တႄႇၼႂ်းလိူၼ်ၵျႃၼ်ႊ ဝူင်ႈထီႉသွင်ၼႆႉမႃး  ၾူၼ်တူၵ်းထပ်းၵၼ်လၢႆဝၼ်းသေ ၼမ်ႉႁူၺ်ႈၼမ်ႉလွႆၼွင်း မႄႈၼမ်ႉၵႄးၼမ်ႉၵိုင်ႉၵၢင်ႉလူၼ်ႉၾင်ႇ ၼႂ်းပွၵ်ႉၼႂ်းယွမ်ႇ တီႈၸိုင်ႈတႆးပွတ်းၸၢၼ်း လၢႆလၢႆဝဵင်း ႁဵတ်းႁႂ်ႈၵူၼ်းမိူင်းမႆႈၸႂ် မၢၵ်ႇၶဝ်ႈတဝ်ႈၼမ်ႉ ၼႂ်းသူၼ်ၼႂ်းႁႆႈလူႉသုမ်း။

ၼႂ်းၶၢဝ်းတၢင်း 2-3 ဝၼ်းၼႆႉ ၾူၼ်တူၵ်းထပ်းၵၼ် ဢမ်ႇထၢတ်ႇ ႁဵတ်းႁႂ်ႈၼမ်ႉထူမ်ႈသူၼ်ထူဝ်ႇလိၼ် ၵူၼ်းဝၢၼ်ႈတွင်ႇပူဝ်ႉၵျီး ထုင်ႉၼွင်ႁၢႆးယႃႈ လူႉသုမ်းၼပ်ႉႁူဝ်သိပ်းသႅၼ် ဝႃႈၼႆ။

ၼၢင်းယိင်း ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၾူၼ်တူၵ်းဢမ်ႇထၢတ်ႇ ၼမ်ႉၵေႃႈ ၶိုၼ်ႈမႃးၵူႈဝၼ်း ၊ ထူဝ်ႇလိၼ်ဢၼ်ၽုၵ်ႇဝႆႉၼၼ်ႉ ထႅင်ႈ 7 ဝၼ်းၵေႃႈလူဝ်ႇထူၺ်ႈယဝ်ႉ ၼမ်ႉၵိုင်ႉၵၢင်ႉလုပ်ႇၶဝ်ႈသူၼ်သေ သုမ်းပႅတ်ႈမူတ်း။ ၸိူဝ်ႉၽၼ်းထူဝ်ႇလိၼ်ၽုၵ်ႇဝႆႉ 29 ပေႇၼၼ်ႉ ပႃးၵႂႃႇမူတ်း”- ဝႃႈၼႆ။

ဝၢႆးသေ ၼမ်ႉထူမ်ႈၼမ်ႉၼွင်းၼႂ်းလိူၼ်ဢေႃႊၵတ်ႊသ် ပီ 2024 ၼၼ်ႉမႃးၵူၼ်းၼႂ်းပိုၼ်ႉတီႈ ၼွင်ႁၢႆးယႃႈ လႆႈထူပ်းၽေးၽႅၼ်လိၼ်ဝႆထႅင်ႈ။ ဝၢႆးၼၼ်ႉ ၵူၼ်းပိုၼ်ႉတီႈ ဢမ်ႇမီးတီႈယူႇတၼ်းသဝ်း ဢမ်ႇၸၢင်ႈႁဵတ်း ၵၢၼ်ႁႃၵိၼ်လဵင်ႉတွင်ႉသင်။ လႆႈပိုင်ႈဢိင်မၢၵ်ႇၶဝ်ႈတဝ်ႈၼမ်ႉ ၸိူဝ်းၵိုတ်းၼႂ်းသူၼ်ဢိတ်းဢွတ်းသေ ၵိၼ် ၵႂႃႇဝၼ်းလႂ်ဝၼ်းၼၼ်ႉၵူၺ်း။ ယၢမ်းလဵဝ် ၼမ်ႉၵိုင်ႉၵၢင်ႉၶိုၼ်ႈမႃးထႅင်ႈလႄႈႁဵတ်းႁႂ်ႈ မၢၵ်ႇၶဝ်ႈတဝ်ႈၼမ်ႉ ဢၼ်ၸင်ႇႁႃၽုၵ်ႇ ႁႃၵိၼ်လဵင်ႉတွင်ႉၼၼ်ႉ လူႉသုမ်းပႃးတိုၼ်းလၢင်ႈ ပဵၼ်ဢၼ်ယၢပ်ႇၽိုတ်ႇဝႆႉ ဝႃႈၼႆ။

