တႄႇႁူဝ်လိူၼ်ၵျုၼ်ႊမႃးၼႆႉ မီးၶၢဝ်ႇလိုဝ်းၵၼ်ဢွၵ်ႇမႃးဝႃႈ သိုၵ်းၵဝ်ႈၵၢင်ႉ MNDAA ၸိူဝ်းတူင်ႉၼိုင်ယူႇ ၼႂ်းၸႄႈဝဵင်းသႅၼ်ဝီ တေလႆႈထွႆပၼ်ၶိုၼ်းသိုၵ်းမၢၼ်ႈၶိုၼ်း ႁႂ်ႈယဝ်ႉတူဝ်ႈတင်းသဵင်ႈ ၼႂ်းလိူၼ်သႅပ်ႊထႅမ်ႊပိူဝ်ႊ ဝႃႈၼႆ။

ၵူၼ်းဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် ဢမ်ႇႁၼ်ၶဝ်တူင်ႉတိုၼ်ႇသင်။ ၶဝ်ပၢႆ ယွၼ်းၵူၼ်းထႅင်ႈၵွၼ်ႇ။ ၵၢၼ်ဢုပ်ႉပိူင်ၶဝ်ၵေႃႈ မိူၼ်ၵဝ်ႇၵူၺ်း။ ႁၢၼ်ႉတၢင်းၵိၼ်လႄႈ ႁၢၼ်ႉလဝ်ႈ (အရက်ဘား) ၊ ႁူင်းပျေႃႇမူၼ်ႈ KTV ၶဝ်၊ ပၢင်တေႃႇလွင်းၶဝ် ၸိူဝ်းၼႆႉ တိုၵ်ႉႁဵတ်းတိုၵ်ႉမီးမိူၼ်ၵဝ်ႇၵူၺ်း။ ဢမ်ႇပိူင်ႈသင်၊ ဢမ်ႇမီးလွင်ႈလၢၵ်ႇလၢႆးသင်မႃးထႅင်ႈ”- ဝႃႈၼႆ။

ၶၼ်ၵုၼ်ႇ ၶူဝ်းၵႃႉတၢင်းၶၢႆ ၵူႈၸိူဝ်းၸိူဝ်း ၼႂ်းၸႄႈဝဵင်းသႅၼ်ဝီၼႆႉ ယင်းတိုၵ်ႉၶိုၼ်ႈသုင် မိူၼ်ၵဝ်ႇယူႇ။ ၶၼ်လႅၵ်ႈငိုၼ်းသမ်ႉ ပေႃးငိုၼ်းၶႄႇ 100 ယႂၼ်ႊ လႆႈငိုၼ်းမၢၼ်ႈ 6 မိုၼ်ႇပျႃး။ ၼမ်ႉမၼ်းၵိၼ် ၼိုင်ႈၸွႆႉလႂ် 17,000 ပျႃး၊ ၶဝ်ႈသၢၼ် 30 ၸွႆႉလႂ် ၼိုင်ႈထူင် တႅမ်ႇသုတ်း 150,000 ပျႃး သင်ပဵၼ်ၶဝ်ႈသၢၼ် ဢၼ်ၶႅမ်ႉသုတ်းၸိုင် ၼိုင်ႈထူင်လႂ် မီးမွၵ်ႈ 2 သႅၼ်ပျႃး။ ၼမ်ႉမၼ်းၸိူဝ်ႉၾႆး (ၼမ်ႉ မၼ်းၸၢၵ်ႈ) ၼိုင်ႈလိတ်ႊလႂ် 6,000 ပျႃးပၢႆ။ ၶၼ်ၵုၼ်ႇၼႆႉ ၶိုၼ်ႈမႃးၸဵမ်မိူဝ်ႈ ဝၢႆးလင်ၽႅၼ်ယၼ်ႇသိုၵ်း 1027 သေ ႁၢၼ်ႉတေႃႇထိုင်ယၢမ်းလဵဝ်ၵေႃႈ ယင်းပႆႇယွမ်းလူင်းၶိုၼ်း ၼႆယဝ်ႉ။

လႆႈႁူႉဝႃႈ ယၢမ်းလဵဝ် ၾၢႆႇသိုၵ်းၵဝ်ႈၵၢင်ႉၶဝ် ႁၢင်ႈႁႅၼ်း တေသိုပ်ႇၶႂၢၵ်ႈထႅင်ႈ ႁူင်းယႃၼႆသေတႃႉ ၸဵမ်မိူဝ်ႈဝၢႆးလင်ပၢင်တိုၵ်းမႃး ၵူၼ်းမိူင်းၸိူဝ်းယူႇၼႂ်းၸႄႈဝဵင်းသႅၼ်ဝီ ဢမ်ႇလႆႈၸႂ်ႉတိုဝ်းၾႆးၾႃႉ။ လႆႈပိုင်ႈဢိင်ၾႆးသႅင်လႅတ်ႇ (သူဝ်ႇလႃႇ) သေ တႆႈၾႆး၊ သႂၢင်းႁႅင်းၾူၼ်း၊ ႁႅင်းပႅတ်ႇထီႇ၊ ႁႅင်းဢုပ်းသိတ်း တႃႇၸႂ်ႉတိုဝ်းၼႂ်းႁႆႈၼႂ်းသူၼ်ၸဵမ်ၸိူဝ်းၼႆႉ ၼႆယဝ်ႉ။

တႅမ်ႈ – ၽူၺ်းၼုမ်ႇ