တႃႇၵုမ်းလႆႈၶိုၼ်း ဝဵင်းၾၢႆၶုၼ် မိူင်းပၢႆး လႅၼ်လိၼ်တႆး – ယၢင်းလႅင်ၼႆႉၼႆသေ တႄႇၵၢင်လိူၼ်ၵျႃၼ်ႊၼႆႉမႃး ၾၢႆႇတၢင်းသိုၵ်းမၢၼ်ႈ ထႅမ်ႁႅင်းသိုၵ်းၶိူဝ်းယႂ်း၊ ၸႂ်ႉၶိူင်ႈမိၼ် ၶိူင်ႈၵွင်ႈလူင် တရူၼ်ႊ ပိုတ်းယိုဝ်း၊ ပၢင်တိုၵ်းသိုပ်ႇပဵၼ်ဝႆႉႁၢဝ်ႈႁႅင်း တီႈၾၢႆႇတူၵ်းဝဵင်းၾၢႆၶုၼ် လုၵ်ႈဢွၼ်ႇ 2 ၵေႃႉ တီႈဝၢၼ်ႈလဢိ ၼႂ်းၸႄႈဝဵင်းၾၢႆၶုၼ် မၢတ်ႇၸဵပ်း။   

မိူဝ်ႈၼႆႉ ဝၼ်းတီႈ 16/06/2025 ယၢမ်းၵၢင်ၼႂ် 11 မူင်း ဢမ်ႇမီးပၢင်တိုၵ်းၼႂ်းဝဵင်းၾၢႆၶုၼ်သေ သိုၵ်းမၢၼ်ႈ ဢဝ်တရူၼ်ႊ 2 လမ်း ပွႆႇမၢၵ်ႇတီႈႁူင်းႁဵၼ်းပရႁိတ တီႈဝၢၼ်ႈလဢိ ၼႂ်းၸႄႈဝဵင်းၾၢႆၶုၼ် ၼၼ်ႉၼႆ ၸုမ်းၵႅတ်ႇၶႄၵူၼ်းမိူင်းဝဵင်းၾၢႆၶုၼ် ပိုၼ်ၽၢဝ်ႇဝႆႉၼင်ႇၼႆ။ 

ယွၼ်ႉၾၢႆႇတၢင်းသိုၵ်းမၢၼ်ႈ ဢဝ်တရူၼ်ႊပွႆႇလႄႈ တူၵ်းတိူဝ်ႉလုၵ်ႈဢွၼ်ႇ သႅၼ်းပၢၼ်ၸၼ်ႉငဝ်ႈ 2 ၵေႃႉ မၢတ်ႇၸဵပ်း။ ယွၼ်ႉလႅင်းၾူၼ်း လႅင်းဢိၼ်ႊတႃႊၼႅတ်ႊ ဢမ်ႇလႆႈလႄႈ ပဵၼ်လုၵ်ႈလၢင်းၽႂ် ၸိုဝ်ႈသင် ဢၼ်ဝႃႈၼၼ်ႉတႄႉ ဢမ်ႇမီးၽႂ်ယိုၼ်ယၼ်။

ၵူၼ်းၸၢႆး ပၢႆႈၽေးသိုၵ်း ဝဵင်းၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ -“ၼႂ်းၶၢဝ်းတၢင်းဝူင်ႈဝၢင်ႈၼႆႉ ၾၢႆႇတၢင်းသိုၵ်းမၢၼ်ႈ ထႅမ်ႁႅင်းသိုၵ်းမႃးၶိူဝ်းယႂ်းလႄႈ လႆႈငိၼ်းသဵင်ၵွင်ႈသဵင်မၢၵ်ႇ ၵူႈဝၼ်း ၊ မိူဝ်ႈဝႃးၼႆႉ ၶိူင်ႈမိၼ်သိုၵ်းမၢၼ်ႈ မႃးပၼ်ႇ 2-3 ၵမ်း ၊ ၼႂ်ၼႆႉၵေႃႈ သိုၵ်းမၢၼ်ႈ ဢဝ်တရူၼ်ႊပွႆႇတၢင်းဝၢၼ်ႈလဢိၼႆႉ”- ဝႃႈၼႆ။

