ၼႂ်းဝၼ်းတီႈ 13/06/2025 (ဝၼ်းသုၵ်း) ၼႆႉ လူမ်းလႅင်ႉတၢႆႇၾူၼ်း ဝူႇတိတ်ႉ ၽတ်ႉထွင်းၶဝ်ႈတီႈမိူင်းၶႄႇ ပွတ်းၸၢၼ်း ၵူၼ်းမိူင်းၼပ်ႉႁူဝ်မိုၼ်ႇ လႆႈငိူင်ႉပၢႆႈတီႈလွတ်ႈၽေးဝႆႉ၊ ႁူင်းႁဵၼ်း၊ သၢႆသဵၼ်ႈတၢင်းလႄႈ သၢႆ ၵၢၼ်မိၼ်ၵမ်ႈၼမ် လႆႈပိၵ်ႉဢိုတ်းဝႆႉ ဝႃႈၼႆ။

တီႈၸႄႈတွၼ်ႈလႄႈ ဝဵင်း 6 တီႈ ၼႂ်းမိူင်းၶႄႇ ႁူပ်ႉၽေးလူမ်းလႅင်ႉ တၢႆႇၾူၼ်းဝႆႉသေ ၾူၼ်တူၵ်းႁႃႇယႂ်ႇ။ ၵူၼ်းႁဵတ်းၵၢၼ်ၸွမ်းႁိူဝ်း 4,000 ပၢႆ တီႈၼႃႈၼမ်ႉပၢင်ႇလၢႆႇၼၼ်ႉ လႆႈငိူင်ႉပၢႆႈမႃးယူႇဝႆႉၼိူဝ်ၵွင်း။ တီႈၵုၼ်ႁၢႆႊၼၢၼ်ႊၼၼ်ႉ လႆႈၵိုတ်းယင်ႉဝႆႉ သၢႆၵၢၼ်မိၼ်လႄႈ သၢႆရူတ်ႉၾႆးတင်းသဵင်ႈၼႆ – ႁွင်ႈၵၢၼ်ၶၢဝ်ႇ ၼႂ်းမိူင်းၶႄႇ ႁၢႆးငၢၼ်းဝႆႉၼင်ႇၼႆ။

လူမ်းလႅင်ႉတၢႆႇၾူၼ်း ဝူႇတိတ်ႉ ဢၼ်ပဵၼ်မႃးၼႂ်းမိူင်းၶႄႇ ၵမ်းႁႅၵ်ႈ ၼႂ်းပီၼႆႉ တႄႇၽတ်ႉထွင်းၶဝ်ႈ ၸဵမ် မိူဝ်ႈဝၼ်းပုတ်ႉပူၼ်ႉမႃးသေ ၼႂ်းၸႄႈမိူင်းမၢင်တီႈ လႆႈပိုၼ်ၽၢဝ်ႇငဝ်းလၢႆးၶိုၵ်ႉၶၵ်ႉ ဝႃႈၼႆ။

မိူဝ်ႈပီပူၼ်ႉမႃးၼၼ်ႉၵေႃႈ ယွၼ်ႉလူမ်းလႅင်ႉတၢႆႇၾူၼ်း ၽတ်ႉထွင်းၶဝ်ႈ တီႈမိူင်းၶႄႇပွတ်းဢွၵ်ႇ၊ မိူင်းၾိလိပ်ႉပိၼ်ႊသ်လႄႈ ထၢႆႊဝၼ်ႊၸိူဝ်းၼၼ်ႉႁၢဝ်ႈႁႅင်း ထိုင်တီႈၵူၼ်းလူႉတၢႆဢမ်ႇယွမ်း 30 ၵေႃႉ ဝႃႈၼႆ။