ဝၼ်းတီႈ 11/06/2025 ယၢမ်းၵၢင်ၼႂ်ၼႆႉ ၸုမ်းၶႃႈႁၢပ်ႇၵၢၼ် ဢၼ်ယူႇတႂ်ႈဢႃႇၼႃႇသိုၵ်းမၢၼ်ႈၵုမ်းၵမ်ၼၼ်ႉ ၸၢမ်းၸႂ်ႉတိုဝ်း ၶိူင်ႈၸၢၵ်ႈပၼ်ၶႅပ်းၵၢင်ၸႂ် ၼိူဝ်ဢွၼ်ႊလၢႆႊ (MEVM) တီႈႁွင်ႈပၢင်ၵုမ် လုမ်းၶႃႈႁၢပ်ႇၵၢၼ်ၸႄႈမိူင်းတႆး တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။
ၼႂ်းပၢင်ၸၢမ်းၸႂ်ႉတူၺ်း ၸၢၵ်ႈပၼ်ၶႅပ်းၵၢင်ၸႂ် ၼိူဝ်ဢွၼ်ႊလၢႆးၼၼ်ႉ မီးၸွမ်ၽွင်းလူင်မိူင်းတႆး ဢူးဢွင်ႇဢွင်ႇ၊ ၽူႈၵွၼ်းတိူင်းသိုၵ်းပွတ်းဢွၵ်ႇ ၸွမ်ႁၢၼ် ၸေႃႇမိၼ်းလတ်ႉလႄႈ ၶႃႈႁၢပ်ႇၵၢၼ် ၼႂ်းၸုမ်းၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းႁူမ်ႈတုမ် ၶဝ်ႈႁူမ်ႈၸွမ်းၵႂႃႇ ၼႆယဝ်ႉ။
ၼင်ႇႁိုဝ် တေၸတ်းႁဵတ်းလႆႈ ပၢင်လိူၵ်ႈတင်ႈ ၼႂ်းႁၢင်လိူၼ်တီႊသႅမ်ႊပိူဝ်ႊ ပီ 2025 ဢမ်ႇၼၼ် ႁူဝ်ပီ 2026 ၼႆႉ ၾၢႆႇၸွမ်ၸိၵ်းသိုၵ်းမိၼ်းဢွင်ႇလၢႆႇ ၶဝ်ႈႁႃဢုပ်ႇဢူဝ်းၽူႈၼမ်းၸိုင်ႈမိူင်း မိူင်းၶႄႇ၊ မိူင်းရတ်ႉသျႃး၊ မိူင်းထႆးၸိူဝ်းၼႆႉသေ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ လူင်ပွင်ၸိုင်ႈမိူင်းၼွၵ်ႈၶဝ်ၵေႃႈ ပၼ်ႁႅင်းတႃႇၸတ်းပၢင်လိူၵ်ႈတင်ႈယူႇလႄႈ တေဢၢၼ်း ၸတ်းႁဵတ်းႁႂ်ႈပေႃးလႆႈ ၼႆယဝ်ႉ။
ယၢမ်းလဵဝ် ၼႂ်းမိူင်းႁူမ်ႈတုမ် လၢႆလၢႆၸႄႈမိူင်း၊ ၸႄႈတိူင်းသမ်ႉ ပဵၼ်ပၢင်တိုၵ်းၵၼ်ဝႆႉတင်း ၸုမ်းသိုၵ်းၸၢဝ်းၶိူဝ်းယူႇလႄႈ တႃႇတေၸတ်းႁဵတ်းလႆႈပၢင်လိူၵ်ႈတင်ႈၼႆႉ ဢမ်ႇငၢႆႈၼႆ ၽူႈထတ်းသၢင်ၵၢၼ်မိူင်းၶဝ် ဢွၼ်ၵၼ်ထတ်းသၢင်လၢတ်ႈဝႆႉၼင်ႇၼႆ။
ဢူးမိၼ်ႉၵျၢႆႇ (ဦးမြင့်ကြိုင်) ၽွင်းလူင် ႁွင်ႈၵၢၼ်ၾၢႆႇၵူတ်ႇထတ်းၶဝ်ႈဢွၵ်ႇမိူင်း မိူင်းႁူမ်ႈတုမ်၊ ႁူဝ်ပဝ်ႈ ၶွမ်ႊမတီႊ ၾၢႆႇၸတ်းၵၢၼ် ၵဵပ်းသဵၼ်ႈမၢႆႁူဝ်ၼပ်ႉၵူၼ်းၵေႃႈ ပိုၼ်ၽၢဝ်ႇပၢၵ်ႇလၢတ်ႈဝႆႉဝႃႈ –“တွၼ်ႈတႃႇ တေၸတ်းႁဵတ်းပၢင်လိူၵ်ႈတင်ႈၼႆႉ တေလႆႈၵဵပ်းဢဝ်သဵၼ်ႈမၢႆၵူၼ်းၸိူဝ်းတဵမ် ဢႃယု 18 ပီ လႄႈ 18 ပီၶိုၼ်ႈၼိူဝ်ၵႂႃႇ ႁႂ်ႈပေႃးတႅတ်ႈတေႃး။ တႃႇႁဵတ်းလႆႈၸိူင်ႉၼၼ်သမ်ႉ တေလႆႈလူင်းၵႂႃႇၼႂ်းပိုၼ်ႉတီႈသေ ၵဵပ်းဢဝ်ၵမ်းႁိူၼ်းလႂ်ႁိူၼ်းၼၼ်ႉၵွၼ်ႇ” – ဝႃႈၼႆ။
လႆႈႁူႉဝႃႈ ၾၢႆႇသိုၵ်းမၢၼ်ႈ တေၸတ်းပၢင်လိူၵ်ႈတင်ႈၵႂႃႇ တႃႇ 267 ၸႄႈဝဵင်း၊ တေၸႂ်ႉပိူင် FPTP ဢၼ်မီးတီႈပွင်ႇဝႃႈ ၽူႈတႅၼ်းၵေႃႉလႂ် လႆႈၶႅပ်းၵၢင်ၸႂ်ၼမ်သုတ်းၵေႃႈ ၵေႃႉၼၼ်ႉပေႉ၊ တေၸႂ်ႉတိုဝ်းပႃး ပိူင် PR ဢၼ်မီးၵႂၢမ်းမၢႆဝႃႈ ၸွမ်းၼင်ႇၶႅပ်းၵၢင်ၸႂ် ဢၼ်ၵူၼ်းမိူင်းမႃးသႂ်ႇၶႅပ်းၵၢင်ၸႂ်ၼၼ်ႉ ၼပ်ႉသွၼ်ၸွမ်းဝၢၵ်ႈသေ ၸႅၵ်ႇမႅင်ႇပၼ်တီႈၼင်ႈ ၽူႈတႅၼ်းၵႂႃႇ ၼႆယဝ်ႉ။
ပၢင်လိူၵ်ႈတင်ႈဢၼ်သိုၵ်းမၢၼ်ႈ တေၸတ်းႁဵတ်းၼႆႉ ၾၢႆႇလူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ၶဝ်တႄႉ ပိုၼ်ၽၢဝ်ႇပၢၵ်ႇလၢတ်ႈဝႆႉဝႃႈ ၼင်ႇႁိုဝ် တေဢမ်ႇပဵၼ်လႆႈပၢင်လိူၵ်ႈတင်ႈၼၼ်ႉ လႆႈၸႂ်ႉတိုဝ်းလၢႆးလႂ်ၵေႃႈလီ တေသၢၼ်ၶတ်းၵႂႃႇႁႂ်ႈပေႃးလႆႈ ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