ဝၼ်းတီႈ 10/06/2025 ယၢမ်းၵၢင်ဝၼ်း 12:15 မိၼိတ်ႉ တပ်ႉသိုၵ်းပူတ်းပွႆႇၵူၼ်းမိူင်း PLA လႆႈပိုတ်းယိုဝ်း ၶိူင်ႈမိၼ် ၵျႅတ်ႉၾၢႆႇတိူဝ်ႇသိုၵ်းမၢၼ်ႈ တူၵ်းလမ်းၼိုင်ႈ ၽွင်းၶဝ်ႈတိုၵ်းတပ်ႉပလိၵ်ႈမၢၼ်ႈ ၼႂ်းၸႄႈဝဵင်းပလႄး တိူင်းၸႄႈၵႅင်း ဝႃႈၼႆ။

တႄႇဢဝ်ဝၼ်းတီႈ 02/06/2025 ၼၼ်ႉမႃး PLA တင်း တပ်ႉႁူမ်ႈႁွမ်း ထူဝ်းသိုၵ်းၶဝ်ႈတိုၵ်း ႁူင်းပလိၵ်ႈမၢၼ်ႈၵၢၼ်ႉတွၵ်ႉ ဢၼ်မီးဝႆႉတီႈၼိူဝ်သဵၼ်ႈတၢင်းပလႄး – ၵၢၼ်ႉၵေႃး၊ မီးၾၢႆႇတူၵ်းဝဵင်းပလႄး ယၢၼ်ၵႆဝဵင်းမွၵ်ႈ 14 လၵ်း။ တေႃႇထိုင်ဝၼ်းတီႈ 10 ယၢမ်းၵၢင်ၼႂ် ပၢင်တိုၵ်းတိုၵ်ႉသိုပ်ႇပဵၼ်ဝႆႉ ႁၢဝ်ႈႁႅင်း။

ဝၼ်းၼၼ်ႉ ႁူဝ်ၼႃႈ သိုၵ်းမၢၼ်ႈယိုတ်းမိူင်း ၸွမ်ၸိၵ်းသိုၵ်း မိၼ်းဢွင်ႇလၢႆႇလႄႈ မေးၼၢင်း တိုၵ်ႉမီးဝႆႉ တီႈဝဵင်းၸႄႈၵႅင်း။ ဝၢႆးၸုမ်းသိုၵ်း PLA ယိုဝ်းၶိူင်ႈမိၼ်သိုၵ်းမၢၼ်ႈ တူၵ်းယဝ်ႉဢမ်ႇႁိုင် မိၼ်းဢွင်ႇလၢႆႇတင်း မေးၼၢင်း ၶိုၼ်းဝၢႆႇပွၵ်ႈမိူဝ်းၵႂႃႇၶိုၼ်းၵမ်းလဵဝ် ဝႃႈၼႆ။

ၵဵဝ်ႇၵပ်းလွင်ႈၼႆႉသေ ၾၢႆႇတပ်ႉသိုၵ်းမၢၼ်ႈတႄႉ ပိုၼ်ၽၢဝ်ႇဢွၵ်ႇမႃးဝႃႈ ၶိူင်ႈမိၼ်တပ်ႉသိုၵ်းလမ်းၼိုင်ႈ ယွၼ်ႉၶိူင်ႈၸၢၵ်ႈၵိုင်ႉၵၢင်ႉၵွႆသေ လႆႈယၢတ်ႇတူၵ်းၾႆးမႆႈလူႉၵွႆၵႂႃႇ ဝႃႈၼႆ။

ၼႂ်းဝၼ်းတီႈ 20 လိူၼ်မေႊပူၼ်ႉမႃးၼႆႉၵေႃႈ ၶိူင်ႈမိၼ်သိုၵ်းမၢၼ်ႈ 3 လမ်း ဢၼ်ၵႂႃႇသူင်ႇၶဝ်ႈၼမ်ႉတၢင်း ၵိၼ်လႄႈ မၢၵ်ႇမိုဝ်ႉၸိုၼ်းယၢမ်း တီႈၼႂ်းပၢင်တိုၵ်း တီႈဝဵင်းမၢၼ်ႈမေႃႇ ၸႄႈမိူင်းၶၢင်ၼၼ်ႉ ၺႃးတပ်ႉသိုၵ်းၶၢင် (KIA) ယိုဝ်းတူၵ်း 2 လမ်း – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။