ၶွမ်ႊမသျိၼ်ႊၵၢၼ်လိူၵ်ႈတင်ႈ မိူင်းႁူမ်ႈတုမ် UEC တႂ်ႈသိုၵ်းမၢၼ်ႈယိုတ်းမိူင်း လၢတ်ႈဝႃႈ – ၼွၵ်ႈလိူဝ်ၼႃႈတီႈဢၼ်ႁႄႉႁၢမ်ႈဝႆႉ ၸွမ်းၼင်ႇငဝ်းလၢႆးၼၼ်ႉ ၼႂ်းတိူင်းလႄႈၸႄႈမိူင်းၵူႈတီႈ တေ ၸတ်းႁဵတ်းပၢင်လိူၵ်ႈတင်ႈၵႂႃႇ ဝႃႈၼႆ။

ပၢင်လိူၵ်ႈတင်ႈၼႆႉ တေၸႂ်ႉၵႂႃႇၸွမ်း ပိူင် FPTP တင်း ပိူင် PR ။ ပိူင် FPTP ၼႆႉ မီးတီႈပွင်ႇဝႃႈ  ၽူႈတႅၼ်းၵေႃႉလႂ် လႆႈၶႅပ်းမႄးၼမ်သုတ်းၵေႃႈ ပဵၼ်ၵေႃႉပေႉ။ ပိူင် PR ၼႆႉသမ်ႉ ၸွမ်းၼင်ႇၶႅပ်းမႄး ဢၼ်ၵူၼ်းမိူင်းသႂ်ႇပၼ်ၼၼ်ႉသေ ၸႅၵ်ႇမႅင်ႇတီႈၼင်ႈ ၽူႈတႅၼ်းၵၼ်၊ ၼပ်ႉသွၼ်ႇၸွမ်းဝၢၵ်ႈၵၼ် ဝႃႈၼႆ။

ၼႂ်းမိူင်းႁူမ်ႈတုမ် ပတ်းပိုၼ်ႉ 330 ၸႄႈဝဵင်းၼႆႉ တပ်ႉသိုၵ်းမၢၼ်ႈ တေၸတ်းပၢင်လိူၵ်ႈတင်ႈၵႂႃႇ 267 ၸႄႈဝဵင်း၊ တႃႇပၢင်လိူၵ်ႈတင်ႈၼၼ်ႉ တေပိုၼ်ၽၢဝ်ႇဢွၵ်ႇ ပၵ်းပိူင်ၾိင်ႈမိူင်း ပၢင်လိူၵ်ႈတင်ႈ သၽႃးယူႇ ဝႃႈၼႆ။

မိူဝ်ႈပၢင်လိူၵ်ႈတင်ႈ ပီ 2020 ၼၼ်ႉ တပ်ႉသိုၵ်းမၢၼ်ႈ ၼႄၶေႃႈဢၢင်ႈဝႃႈ ဢမ်ႇမီးလွင်ႈသိုဝ်ႈယူဝ်းၼႆသေ ယိုတ်းဢဝ်ဢႃႇၼႃႇပၢၼ်ႇပွင်ၸိုင်ႈမိူင်း။ ၼႂ်းႁၢင်ပီ 2025 ၼႆႉ သိုၵ်းမၢၼ်ႈယိုတ်းမိူင်း ၶိုင်ဢၢၼ်းၸတ်းၶိုၼ်းပၢင်လိူၵ်ႈတင်ႈ။ ၽွင်းပၢင်လိူၵ်ႈတင်ႈၼႆႉ ၼင်ႇႁိုဝ်တေၼပ်ႉဢၢၼ်ႇလႆႈ ၶႅပ်းမႄးတႅတ်ႈတေႃးၼၼ်ႉ တေၸႂ်ႉၸၢၵ်ႈပၼ်ၶႅပ်းမႄး ၸွမ်းၶိူင်ႈ ဢီႇလႅတ်ႈထရေႃးၼိတ်ႉ။ ၼႂ်းတိူင်းလႄႈၸႄႈမိူင်း ႁူမ်ႈသဵၼ်ႈ 9 တီႈ သိုၵ်းမၢၼ်ႈ ၸၢမ်းၸႂ်ႉတူၺ်းၶိူင်ႈၸၢၵ်ႈၼႆႉဝႃႈ လႆႈ ၶေႃႈတွပ်ႇလီ ဢမ်ႇမီးလွင်ႈၽိတ်းပိူင်ႈသင် ဝႃႈၼႆ။

ဢိင်ၼိူဝ်လွင်ႈသိုၵ်းမၢၼ်ႈ တေၸတ်းပၢင်လိူၵ်ႈတင်ႈၼႆႉသေ NUG တင်း ၸုမ်းၾၢႆႇသၢၼ်ၶတ်း ၶဝ်တႄႉ တိုၵ်းသူၼ်းၵူၼ်းမိူင်းဝႆႉဝႃႈ ယႃႇပေႁွမ်းမိုဝ်းႁဵတ်းၸွမ်း ၶေႃႈၸီႉသင်ႇသိုၵ်းမၢၼ်ႈ – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။