ၼၢင်းယိင်း ဝၢၼ်ႈတွင်ႇပူဝ်ႉၵျီး လၢတ်ႈၽူႈတွႆႇႁွၵ်ႈဝႃႈ – “ထူဝ်ႇလိၼ်ၼႆႉ လႆႈၽုၵ်ႇ 100 ဝၼ်းၵူၺ်း ၊ ၼႅတ်ႈၽုၵ်ႇဝႆႉ ၸဵမ်မိူဝ်ႈၼမ်ႉယွမ်းလူင်းၵႂႃႇၼၼ်ႉ၊ ပီၼႆႉ ၼမ်ႉၶိုၼ်ႈ ၾူၼ်တူၵ်းၸဝ်ႉ ယွၼ်ႉၼၼ် ဢမ်ႇတၼ်း လႆႈဢဝ်သင်၊ မိူဝ်ႈၽႅၼ်ႇလိၼ်ဝႆ ၵႃႈၶၼ် ၵုၼ်ႇလိပ်း ဢမ်ႇလႆႈသုင်၊ တေႃႈလဵဝ် ၵုၼ်ႇလိပ်းၶိုၼ်ႈမႃး တိုၵ်ႉၸႂ် ယႂ်ႇဝႆႉယူႇဢေႃႈ ၼမ်ႉသမ်ႉၵိုင်ႉၵၢင်ႉမႃးထူမ်ႈထႅင်ႈ၊ ဢမ်ႇႁူႉတေလႆႈႁဵတ်းၸိူင်ႉႁိုဝ်ယဝ်ႉၶႃႈ ၊ ထူဝ်ႇလိၼ်ၼႆႉ လႆႈလူင်းတိုၼ်းလၢင်းဝႆႉ 10-20 သႅၼ် သုမ်းယဝ်ႉဢေႃႈ ပေႃးၼၼ်”- ဝႃႈၼႆ။

တီႈၼႂ်းၼွင်ႁၢႆးယႃႈ ၼႂ်းၶၢဝ်းတၢင်း 2-3 ဝၼ်းမႃးၼႆႉ ၼမ်ႉၶိုၼ်ႈထိုင် 9 ထတ်း/ ပေႇ ပေႃးၾူၼ်တူၵ်းဢမ်ႇ ထၢတ်ႇၸိူင်ႉၼႆ သူၼ်မၢၵ်ႇၶိူဝ်သူမ်ႈ ၊ မၢၵ်ႇပၵ်ႉ ၊ မၢၵ်ႇၼမ်ႉတဝ်ႈ ၊ မၢၵ်ႇၽိတ်ႉ ၊ မၢၵ်ႇၶိူဝ် ၸိူဝ်းၼၼ်ႉၵေႃႈ ၸၢင်ႈလူႉသုမ်းပႃး မိူၼ်မိူဝ်ႈပီၵၢႆ ၊ ယွၼ်ႉၼၼ်ႉ ယၢမ်းလဵဝ် ၵူၼ်းၼႂ်းၼွင် ဢွၼ်ၵၼ် ၾၢင်ႉၵၼ်သိုဝ်ႉဝႆႉ ထၢၼ်ႇ ၊ ႁၢင်ႈႁႅၼ်း ၶူဝ်းလွင်ႈယႂ်ႇၸပ်းတူဝ်လႄႈ ႁိူဝ်း ၸိူဝ်းၼႆႉဝႆႉၼႆ  – ၵူၼ်းပိုၼ်ႉတီႈလၢတ်ႈ။

မိူၼ်ၼင်ႇၼႆ တီႈဝဵင်းမိူင်းၼၢႆး ဢၼ်ပဵၼ်ယွင်ၶဝ်ႈလူင်တႃႇမိူင်းတႆးပွတ်းၸၢၼ်း ၼၼ်ႉၵေႃႈ ယွၼ်ႉၾူၼ် တူၵ်းဢမ်ႇထၢတ်ႇ ၼမ်ႉၵိုင်ႉၵၢင်ႉသုင်ထူမ်ႈၼႂ်းသူၼ်ႁႆႈၼႃးထႅင်ႈလႄႈ ႁဵတ်းႁႂ်ႈၵူၼ်းမိူင်းမႆႈၸႂ် ၊ ယွၼ်ႉ မိူဝ်ႈပီၵၢႆ ၼႂ်းလိူၼ်ဢေႃႊၵတ်ႊသ်ၼၼ်ႉ ၼမ်ႉထူမ်ႈသူၼ်ႁႆႈၼႃး သုမ်းဢေႊၶိူဝ်ႊ ၸမ် 10,000 ။ ပဵၼ် ဢၼ်လူႉယႂ်သုမ်းၼမ် တွၼ်ႈတႃႇၸဝ်ႈသူၼ် ၸဝ်ႈၼႃး မိူင်းၼၢႆး။

