ၼႂ်းႁူဝ်လိူၼ်ၵျုၼ်ႊၼႆႉ ၶွမ်ႊမတီႊၾၢႆႇၸတ်းပွင်ပၵ်းပိူင်မၢႆမီႈ (ၾိင်ႈမိူင်း) သိုၵ်းဝႃႉလႄႈ လူင်ပွင်ၸိုင်ႈမိူင်းၶႄႇၶဝ် ႁူမ်ႈၵၼ်သေ တီႉၺွပ်းၵူၼ်းၵႃႉယႃႈမဝ်းၵမ် ၸွမ်းလႅၼ်လိၼ် တပ်ႉသိုၵ်းဝႃႉ ၵုမ်းၵမ်တင်း မိူင်းၶႄႇ တိတ်းၸပ်းၵၼ် တီႈၵဵတ်ႉ/ လၢၼ်ႇမၢၼ်ႈဢႃႇ ၼႂ်းၼႃႈတီႈတပ်ႉသိုၵ်းဝႃႉ ၵုမ်းၵမ်။

ဝၼ်းတီႈ 08/06/2025 ၼႆႉ ၶွမ်ႊမတီႊၾၢႆႇၸတ်းပွင် ၾိင်ႈမိူင်း တပ်ႉသိုၵ်းဝႃႉလႄႈ ပလိၵ်ႈသိုၵ်း ဝႃႉ လႆႈဢဝ်ယႃႈမဝ်းၵမ်ဢၼ်တီႉလႆႈၼၼ်ႉ မွပ်ႈသူင်ႇပၼ်ထိုင်ၼႂ်းမိုဝ်း ၸုမ်းပလိၵ်ႈ လူင်ပွင်ၸိုင်ႈ မိူင်းၶႄႇၵႂႃႇၼႆ WSP (Wa Special Police) ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ၵူၼ်းၵေႃႉဢၼ်ၸမ်ၸႂ်ၵၼ်တင်း တပ်ႉသိုၵ်းဝႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ဢၼ်ၶဝ်တီႉလႆႈၼမ်ၸိူင်ႉၼႆၵေႃႈ ငိၼ်းဝႃႈ ၶဝ်လႆႈၶၢဝ်ႇမၼ်းဝႆႉဢွၼ်တၢင်း။ ယႃႈၸိူဝ်းၼႆႉသမ်ႉ ပဵၼ် ၶူဝ်းဢၼ်တေတေႃႉသူင်ႇၶဝ်ႈၵႂႃႇတၢင်း မိူင်းၶႄႇၼႆ။ ၸွင်ႇဝႃႈ တင်းၾၢႆႇမိူင်းၶႄႇႁႄ သိုၵ်းဝႃႉ ႁႄ ၶဝ်ႁူမ်ႈၵၼ်ဝၢင်းၽႅၼ်တီႉၺွပ်း”- ဝႃႈၼႆ။

ယႃႈမဝ်းၵမ် ဢၼ်တီႉၺွပ်းလႆႈၼၼ်ႉ ယႃႈမႃႉ  727.5 ၵီႊလူဝ်ႊၵရမ်ႊ၊ ယႃႈၽိၼ်ႇၽိူၵ်ႇ 19 ၵီႊလူဝ်ႊ၊ ယႃႈလမ် 6.2 ၵီႊလူဝ်ႊၵရမ်ႊ၊ Ephedrine 0.5 ၵီႊလူဝ်ႊၵရမ်ႊ၊ ၶူဝ်းဢၼ်ထၢင်ႇထိူမ် လႆႈဝႃႈ ပဵၼ်ယႃႈမဝ်းၵမ် ၼႆၼၼ်ႉသမ်ႉ 0.3 ၵီႊလူဝ်ႊၵရမ်ႊလႄႈ တဝ်ႈယႃႈယႃ ဢၼ်ၸႂ်ႉတိုဝ်း ၼႂ်းၵၢၼ် ႁဵတ်းဢွၵ်ႇယႃႈၼၼ်ႉ တႃႇ 65 တဝ်ႈ ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈယႃႈမဝ်းၵမ်ၼႆႉသေ ၶွမ်ႊမတီႊၾၢႆႇၸတ်းပွင်ၾိင်ႈမိူင်း သိုၵ်းဝႃႉၶဝ် ပိုၼ် ၽၢဝ်ႇ ပဵၼ်တၢင်းၵၢၼ်ၵႂႃႇဝႃႈ – ၵၢၼ်ႁူမ်ႈမိုဝ်းၵၼ်တင်း လူင်ပွင်ၸိုင်ႈမိူင်းၶႄႇသေ တီႉၺွပ်းယႃႈ မဝ်းၵမ် ပွၵ်ႈၼႆႉ ၼႄလႆႈဝႃႈ ပဵၼ်ၵၢၼ်ၽဵဝ်ႈမူၺ်ႉယႃႈမဝ်းၵမ် ၶၢမ်ႈၸၢတ်ႈ/ ၶၢမ်ႈမိူင်း။ ၽူႈလႂ်ၽႂ် သေဢမ်ႇဝႃႈ သင်ဝူၼ်ႉၶႂ်ႈၸႂ်ႉတိုဝ်း ၼႃႈတီႈၵုမ်းၵမ်ဝႃႉ ပဵၼ်သဵၼ်ႈတၢင်းလတ်းတႃႇ ၵႃႉၶၢႆယႃႈ မဝ်းၵမ်ၸိုင် ၾၢႆႇပလိၵ်ႈသိုၵ်းဝႃႉ တိုၼ်းတေႁဵတ်းၵၢၼ်ၽဵဝ်ႈမူၺ်ႉၵႂႃႇၵမ်းသိုဝ်ႈ ဝႃႈၼႆ။

တႅမ်ႈ – ၽူၺ်းၼုမ်ႇ