တႄႇႁူဝ်လိူၼ်ၵျႃၼ်ႊၼႆႉမႃး ၾၢႆႇတၢင်းပလိၵ်ႈသိုၵ်းမၢၼ်ႈ လမ်းတီႉၺွပ်းရူတ်ႉၵႃး ဢမ်ႇမီးဝတ်းဝႂ် လၢႆႊသိၼ်ႊ တီႈမိူင်းတႆးပတ်းပိုၼ်ႉလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈၵႂႃႇမႃးယၢပ်ႇၽိုတ်ႇ တႃႇႁႃၵိၼ်လဵင်ႉတွင်ႉ ဝႃႈၼႆ။

ဝၼ်းတီႈ 01/06/2025 ၼၼ်ႉ ပလိၵ်ႈၾၢႆႇၵုမ်းရူတ်ႉၵႃးလႄႈ ၸုမ်းပလိၵ်ႈ ၾၢႆႇတႂ်ႈသိုၵ်းမၢၼ်ႈၵုမ်းၵမ် ႁူမ်ႈၵၼ်သေ ပႂ်ႉၸွမ်းပွၵ်ႉ၊ ၸွမ်းၵိဝ်ႇ၊ သဵၼ်ႈတၢင်းဢွၼ်ႇ၊ သဵၼ်ႈတၢင်းလူင် ၼႂ်းမိူင်းတႆးပတ်းပိုၼ်ႉ လၢႆလၢႆဝဵင်း။ တွၼ်ႈတႃႇ တီႉၺွပ်းရူတ်ႉၵႃး ၸိူဝ်းဢမ်ႇမီးဝႂ်လၢႆႊသိၼ်ႊ ပဵၼ်တၢင်းၵၢၼ်။ ရူတ်ႉၵႃးလႄႈ ရူတ်ႉၶိူင်ႈ ၸိူဝ်းၺႃးတီႉၺွပ်းၼၼ်ႉ ဢမ်ႇၸၢင်ႈထုတ်ႇဢဝ်ၶိုၼ်းလႆႈ ဝႃႈၼႆ။

မိူၼ်ၼႆၼင်ႇၵဝ်ႇ တီႈဝဵင်းမိူင်းၼၢႆး ၸိုင်ႈတႆးပွတ်းၸၢၼ်းၼၼ်ႉ ၾၢႆႇတၢင်းပလိၵ်ႈသိုၵ်းမၢၼ်ႈ လႄႇလမ်း တီႉၺွပ်းရူတ်ႉၵႃး ဢမ်ႇမီးဝတ်းဝႂ်လၢႆႊသိၼ် ႁဵတ်းႁႂ်ႈၸဝ်ႈသူၼ်ၸဝ်ႈၼႃး ၵႂႃႇမႃးယၢပ်ႇၽိုတ်ႇတႃႇႁႃၵိၼ် လဵင်ႉတွင်ႉ ဝႃႈၼႆ။

ၸဝ်ႈသူၼ်ၶဝ်ႈၵၢပ်ႇ ဝဵင်းမိူင်းၼၢႆး ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၶဝ်တႄႇတီႉၺွပ်းတီႈၼႆႉ မီး 3-4 ဝၼ်းယဝ်ႉ၊ ပေႃးၵၢင်ၼႂ် 6 မူင်းၵေႃႈ ၶဝ်ပေႃးပႂ်ႉၸွမ်းတၢင်းလူင်၊ ၼႃႈပမ်ႉၼမ်ႉမၼ်း ၸိူဝ်းၼႆႉယဝ်ႉ၊ လႆႈ ၵႂႃႇရူတ်ႉဢမ်ႇမီးလၢႆႊသိၼ်ႊ 6 လမ်း ၊ ထုၵ်ႇၶိုၼ်းဢမ်ႇလႆႈၼႆ။ တလဵဝ်ပဵၼ်ၽွင်းၵူၼ်းၽုၵ်ႇၶဝ်ႈၵၢပ်ႇၶိုၼ်းယဝ်ႉ ၶႂ်ႈႁႃသိုဝ်ႉၸိူဝ်ႉၾၼ်းၵေႃႈ ဢမ်ႇၸၢင်ႈၵႂႃႇၼႂ်းဝဵင်း၊ ပေႃးၶီႇထေႃႈၵေႃႈ ပေႃးမႅၼ်ႈၽွင်းၶဝ်တီႉၼၼ်ႉ ၶဝ်ၶႂ်ႈယွၼ်း 3 မိုၼ်ႇၵွၼ်ႇ၊ ၵႂႃႇမႃးယၢပ်ႇၼႃႇ”- ဝႃႈၼႆ။