ယၢမ်းလဵဝ် ပၢင်တိုၵ်းသိုပ်ႇပဵၼ်ႁၢဝ်ႈႁႅင်းဝႆႉ တၢင်းဝၢၼ်ႈလွႆပဝ်း ၊ဝၢၼ်ႈလႁႄႇ၊ ၼႂ်းဝၢၼ်ႈ ၸိူဝ်းမီးၾၢႆႇ တူၵ်းဝဵင်းၾၢႆၶုၼ်လႄႈ ဝၢၼ်ႈဢၼ်မီးၼႂ်းၸႄႈဝဵင်းမိူင်းပၢႆး ၸိူဝ်းၼၼ်ႉ။ ၵူၼ်းမိူင်းၸိူဝ်းယူႇၸမ်ပၢင် တိုၵ်းဝႆႉၼၼ်ႉ လႆႈငိူင်ႉပၢႆႈၶဝ်ႈၼႂ်းထိူၼ်ႇၼႂ်းၶိူဝ်း လူဝ်ႇတၢင်းၸွႆႈထႅမ်ဝႆႉတင်းၼမ် ဝႃႈၼႆ။

ၵူၼ်းၸၢႆး ပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ -“တေႃႈလဵဝ် ၵူၼ်းမိူင်းၸိူဝ်းမီးသူၼ်ၵေႃႈ ၵႂႃႇယူႇၼႂ်းသူၼ် ၊ ၸႃႉဢမ်ႇမီးသူၼ်ႁႆႈၵေႃႈ ပၢႆႈၶဝ်ႈထိူၼ်ႇၶဝ်ႈၶိူဝ်းဝႆႉ၊ ယွၼ်ႉလႆႈငိၼ်းသဵင်ၵွင်ႈ သဵင်မၢၵ်ႇၵူႈဝၼ်း လႄႈ ယူႇဢမ်ႇပေႃးႁၢင်ႇၵၼ် ၾၢင်ႉသေလႆႈယူႇဝႆႉ၊ ယွၼ်ႉလႆႈယူႇၼႂ်းထိူၼ်ႇၼႂ်းၶိူဝ်းလႄႈ ၼမ်ႉၵေႃႈ ဢမ်ႇမူတ်းသႂ်၊ ၽႃႈယၢင်မူဝ်းၵႃႇၵေႃႈ ဢမ်ႇၵုမ်ႇထူၼ်ႈ ၶဝ်ႈၼမ်ႉတၢင်းၵိၼ်ၵေႃႈလူဝ်ႇ ပဵၼ်ဢၼ်ယၢပ်ႇ ၸႂ်လၢႆလွင်ႈဝႆႉ”- ဝႃႈၼႆ။ 

မိူၼ်ၼင်ႇၼႆ ၾၢႆႇတၢင်း PDF မိူင်းပၢႆး (MBPDF) ပိုၼ်ၽၢဝ်ႇလၢတ်ႈဝႆႉဝႃႈ – ၼႂ်းဝၼ်းတီႈ 14/06/2025 ယၢမ်းဝၢႆးဝၼ်း 2 မူင်း ၾၢႆႇတၢင်းသိုၵ်းမၢၼ်ႈ လၢမ်းယိုဝ်းၵွင်ႈလူင် တီႈၾၢႆႇတႂ်ႈမိူင်းပၢႆး 7 လုၵ်ႈ ၊ ႁဵတ်းႁႂ်ႈႁိူၼ်းၵူၼ်းပိုၼ်ႉတီႈ လူႉၵွႆလႄႈ ၵူၼ်းဝၢၼ်ႈ 2 ၵေႃႉ မၢတ်ႇၸဵပ်း ဝႃႈၼႆ။

ဝၢႆးသိုၵ်းမၢၼ်ႈ ယိုတ်းမိူင်းမႃး ၸႄႈဝဵင်းမိူင်းပၢႆး၊ ၾၢႆၶုၼ်လႄႈ ၸွမ်းလႅၼ်လိၼ်တႆး – ယၢင်းလႅင် ၼႂ်းၸႄႈဝဵင်းလွႆၶေႃ သိုၵ်းမၢၼ်ႈ ယိုတ်းမိူင်းတင်း သိုၵ်း PDF ပဵၼ်ပၢင်တိုၵ်းၵၼ် ႁၢဝ်ႈႁႅင်း ၸွမ်းထုင်ႉသၼ်လွႆ။ ယၢမ်းလဵဝ် ၾၢႆႇတၢင်းသိုၵ်းမၢၼ်ႈ ထူဝ်းသိုၵ်းၶဝ်ႈမႃးလႄႈ ပၢင်တိုၵ်းသိုပ်ႇပဵၼ်ႁၢဝ်ႈႁႅင်းဝႆႉ – ဝႃႈၼႆ။