မိူဝ်ႈၼႆႉ ဝၼ်းတီႈ 12/06/2025 ယၢမ်းၵၢင်ၼႂ်ၸဝ်ႉမွၵ်ႈ 1:25 မူင်းၼၼ်ႉ သိုၵ်းမၢၼ်ႈ ၸႂ်ႉတိုဝ်းၶိူင်ႈမိၼ်တိုၵ်း (Jet fighter) သေ ပွႆႇမၢၵ်ႇလူင် ႁႅင်း 500 ပွၼ်ႊ သႂ်ႇတီႈၵျွင်းမုၼ်ၸဝ်ႈလႄႈ ႁူင်းႁဵၼ်း သွင်လုၵ်ႈ တီႈမၢၼ်ႈလီႈ ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။
ယၢမ်းလဵဝ် ၼႂ်းၸႄႈဝဵင်းၼမ်ႉတူႈ တီႈမၢၼ်ႈလီႈၼႆႉ ဢမ်ႇမီးပၢင်တိုၵ်းသင် သဵင်ၵွင်ႈၵေႃႈ ဢမ်ႇတႅၵ်ႇမႃး ႁိုင်ၵႂႃႇပီပၢႆယဝ်ႉသေတႃႉ သိုၵ်းမၢၼ်ႈ ယင်းတိုၵ်ႉသိုပ်ႇၸႂ်ႉၶိူင်ႈမိၼ်တိုၵ်းသေ မႃးပွႆႇမၢၵ်ႇသႂ်ႇ ထႅင်ႈယူႇၼႆ ၵူၼ်းမိူင်း ၵေႃႉယူႇၼႂ်းၸႄႈဝဵင်းၼမ်ႉတူႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
“ၶမ်ႈဝႃးၶဝ်မႃးပွႆႇၼႆႉ ၵတ်ႉၵႃႈ ဢမ်ႇတိူဝ်ႉၺႃးၵူၼ်းသေၵေႃႉလႃႈ။ ဢွင်ႈတီႈၼၼ်ႉ ပဵၼ်ဢွင်ႈတီႈ သဵၼ်ႈတၢင်းလမ်ႇလွင်ႈဢၼ်သိုၵ်းလုၵ်ႉၽိုၼ်ႉ (တဢၢင်း) ၶဝ်လတ်းၵႂႃႇလတ်းမႃးၼၼ်ႉၼႃႇ။ ႁူင်းႁဵၼ်းလႄႈ ၵျွင်းမုၼ်ၸဝ်ႈၼႆႉ ၶႅၼ်ႈတႃႇႁူဝ်ႉၵၼ်ၵူၺ်း။ မုၼ်ၸဝ်ႈၼင်ႈၵျွင်းၵေႃႈ တေႃႉတႄႉတၼ်းလႅၼ်ႈပၢႆႈလွတ်ႈ ၵူၺ်းၼၼ်ႉၼႃႇ။ မိူဝ်ႈလဵဝ် ၵတ်ႉၵႃႈတိုၵ်ႉပဵၼ်ၶၢဝ်း ႁႂ်ႈပေႃႈမႄႈလုၵ်ႈဢွၼ်ႇမႃးဢၢပ်ႈၵျွင်းၵူၺ်း။ ပႆႇလႆႈပိုတ်ႇၵျွင်း။ ၵွပ်ႈၼၼ် ဢမ်ႇတၼ်းတိူဝ်ႉၺႃးၽႂ်”။
လႆႈႁူႉဝႃႈ ႁူင်းႁဵၼ်းဢၼ်ၺႃးသိုၵ်းမၢၼ်ႈ ဢဝ်မၢၵ်ႇလူင် ႁႅင်း 500 ပွၼ်ႊ မႃးပွႆႇသႂ်ႇၼၼ်ႉ ပဵၼ်ႁူင်းႁဵၼ်း ယူႇၾၢႆႇတႂ်ႈ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ၵုမ်းၵမ်သေ ၸုမ်းမေႃသွၼ် တဢၢင်း TLEC ဢွၼ်ႁူဝ် ပိုတ်ႇသွၼ်လိၵ်ႈမၢၼ်ႈဝႆႉ ဝႃႈၼႆ။
တႄႇၽႅၼ်ယၼ်ႇသိုၵ်း 1027 မႃး သိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၾၢႆႇသိုၵ်းတဢၢင်း TNLA ၵုမ်းၵမ်ဝႆႉ ၸႄႈဝဵင်းၼမ်ႉတူႈ။ ဝၢႆးလင်ၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ ၼႂ်းၸႄႈဝဵင်းၼမ်ႉတူႈၼႆႉ သၢမ်ပွၵ်ႈယဝ်ႉ။
သိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇလူင်သႂ်ႇ ၼိူဝ်သဵၼ်ႈတၢင်းၵႃး ဝဵင်းသီႇပေႃႉ- ဝဵင်းၼမ်ႉတူႈၼႆႉ မိူဝ်ႈပီ 2023 လိူၼ်တီႊသႅမ်ႊပိူဝ်ႊၼၼ်ႉ ပွၵ်ႈၵမ်းၼိုင်ႈ၊ ပီ 2024 လိူၼ်ၵျႅၼ်ႊၼိဝ်ႊရီႊ ပဵၼ်ပွၵ်ႈၵမ်းသွင် တိူဝ်ႉၺႃး မေႃသွၼ်ၸၢဝ်းတဢၢင်း ႁူင်းႁဵၼ်းတဢၢင်း (ပလွင်ႈ) TLEC လူႉတၢႆၵႂႃႇ ၵေႃႉၼိုင်ႈ။
ဝၢႆးလင်ၼၼ်ႉ ႁိုင်မႃးမွၵ်ႈပီပၢႆယဝ်ႉ ယဵၼ်ၵႂႃႇတႄႉသေ ဝၼ်းတီႈ 12 လိူၼ်ၵျုၼ်ႊၼႆႉ သိုၵ်းမၢၼ်ႈ ၸင်ႇဢဝ်ၶိူင်ႈမိၼ်တိုၵ်းမႃးပွႆႇမၢၵ်ႇသႂ်ႇထႅင်ႈ ပဵၼ်ပွၵ်ႈၵမ်းသၢမ် ဝႃႈၼႆ။
ယၢမ်းလဵဝ် ၵူၼ်းၼႂ်းပိုၼ်ႉတီႈ ၸိူဝ်းယူႇသဝ်း ၼႂ်းၸႄႈဝဵင်းၼမ်ႉတူႈ ႁိမ်းမၢၼ်ႈလီႈ ဢွၼ်ၵၼ်ၵူဝ်သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇထႅင်ႈၼႆလႄႈ ပၢႆႈၵႂႃႇသွၼ်ႈယူႇၸွမ်းၼႂ်းထဵင်ႁႆႈထဵင်ၼႃးလႄႈ တၢင်းဝၢၼ်ႈပၢင်ႇသပ်ႉပေႇၼၼ်ႉ ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