ၸဝ်ႈသူၼ်မိူင်းၼၢႆး လၢတ်ႈၽူႈတွႆႇႁွၵ်ႈဝႃႈ -“မိူဝ်ႈပီၵၢႆ ၼမ်ႉၶိုၼ်ႈၸဝ်ႈသူၼ်ႁႆႈၼႃး လူႉယႂ်သုမ်းၼမ်ၼႃႇ ၊ ပီၼႆႉ ႁဝ်းၶႃႈၼႅတ်ႈလၢင်းႁွင်ႈ တဵင်ၾၢႆယူႇသေတႃႉ ၽိူဝ်ႇၾူၼ်တူၵ်း ႁႃႇသွင်ႁႃႇၵေႃႈၶိုၼ်းထူမ်ႈယဝ်ႉ။ ၼႆႉယင်းပႆႇတူၵ်းႁႅင်းၵွၼ်ႇၶႃႈဢိူဝ်ႈ”- ဝႃႈၼႆ။

မိူၼ်ၼႆၼင်ႇၵဝ်ႇ ၼမ်ႉတဵင်း ဢၼ်ႁူဝ်ၼမ်ႉမီးမိူင်းၵိုင်ၼၼ်ႉၵေႃႈ ၼွင်းလူၼ်ႉၾင်ႇလႄႈ ထူမ်ႈလိၼ် သူၼ်ႁႆႈၼႃးၵူၼ်းမိူင်းၵိုင် – လၢႆးၶႃႈ – လၢင်းၶိူဝ်း။ ႁဵတ်းႁႂ်ႈၵူၼ်းမိူင်းတူၵ်းၸႂ် ဢွၼ်ၵၼ်ႁႅၼ်းၶူဝ်းၶၢႆႉဝႆႉတီႈသုင်။

မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 11/06/2025 ယၢမ်းဝၢႆးဝၼ်း 1 မူင်း ၾူၼ်တူၵ်းဢမ်ႇထၢတ်ႇ ၼမ်ႉႁူၺ်ႈ ၼမ်ႉလွႆၼွင်းၶဝ်ႈၼႂ်းပွၵ်ႉ ၼႂ်းယွမ်ႇ ၼႂ်းဝဵင်းတူၼ်ႈတီး ႁဵတ်းႁႂ်ႈၵူၼ်းပိုၼ်ႉတီႈ ၵႂႃႇမႃးယၢပ်ႇၽိုတ်ႇၵိၼ်းၸႂ် ။ လိူဝ်ၼၼ်ႉ ၼမ်ႉမုတ်း ၼမ်ႉပုင်ႇ ႁူဝ်ၼမ်ႉၵေႃႈၼွင်းလူၼ်ႉ။   

မႄႈၼမ်ႉၵႄးၼမ်ႉ ၼႂ်းၸႄႈဝဵင်းယွင်ႁူၺ်ႈၵေႃႈ ၵိုင်ႉၵၢင်ႉၼွင်းၶိုၼ်ႈလူၼ်ႉၾင်ႇသေ ၶဝ်ႈၼႂ်းပွၵ်ႉၼႂ်း ယွမ်ႇ၊ ၶဝ်ႈၼႂ်းၵၢတ်ႇမင်ႇၵလႃႇ၊ ၸဝ်ႈႁၢၼ်ႉၶၢႆၶူဝ်းၼႂ်းၵၢတ်ႇ ၼႂ်းဝဵင်းၵမ်ႈၽွင်ႈၵေႃႈ လူႉသုမ်း ၵမ်ႈၽွင်ႈ ၵေႃႈ တၼ်းၶၢႆႉပၢႆႈၶိုၼ်ႈဝႆႉတီႈသုင်။

ၵဵဝ်ၵပ်းလွင်ႈၼႆႉ ၸဝ်ႈသူၼ်ၸဝ်ႈၼႃးလႄႈ ၵူၼ်းဢၼ်ယူႇၸမ်ၼွင် – ႁွင်ႈၼမ်ႉ ၵႄးၼမ်ႉ ႁႂ်ႈဢွၼ်ၵၼ် ပႂ်ႉထွမ်ႇၶၢဝ်ႇငၢဝ်းၾိင်ႈၽႃႉရႃႇသီလႄႈ ၶႂ်ႈႁႂ်ႈႁၢင်ႈႁႅၼ်း ၶူဝ်းၶွင်လွင်ႈယႂ်ႇၸပ်းတူဝ်ဝႆႉသေ ပေႃးၼမ်ႉၵိုင်ႉၵၢင်ႉၶိုၼ်ႈမႃးႁႂ်ႈငိူင်ႉပၢႆႈၵၼ် လႆႈၵမ်းလဵဝ် ယွၼ်ႉၸၢင်ႈမီးၽေး တႃႇဢႃႈသၢၵ်ႈသၢႆၸႂ်ၼႆ – ၵူၼ်းပိုၼ်ႉတီႈ ပၼ်ၾၢင်ႉပႃးဝႆႉၼင်ႇၼႆ။