ဝၼ်းတီႈ 08/06/2025 တႄႇယၢမ်းႁူဝ်ၶမ်ႈ 5 မူင်းၶိုင်ႈ သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ယိုဝ်းၵၼ်ႁၢဝ်ႈႁႅင်း တီႈဝၢၼ်ႈၶျွၵ်ႉၶျူင်ႇ ႁိမ်းဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

ပိူဝ်ႈတႃႇတေၵုမ်းၵမ်လႆႈၶိုၼ်း ဝဵင်းၼွင်ၶဵဝ်ၼၼ်ႉ ၾၢႆႇသိုၵ်းမၢၼ်ႈ ၸႂ်ႉတိုဝ်းၶိူင်ႈတရူၼ်ႊလႄႈ ၶိူင်ႈၵွင်ႈလူင် ပွႆႇမၢၵ်ႇသႂ်ႇၼႂ်းဝၢၼ်ႈၵၢၼ်ႇၵျီး ႁၢဝ်ႈႁႅင်း ဝႃႈၼႆ။

ၵူၼ်းၸမ်ၸႂ်ၵၼ်တင်း သိုၵ်းတဢၢင်း TNLA လၢတ်ႈၼႄငဝ်းလၢႆးပၢင်တိုၵ်း ၼႂ်းၸႄႈဝဵင်းၼွင်ၶဵဝ် တီႈၽူႈတွႆႇႁွၵ်ႈဝႃႈ – “ယၢမ်းလဵဝ် သိုၵ်းတင်းသွင်ၾၢႆႇၼႆႉ ၽႂ်ၵေႃႈ ဢမ်ႇပႆႇပေႉ ၽႂ်။ ၾၢႆႇသိုၵ်းမၢၼ်ႈတႄႉ ပဵၼ်ၾၢႆႇႁႅၼ်းသိုၵ်းလေႃႇတိုၵ်းၶိုၼ်ႈၼႃႈသိုၵ်းမႃး။ ၾၢႆႇသိုၵ်းတဢၢင်းသမ်ႉ ပဵၼ်ၾၢႆႇ ႁပ်ႉတိုၵ်းၵူၺ်း။ ၸူဝ်ႈဝူင်ႈဝၢင်ႈၼႆႉ ပၢင်တိုၵ်းၶိုၼ်းႁၢင်ႈႁၢႆႉမႃးလႄႈ ၵူၼ်းဝၢၼ်ႈၼႂ်းၸႄႈဝဵင်း ၼွင်ၶဵဝ်တႄႉ ဢမ်ႇပေႃးမီးၽႂ်ႁတ်းယူႇယဝ်ႉ။ ပၢႆႈၵႂႃႇၵေႃႉႁူႉၵေႃႉတၢင်း။ ၵႂႃႇယူႇၸွမ်းႁိူၼ်းပီႈ ႁိူၼ်းၼွင်ႉ ၼႂ်းၸႄႈဝဵင်းၵျွၵ်ႉမႄးၼၼ်ႉ”- ဝႃႈၼႆ။

မိူဝ်ႈပူၼ်ႉမႃး ဝၼ်းတီႈ 6 ၼၼ်ႉၵေႃႈ ၾၢႆႇသိုၵ်းမၢၼ်ႈ ၸႂ်ႉၶိူင်ႈၵွင်ႈလူင်သေ ယိုဝ်းၶဝ်ႈၼႂ်းဝဵင်း ၼွင်ၶဵဝ်မွၵ်ႈ 10 လုၵ်ႈ ၵႂႃႇတူၵ်းသႂ်ႇတၢင်းပွၵ်ႉပူႇတႃႇၼၼ်ႉသေ တိူဝ်ႉၺႃးၵူၼ်းၸၢႆး ဢႃယု 37 ပီ မၢတ်ႇၸဵပ်းၵႂႃႇ ဝႃႈၼႆ။

လႆႈႁူႉဝႃႈ ၵူၼ်းဝၢၼ်ႈၸိူဝ်းယူႇႁိမ်း ဝဵင်းၼွင်ၶဵဝ် မွၵ်ႈ 8 ဝၢၼ်ႈလႄႈ ၵူၼ်းၼႂ်းဝဵင်းၵမ်ႈၽွင်ႈ ဢွၼ် ၵၼ်ပၢႆႈၽေးပၢင်တိုၵ်းသေ ၵႂႃႇသွၼ်ႈယူႇဝႆႉ ၸွမ်းဝတ်ႉၵျွင်း၊ ႁူင်းႁဵၼ်းသွၼ်လိၵ်ႈလႄႈ ႁိူၼ်းပီႈႁိူၼ်းၼွင်ႉ ၼႂ်းၸႄႈဝဵင်းၵျွၵ်ႈမႄး ၸိုင်ႈတႆးပွတ်းႁွင်ႇ ၼႆယဝ်ႉ။

တႅမ်ႈ – ၽူၺ်းၼုမ်ႇ