ပျီႇတူႉၸိတ်ႉပဢူဝ်း PNO သူင်ႇလိၵ်ႈ တဵၵ်းၸႂ်ႉၵူၼ်းပိုၼ်ႉတီႈၼႂ်းဢိူင်ႇၼွင်ၵႅဝ်း ( နောင်ကျော )လႄႈ ဢိူင်ႇတွင်ႇသျေႉ(တောင်ရှေ့ကျေးရွာအုပ်စု) 6 ႁဵင်ပၢႆ ဢၼ်မီးၼႂ်းၸႄႈဝဵင်းသီႇသႅင် ၸိုင်ႈတႆးပွတ်းၸၢၼ်ႈ ၶၢႆႉပၢႆႈဝႃႈၼႆ ။ 

ၼႂ်းဝၼ်းတီႈ 7/6 /2025 ၾၢႆႇတၢင်းပျီတူႉၸိတ်ႉပဢူဝ်း PNO သူင်ႇလိၵ်ႈ ႁႂ်ႈၵူၼ်းဝၢၼ်ႈ တပူးထူဝ်ႇ (တပူးထို) ၊  ၵွင်ထူဝ်ႇ(ကောင်ထို) ၊ လွႆငွၼ်း(လွယ်ငွန်း) ၊ ၼွင်ဝူဝ် (နောင်ဘို) ၊ ပၢင်ႇၸၢၵ်ႈ(ပင်စက်) ဢၼ်မီးၼႂ်းဢိူင်ႇၼွင်ၵႅဝ်း လႄႈ ဝၢၼ်ႈၼွင်ထဝ် 6 ဝၢၼ်ႈ  ၶၢႆႉပၢႆႈ  ။ ၼႂ်းလိၵ်ႈၼၼ်ႉပႃးဝႆႉဝႃႈ တေလႆႈၶၢႆႉ ႁႂ်ႈယဝ်ႉၼႂ်းဝၼ်းတီႈ 15 လိူၼ်ၵျုၼ်ႊၼႆႉ  ဝႃႈၼႆ။

ၵူၼ်းဝၢၼ်ႈ ဢၼ်ပျီႇတူႉၸိတ်ႉ PNO တဵၵ်းၸႂ်ႉၶၢႆႉၼၼ်ႉ မီး 6 ႁဵင်ပၢႆ ၊ၽွင်းဢွၵ်ႇလိၵ်ႈၼၼ်ႉယဝ်ႉ ၾၢႆႇတၢင်းပျီႇတူႉၸိတ်ႉပၵ်းတပ်ႉဢဝ်တီႈယူႇဝႆႉ ၼိူဝ်သဵၼ်ႈတၢင်းလူင်ဝဵင်းသီႇသႅင်ႇ ဝႃႈၼႆ ။

ၵူၼ်းၸၢႆးယူႇၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တလဵဝ် ၶဝ်ပၵ်းတပ်ႉဝႆႉလႄႈ ဢမ်ႇပၼ်ၵူၼ်းဝၢၼ်ႈယူႇ ၊ ၼိူဝ်သဵၼ်ႈတၢင်းလူင် သီႇသႅင်ႇ – ၼွင်ထဝ် ၼႆႉ ၶဝ်ပၵ်းတပ်ႉဝႆႉ ၊ ၶဝ်ပၼ်ၶႂၢင်ႉၶဝ်ႈဢွၵ်ႇ  ၵၢင်ၼႂ် 8 မူင်းထိုင် ႁူဝ်ၶမ်ႈ 4 မူင်းၶိုင်ႈ”- ဝႃႈၼႆ ။

ပျီႇတူႉၸိတ်ႉ ပဢူဝ်း PNO လၢတ်ႈပႃးဝႆႉဝႃႈ ၵူၼ်းဝၢၼ်ႈတေလႆႈၶၢႆႉပၼ် ဝၼ်းတီႈ 15/6/2025 ဝၼ်းလိုၼ်းသုတ်း ၊ ပေႃးဢမ်ၶၢႆႉ တေဢမ်ႇဢဝ်ပုၼ်ႈၽွၼ်းလွင်ႈႁူမ်ႇလူမ်ႈ ။ ယူႇတီႈၵူၼ်းပိုၼ်ႉတီႈ ဢၼ်တေၶၢႆႉဢွၵ်ႇဝၢၼ်ႈၼၼ်ႉၵေႃႈ ယႃႇပေၶၢႆႉၵႂႃႇယူႇတီႈ ၼႂ်းထိူၼ်ႇ ၼႂ်းႁႆႈ ၊ ဢွင်ႈတီႈၵူၼ်းပၢႆႈၽေးသိုၵ်းယူႇသဝ်း ၊ ႁႂ်ႈၶၢႆႉၵႂႃႇယူႇတီႈ ၵျွင်းမူၺ်ႇတေႃႇ ဢၼ်မီးတီႈဝၢၼ်ႈ ၽြႃးၽိူၵ်ႇ ဝႃႈၼႆ ။