ယၢမ်းလဵဝ် ၾၢႆႇတၢင်းပလိၵ်ႈသိုၵ်းမၢၼ်ႈ တင်ႈလၢၼ်ႇ ပႂ်ႉၵူတ်ႇထတ်းၼႂ်းဝဵင်း လႄႇႁႃပႂ်ႉၸွမ်းတၢင်းၽႄ ႁဵတ်းႁႂ်ႈရူတ်ႉၵႃးဢမ်ႇႁတ်းဢွၵ်ႇႁိူၼ်းၵႂႃႇမႃး၊ သဵင်ပေႃးယဵၼ်သီႇသီႇ။ ၵူၼ်းမိူင်းဢွၼ်ၵၼ်ပႆတၢင်း၊ ပၼ်ႇရူတ်ႉထိပ်ႇ၊ ၸႂ်ႉထူဝ်ႈ(ထေႃႈ) ၸိူဝ်းၼႆႉတႅၼ်းတၢင်ရူတ်ႉၵႃးလႄႈ ရူတ်ႉၶိူင်ႈ။

ၵူၼ်းမိူင်း ဢမ်ႇႁတ်းၵႂႃႇမႃးသိုဝ်ႉၶၢႆၵၼ်တီႈၵၢတ်ႇတီႈဝဵင်း၊ လႆႈဢႅဝ်ႇႁႃၶၢႆၸွမ်းဝၢၼ်ႈ ၸွမ်းသူၼ်ၵူၺ်း။ ၵႂႃႇႁဵတ်းၵၢၼ်သူၼ်ၵၢၼ်ႁႆႈၵေႃႈ ဢွၼ်ၵၼ်ၵႂႃႇၸဝ်ႉမႃးလိုၵ်း။ ထူပ်းလွင်ႈယၢပ်ႇလၢႆလၢႆလွင်ႈ – ၵူၼ်းပိုၼ်ႉတီႈ လၢတ်ႈၼင်ႇၼႆ။

လိူဝ်သေ ၸဝ်ႈသူၼ်ၸဝ်ႈၼႃးႁႃသိုဝ်ႉၸိူဝ်ႉၾၼ်း တႃႇၽုၵ်ႇမၢၵ်ႇၶဝ်ႈတဝ်ႈၼမ်ႉယၢပ်ႇယဝ်ႉ ၸဝ်ႈသူၼ် ၸိူဝ်းတေဢဝ်မၢၵ်ႇၶဝ်ႈတဝ်ႈၼမ်ႉၼႂ်းသူၼ် မိူၼ်ၼင်ႇ – ၽၵ်းၵၢတ်ႇမွၵ်ႇ၊ ထူဝ်ႇ၊ ၽၵ်းၵၢတ်ႇပီ၊ တႅင် ဢဝ် ၶၢႆ ၼႂ်းဝဵင်းၼမ်ႉၸၢင် ၸိူဝ်းၼၼ်ႉၵေႃႈ ဢမ်ႇၸၢင်ႈၵႂႃႇမႃးလႄႈ သုမ်းတိုၼ်းလၢင်းတင်းၼမ် ဝႃႈၼႆ။

ၼၢင်းယိင်း ဝဵင်းပၢင်လူင် လၢတ်ႈၽူႈတွႆႇႁွၵ်ႈဝႃႈ -“ၵူႈပွၵ်ႈတႄႉ ဢဝ်ၽၵ်းၶဵဝ်တၢင်းပၢင်လူင်ၼႆႉ လူင်းၵႂႃႇၶၢႆ ၼႂ်းၵၢတ်ႇၼမ်ႉၸၢင်၊ ၽွင်းပိူၼ်ႈတီႉရူတ်ႉၵႃးၼႆႉတႄႉ ဢမ်ႇလႆႈလူင်း ၶၢႆၵၢတ်ႇမီး 1 ဝူင်ႈယဝ်ႉ၊ ၽၵ်းၶဵဝ်ၼႂ်း သူၼ်ၵေႃႈ တေၵႄႇၼဝ်ႈပႅတ်ႈမူတ်းယဝ်ႉ၊ ပေႃးပဵၼ်ၵူၼ်းႁဵတ်းၵၢၼ်သူၼ်ႁႆႈမိူၼ်ႁဝ်းၼႆႉ ဢမ်ႇမီးငိုၼ်း သိုဝ်ႉၵႃးဢၼ်ပႃးဝႂ်မၼ်းၶႃႈ၊ ၵႃႈ ၼႃႇ”- ဝႃႈၼႆ။

