ဝၼ်းတီႈ 12/06/2025 ယၢမ်းၵၢင်ဝၼ်းၼႆႉ ၶိူင်ႈမိၼ် Air India ဢၼ်လုၵ်ႉတီႈဝဵင်းဢႃႇမၢတ်ႉတႃႇ ပၢတ်ႉ မိူင်းဢိၼ်ႊတီႊယိူဝ်ႊ တေမိၼ်ၵႂႃႇတီႈဝဵင်းလူင်လၼ်ႊတၼ်ႊ (London) ၼၼ်ႉ ယၢတ်ႇ တူၵ်းသႂ်ႇ ၼိူဝ်ႁူင်းသဝ်း လုၵ်ႈႁဵၼ်းၾၢႆႇပၢႆးမေႃယႃ ႁိမ်းဝၢင်းၶိူင်ႈမိၼ်ၼၼ်ႉသေ မီးၵူၼ်းလူႉတၢႆ 240 ပၢႆ ၊ ၵူၼ်းလွတ်ႈတၢင်းတၢႆ မီးၵေႃႉလဵဝ် ပဵၼ်ၵူၼ်းၸၢႆး ၵူၼ်းမိူင်း UK ၊ ၼင်ႈတီႈမၢႆတင်ႇ A – 11၊ ယၢမ်းလဵဝ် သူင်ႇယူတ်းယႃတူဝ်ဝႆႉတီႈႁူင်းယႃ ဝႃႈၼႆ။
ၶိူင်ႈမိၼ်ၼၼ်ႉ ပဵၼ်သႅၼ်း Boeing 787 – 8 Dreamliner ။ ဝၢႆးလုၵ်ႉတီႈ ဝၢင်းၶိူင်ႈမိၼ်၊ မိၼ်ၶိုၼ်ႈ ၵႂႃႇယဝ်ႉဢမ်ႇႁိုင် ယၢတ်ႇတူၵ်းၵႂႃႇ။ ၼိူဝ်ၶိူင်ႈမိၼ်ၼၼ်ႉ ပႃးၵူၼ်းဢွၵ်ႇၶၢဝ်းတၢင်း 230 ပၢႆလႄႈ ၵူၼ်းႁဵတ်းၵၢၼ်ၼိူဝ်ၶိူင်ႈမိၼ် 12 ၵေႃႉ ႁူမ်ႈသဵၼ်ႈ 242 ၵေႃႉ။ ၵမ်ႈၼမ်ပဵၼ်ၵူၼ်းမိူင်းဢိၼ်ႊတီႊ ယိူဝ်ႊ 169 ၵေႃႉလႄႈ ၵူၼ်းမိူင်း UK 53 ၵေႃႉ၊ ၵူၼ်းမိူင်း ပေႃႊတူႊၵီႊလႄႈ ၶၼေႊတိူဝ်ႊၵေႃႈ ပႃးၸွမ်း လၢႆလၢႆၵေႃႉ။
ဢွင်ႈတီႈၶိူင်ႈမိၼ်ယၢတ်ႇတူၵ်းၼၼ်ႉ ထူပ်းႁၼ်ၶၢပ်ႈတူဝ်ၵူၼ်း မွၵ်ႈ 200 ၵေႃႉ ဢၼ်မၢတ်ႇၸဵပ်းသေ ၶၢမ်ႇယူတ်းယႃတူဝ်ဝႆႉတီႈႁူင်းယႃ မီးယူႇ 40 ၵေႃႉၼႆ – သိုဝ်ႇၶၢဝ်ႇ ႁွင်ႈၵၢၼ်ဢိၼ်ႊတီႊယိူဝ်ႊ ANI ႁၢႆးငၢၼ်းဝႆႉၼင်ႇၼႆ။
ယွၼ်ႉသင်လႄႈ ၶိူင်ႈမိၼ်ယၢတ်ႇတူၵ်းဢၼ်ဝႃႈၼၼ်ႉတႄႉ ၽူႈမီးပုၼ်ႈၽွၼ်းၶဝ် ပႆႇပိုၼ်ၽၢဝ်ႇ ပဵၼ်တၢင်းၵၢၼ်။ ၵွၼ်ႇၼႃႈၶိူင်ႈမိၼ် တေယၢတ်ႇတူၵ်းၼၼ်ႉ လႆႈလွင်ႈၵပ်းသိုပ်ႇၶိုၵ်ႉၶၵ်ႉယူႇသေ တႃႉ ဝၢႆးတွင်ႈထၢမ်ၵႂႃႇၶိုၼ်း လွင်ႈၵပ်းသိုပ်ႇၶၢတ်ႇၵႂႃႇ ဝႃႈၼႆ။
ၶိူင်ႈမိၼ် သႅၼ်း Boeing 787 – 8 Dreamliner ၼႆႉ တႄႇၶူင်သၢင်ႈႁဵတ်းဢွၵ်ႇမႃး မိူဝ်ႈပီ 2009 ၊ သႅၼ်းၶိူင်ႈမိၼ်ၼႆႉမီးဝႆႉ 1,000 လမ်းပၢႆသေ လၢႆၸိုင်ႈမိူင်းၵေႃႈ ဢွၼ်ၵၼ်ၸႂ်ႉတိုဝ်းၵၼ်ဝႆႉ။
မိူဝ်ႈႁၢင်ပီ 2024 လိူၼ်တီႊသႅမ်ႊပိူဝ်ႊ ဝၼ်းတီႈ 29 ၼၼ်ႉၵေႃႈ ၶိူင်ႈမိၼ် မိူင်းၵူဝ်ႊရီႊယိူဝ်ႊၸၢၼ်း လမ်းၼိုင်ႈ ၽႃႇသႂ်ႇႁူဝ်ႉ ဝၢင်းၶိူင်ႈမိၼ်သေၾႆးမႆႈ၊ မီးၵူၼ်းလူႉတၢႆ 179 ၵေႃႉ၊ ၵူၼ်းလွတ်ႈတၢင်းတၢႆ မီး 2 ၵေႃႉၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