵင်းလွၵ်ႉၸွၵ်ႇ ႁၢဝ်ႈႁႅင်း။ ၾၢႆႇၼိုင်ႈၵေႃႈ သိုၵ်းထၼု DPLA ၶဝ်ႈၸွႆႈသိုၵ်းတဢၢင်း TNLA တိုၵ်းသိုၵ်းမၢၼ်ႈ ၼႂ်းထုင်ႉတွင်းၶမ်း ၸႄႈ ဝဵင်းၼွင်ၶဵဝ် ဢၼ်ယၢၼ်ၵႆၵၼ်တင်း ထုင်ႉၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇ မွၵ်ႈ 30 လၵ်းၼၼ်ႉ။

ယွၼ်ႉၼၼ် ၸႄႈဝဵင်းလွၵ်ႉၸွၵ်ႇၼႆႉ ပဵၼ်ဢွင်ႈတီႈ ဢၼ်လမ်ႇလွင်ႈတီႈၼိုင်ႈ ပိူဝ်ႈတႃႇသိုၵ်းထၼု ပႂ်ႉငွႆး ယိုဝ်းသၢႆသိုၵ်းမၢၼ်ႈ ဢၼ်တေဢဝ်ႁႅင်းၶိုၼ်ႈမႃးတၢင်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ဝႃႈၼႆ။

တႅမ်ႈ – ၽူၺ်းၼုမ်ႇ