ယွၼ်ႉၵႃးဢမ်ႇမီးဝတ်းဝႂ် ဢမ်ႇၸၢင်ႈတေႃႉသူင်ႇၶူဝ်းၵုၼ်လႄႈ ယၢမ်းလဵဝ် ၵူၼ်းသိုဝ်ႉၶၢႆၵုၼ်ႇလိပ်းၵေႃႈ ယွမ်းလူင်းၵႂႃႇႁႅင်း 5 ပုၼ်ႈ 3 ပုၼ်ႈ – ၵူၼ်းပိုၼ်ႉတီႈလၢတ်ႈ။

တီႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း ဝဵင်းဢၼ်မီးလုမ်းၸႄႈတွၼ်ႈၼၼ်ႉၵေႃႈ တေႃႈၼင်ႇၼၼ်။ ဢမ်ႇမီးရူတ်ႉမီးၵႃးၵႂႃႇမႃးၸွမ်းသဵၼ်ႈတၢင်း၊ ၵူၼ်းမိူင်းပဵၼ်လိူတ်ႇပဵၼ်မႆႈ ဢမ်ႇႁတ်းဢွၵ်ႇႁိူၼ်းယေး၊ ၼႂ်း ဝၼ်းသွင်ဝၼ်းၼႆႉ ၵၢတ်ႇပေႃးဢမ်ႇၵိုၼ်း ၵူၼ်းသိုဝ်ႉၶၢႆၵေႃႈဢမ်ႇမီး ရူတ်ႉၵႃးတၢင်ႇၽၵ်းတၢင်ႇၵုၼ်ႇ ဢမ်ႇၸၢင်ႈမႃးတေႃႉမႃးသူင်ႇၶူဝ်းၶွင်လႄႈ ၵူၼ်းမိူင်းဢွၼ်ၵၼ်ယၢပ်ႇၽိုတ်ႇ။ လုၵ်ႈဢွၼ်ႇၸိူဝ်းလူဝ်ႇၵႂႃႇ ႁဵၼ်းလိၵ်ႈလၢႆးၵေႃႈ ဢွၼ်ၵၼ်ၸႂ်ႉရူတ်ႉထိပ်ႇ(လႅင်) ၶိုၼ်းၼႆ – ၼၢင်းယိင်း ၸဝ်ႈႁၢၼ်ႉတၢင်းၶၢႆ ၼႂ်းၵၢင်ဝဵင်းၵေႃႉၼိုင်ႈ လၢတ်ႈၽူႈတွႆႇႁွၵ်ႈၼင်ႇၼႆ။

ၼႂ်းမိူင်းတႆးပွတ်းၸၢၼ်းၼႆႉ ၾၢႆႇပလိၵ်ႈၶဝ် တီႉၺွပ်းရူတ်ႉၵႃးဢမ်ႇမီးဝႂ် လၢႆႊသိၼ်ႊ ၸိူဝ်းပဵၼ်ၼႂ်းဝဵင်း လူင်တူၼ်ႈတီး၊ ဢွင်ႇပၢၼ်း၊ လွၵ်ႉၸွၵ်ႇ၊ ပၢင်လွင်း၊ ႁၢႆးဝူဝ်း၊ ယွင်ႁူၺ်ႈ၊ ပၢင်လူင်၊ လွႆလႅမ်၊ မိူင်းပွၼ် ၸိူဝ်းၼႆႉၵူၺ်းဢမ်ႇၵႃး ၼႂ်းမိူင်းတႆးပွတ်းဢွၵ်ႇ ဝဵင်းတႃႈၶီႈလဵၵ်း၊ ၵဵင်းတုင်၊ မိူင်းတူၼ်၊ မိူင်းသၢတ်ႇ ၸိူဝ်းၼႆႉၵေႃႈ ပလိၵ်ႈသွၵ်ႈႁႃလမ်းတီႉၺွပ်းယူႇမိူၼ် ၵၼ်။