မိူဝ်ႈဝၼ်းတီႈ 08/06/2025 ယၢမ်းၵၢင်ၼႂ် ၸုမ်းၵႅတ်ႇၶႄၵူၼ်းမိူင်း PDF ၸႄႈဝဵင်းၼတ်ႉမွၵ်ႉ ထုင်ႉပဵင်းမိူင်းမၢၼ်ႈ တီႉၺွပ်းလႆႈရူတ်ႉၵႃး ဢၼ်တေႃႉတၢင်ႇၼမ်ႉမၼ်းၶိူင်ႈမိၼ်တိုၵ်းသိုၵ်းမၢၼ်ႈ တီႈၼိူဝ်သဵၼ်ႈတၢင်းလူင် တႃႈၵုင်ႈ- ဝဵင်းလိူဝ်ႇ ပဵၼ်ၵႃးဢၼ်တေမႃးသူင်ႇ တီႈၶူင်ႇၶိူင်ႈမိၼ် ဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း။
တီႉၺွပ်ႉလႆႈ ၵႃးတၢင်ႇၼမ်ႉမၼ်း ဢၼ်သႂ်ႇလႆႈတင်းၼမ် တႃႇ 3,000 ၵႃႊလၼ်ႊ မၢႆၵႃးပဵၼ် 2B – 8525 ပဵၼ်ၵႃးသိုၵ်းမၢၼ်ႈ။ ၵႃးလမ်းၼႆႉ လုၵ်ႉတၢင်းဝဵင်းတႃႈၵုင်ႈသေ မုင်ႈၼႃႈမႃးတၢင်းဝဵင်းလိူဝ်ႇ တေဢၢၼ်း ၵႂႃႇသူင်ႇၼမ်ႉမၼ်းၶိူင်ႈမိၼ်တိုၵ်း တီႈၶူင်ႇၶိူင်ႈမိၼ် ဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းသေ ၺႃးၸုမ်း PDF ၶဝ် တီႉၺွပ်းဢဝ် တင်းၵူၼ်းႁေႃႈရူတ်ႉလႄႈ ၵႃးတၢင်ႇၼမ်ႉမၼ်းၸွမ်းတၢင်းပႅတ်ႈ။
ၽူႈမီးပုၼ်ႈၽွၼ်း ၼႂ်းၸုမ်း PDF ထုင်ႉပဵင်းမိူင်းမၢၼ်ႈ Aung San’s Land Natmauk ၶဝ် ပိုၼ်ၽၢဝ်ႇဝႃႈ “ၼႂ်းၵႃးလမ်းၼၼ်ႉ ၼမ်ႉမၼ်းမီးဝႆႉတဵမ်ပိၵ်း။ ၵူၼ်းႁေႃႈၵႃးၵေႃႈ တီႉၺွပ်းဝႆႉယဝ်ႉ။ တီႈမၼ်းမီးပႃးလိၵ်ႈ ၵမ်ႉယၼ်ဢၼ်ၾၢႆႇသိုၵ်းမၢၼ်ႈၶဝ် ႁဵတ်းဢွၵ်ႇမႃးပၼ်ၼၼ်ႉထႅင်ႈ”- ဝႃႈၼႆ။
ၼႂ်းၽိုၼ်လိၵ်ႈၵမ်ႉယၼ် ပိူဝ်ႈတႃႇၸႂ်ႉတိုဝ်း ၼႂ်းၵၢၼ်လတ်းၶၢမ်ႈၵဵတ်ႉလၢၼ်ႇၸွမ်းတၢင်းၼၼ်ႉ ၾၢႆႇသိုၵ်း မၢၼ်ႈ တႅမ်ႈၵမ်ႉယၼ်ဝႆႉဝႃႈ – ရူတ်ႉလမ်းၼႆႉ တေႃႉမႃးၼမ်ႉမၼ်းၶိူင်ႈမိၼ် တႃႇသႂ်ႇၼႂ်း ၶိူင်ႈမိၼ်တိုၵ်း သႅၼ်း JET-A1 ။ ပဵၼ်ၼမ်ႉမၼ်းတီႇၸေႇ Octane လႄႈ High Speed Diesel ၼႆသေ တိုၵ်းသူၼ်းႁႂ်ႈၶႃႈ ႁၢပ်ႇၵၢၼ်ၶုၼ် ၸွမ်းၵဵတ်ႉလၢၼ်ႇတင်းသဵင်ႈ ၸွႆႈထႅမ်ပၼ်ဝႆႉပႃးၼင်ႇၼႆ။
တႄႇၸဵမ်မိူဝ်ႈၽႅၼ်ယၼ်ႇသိုၵ်း 1027 မႃး သိုၵ်းမၢၼ်ႈၼႆႉ ၸႂ်ႉၶိူင်ႈမိၼ်တိုၵ်းသေ ပွႆႇမၢၵ်ႇသႂ်ႇ ၸွမ်း ပိုၼ်ႉတီႈ သိုၵ်းၸၢဝ်းၶိူဝ်းၵုမ်းၵမ်ဝႆႉလႄႈ ႁဵတ်းႁႂ်ႈၵူၼ်းမိူင်း လူႉတၢႆမၢတ်ႇၸဵပ်းၵႂႃႇၸွမ်းတင်းၼမ် ၵူၺ်း ဢမ်ႇၵႃး ဝတ်ႉဝႃးၽႃသိူဝ်ႇ၊ ႁူင်းႁဵၼ်း၊ ႁူင်းယႃ ဢိၵ်ႇပႃး ႁိူၼ်းယေးၵူၼ်းဝၢၼ်ႈၵူၼ်းမိူင်းၸိူဝ်းၼႆႉၵေႃႈ လူႉၵွႆၵႂႃႇပႃးတင်းၼမ်။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