ၵူၼ်းၸၢႆးပိုၼ်ႉတီႈဝဵင်းသီႇသႅင်ႇလၢတ်ႈၽူႈတွႆႇႁွၵ်ႈဝႃႈ -“ၸွမ်းၼင်ႇၶႃႈထၢမ်ႇတူၺ်းတႄႉ ၵူၼ်းပိုၼ်ႉတီႈ ဢွၼ်ၵၼ်ၶၢႆႉပၢႆႈၵႂႃႇယူႇၸွမ်းၼႂ်းသူၼ် ၼႂ်းႁႆႈ ၊ တလဵဝ် ပဵၼ်ၶၢဝ်းပိူၼ်ႈႁဵတ်းၵၢၼ်လႄႈ ၶဝ်ၵေႃႈ ဢွၼ်ၵၼ်ႁဵတ်းသုမ်ႉသေ ယူႇၸွမ်းၼႂ်းသူၼ်”- ဝႃႈၼႆ ။

လွင်ႈၼႆႉ ၽူႈတွႆႇႁွၵ်ႈ ၵပ်းသိုပ်ႇၸူးပျီႇတူႉၸိတ်ႉပဢူဝ်းယူႇၵေႃႈ ၵပ်းသိုပ်ႇဢမ်ႇလႆႈ။

ၵဵဝ်ႇလွင်ႈၼႆႉ ၾၢႆႇတၢင်းၽူႈၶၢၼ်ပၢၵ်ႇ PNLA  ၶုၼ်ႇရဵင်းယၼ်ႇ လၢတ်ႈၽူႈတွႆႇႁွၵ်ႈဝႃႈ -“လွင်ႈၶဝ် ႁဵတ်းၸိူင်ႉၼႆႁဵတ်းႁႂ်ႈ ၵၢၼ်လုၵ်ႉၽိုၼ်ႉလႄႈ ၵူၼ်းမိူင်း  ၶၢတ်ႇယၢၼ်ၵၼ် ၊ ဢမ်ႇမီးလွင်ႈၵပ်းသိုပ်ႇၵၼ် ၊ ပေႃးၶဝ်ႁဵတ်းၸိူင်ႉၼႆၼႆႉ မိူၼ်တၢင်းၶဝ်ၶႂ်ႈယႃႉ သူၼ်ဝၢၼ်ႈ ၊ ၶူဝ်းၶွင်  ၵူၼ်းမိူင်းၵူၺ်း ၊ PNO ၼႆႉ ၵူၼ်းမိူင်းၵမ်ႉယၼ်သေလႄႈၸင်ႇပဵၼ်ၽွတ်ႈမႃးၵူၺ်းၼင်ႇၵဝ်ႇ။   ၵိၼ်ၶဝ်ႈၵူၼ်းပိုၼ်ႉတီႈသေပဵၼ်ၸုမ်းမႃးၵူၺ်း  ”- ဝႃႈၼႆ ။

တႄႇႁူဝ်လိူၼ်ၼႆႉမႃး ၾၢႆႇတၢင်းပလိၵ်ႈသိုၵ်းမၢၼ်ႈလမ်းတီႉၺွပ်းဝတ်းဝႂ်လၢႆႊသိၼ်ႊရူတ်ႉၵႃးလႄႈ ၵူၼ်းပိုၼ်ႉတီႈ ဢမ်ႇႁတ်းၶီႇရူတ်ႉၵႃးပၢႆႈ လႆႈဢွၼ်ၵၼ်ၶီႇထေႃႈလႃႈၵီႈ သေပၢႆႈၼႆ – ၵူၼ်းပိုၼ်ႉတီႈလၢတ်ႈ ။  

ဝဵင်းသီႇသႅင်ႇၼႆႉ ယူႇတီႈ တပ်ႉသိုၵ်းမၢၼ်ႈ ယိုတ်းၵုမ်းလႆႈၶိုၼ်း တီႈတပ်ႉသိုၵ်းပူတ်းပွႆႇၸိူဝ်ႉ ၸၢတ်ႈပဢူဝ်း PNLA မိူဝ်ႈႁၢင်လိူၼ်မၢတ်ႊၶျ် 2024 ပူၼ်ႉမႃးၼၼ်ႉသေ ထိုင်မႃးၸမ်ပီယဝ်ႉ သိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်း ပူၵ်းပွင်ပၼ်သင် တိုၵ်ႉထႅမ်ႁႅင်းသိုၵ်းသေ သိုပ်ႇပဵၼ်ပၢင်တိုၵ်း လေႃႇတိုၵ်းတင်းၸုမ်းလုၵ်ႉၽိုၼ်ႉယူႇ ႁၢဝ်ႈႁႅင်း ၼႆယဝ်ႉ။  

တႅမ်ႈၾၢႆႇမၢၼ်ႈ – ၸၢႆးႁၢၼ်လႅင်း