ၽူႈလူင်ႉလႅၼ်ႇၾၢႆႇၶူၼ်ႉၶႂႃႉ မိူင်းၵျပၼ်ႊ ၶူင်သၢင်ႈႁဵတ်းဢွၵ်ႇ ၸေႈပလၢတ်ႉသတိတ်ႉ (Plastic) သႅၼ်းၼိုင်ႈ ဢၼ်ၸၢင်ႈၸိူမ်ႈႁၢႆၵႂႃႇလႆႈၼႂ်းၼမ်ႉ လူၺ်ႈၶၢၼ်ၶၢၼ်ဝႆးဝႆး ဝႃႈၼႆ။

ၵၢၼ်ၶူၼ်ႉၶႂႃႉ ၶူင်သၢင်ႈပွၵ်ႈၼႆႉ မုင်ႈမွင်းဝႃႈ – တေႁႄႉၵင်ႈပၼ် ယႃႇႁႂ်ႈၼမ်ႉပၢင်ႇလၢႆႇ ဝုၺ်ႇႁင်ႈ၊ ၼင်ႇႁိုဝ် ၸေႈပလၢတ်ႉသတိတ်ႉ (Plastic) တေဢမ်ႇပဵၼ်ၽေးတေႃႇတူဝ်သတ်း ၸိူဝ်းယူႇသဝ်း ၼႂ်းၼမ်ႉလႄႈ ၼႂ်းထိူၼ်ႇ။

ၽူႈလူင်ႉလႅၼ်ႇၾၢႆႇပၢႆးသၢႆႊၶဝ် ဢွၼ်ၵၼ်ၶူၼ်ႉၶႂႃႉ တႃႇတေႁဵတ်းဢွၵ်ႇ ၸေႈပလၢတ်ႉသတိတ်ႉ ဢၼ်တေၸၢင်ႈၸိူမ်ႈႁၢႆၵႂႃႇလႆႈ လူၺ်ႈသၽႃႇဝၼၼ်ႉမႃးႁိုင်ယဝ်ႉ။

ၵူၺ်းၵႃႈ ၸေႈပလၢတ်ႉသတိတ်ႉ ဢၼ် RIKEN Centre for Emergent Matter Science လႄႈ ၽူႈလူင်ႉလႅၼ်ႇ တီႈၸၼ်ႉၸွမ်တူဝ်ႇၵျူဝ်ႇ မိူင်းၵျပၼ်ႊၶဝ် ႁဵတ်းဢွၵ်ႇမႃးၵမ်းၼႆႉ ႁၢႆၵႂႃႇလႆႈဝႆး လူၺ်ႈဢမ်ႇၵိုတ်းလိူဝ်သင် ၼႆယဝ်ႉ။

လွင်ႈၼႆႉ ၽူႈလူင်ႉလႅၼ်ႇၶဝ် လႆႈႁဵတ်းၼႄၵႂႃႇ တီႈႁွင်ႈၽႃႇတတ်း ဢၼ်ၼိုင်ႈ ၼႂ်းဝဵင်းဝႃႇၵူဝ်ႇ ႁိမ်းဝဵင်းတူဝ်ႇၵျူဝ်ႇၼၼ်ႉ လႆႈဢဝ်ၸေႈပလၢတ်ႉသတိတ်ႉ ပွႆႇသႂ်ႇၼႂ်းတဝ်ႈ ဢၼ်သႂ်ႇဝႆႉၼမ်ႉပၢင်ႇလၢႆႇ၊ ႁိုင်ၶၢဝ်းတၢင်း 1 ၸူဝ်ႈမူင်းၵူၺ်း ၸေႈပလၢတ်ႉသတိတ်ႉ ၸိူမ်ႈႁၢႆၵႂႃႇပႅတ်ႈ ဝႃႈၼႆ။

ၸေႈပလၢတ်ႉသတိတ်ႉ သႅၼ်းၼႆႉ ယိူင်းဢၢၼ်းတေႁဵတ်းဢွၵ်ႇၶၢႆ ၼႆသေတႃႉ ပႆႇလႆႈပိုၼ်ၽၢဝ်ႇဝႆႉပႃး လၢႆးႁူဝ်ယွႆႈယႅမ်း။ ၸဝ်ႈၵၢၼ်ပၢႆးမၢၵ်ႈမီးၶဝ်ၵေႃႈ ဢွၼ်ၵၼ်သူၼ်ၸႂ်ဝႆႉယူႇၼႆ – ၸုမ်းၶူၼ်ႉၶႂႃႉၶဝ် ပိုၼ်ၽၢဝ်ႇဝႆႉ ၼင်ႇၼႆ။

ဢၢင်ႈဢိင် – DVB