မုၵ်ႉၸုမ်းသင်ၶ ၼႃယၵ တိူင်းလႄႈ ၸႄႈမိူင်း ဢွၵ်ႇလိၵ်ႈပၼ်ၾၢင်ႉမႃးဝႃႈ တီႈဝတ်ႉတီႈၵျွင်း ယႃႇပေႁပ်ႉဝႆႉ ရူတ်ႉၵႃး ၸိူဝ်းဢမ်ႇမီးဝႂ်လၢႆႊသိၼ်ႊ၊ ႁႄႉႁၢမ်ႈပႃး လွင်ႈဢဝ်မိၵ်ႈမၢႆ သႃသၼႃ ႁေႃႈၶပ်းရူတ်ႉၵႃး ဢမ်ႇမီးဝႂ်လၢႆႊသိၼ်ႊ ဝႃႈၼႆ။

ၸွမ်းၼင်ႇၶေႃႈၸီႉသင်ႇ ၸွမ်ၸိၵ်းသိုၵ်း မိၼ်းဢွင်ႇလၢႆႇသေ တႄႇဝၼ်းတီႈ 01/06/2025 ၼႆႉၵႂႃႇ ပလိၵ်ႈသိုၵ်းမၢၼ်ႈ ၵူတ်ႇထတ်းတီႉၺွပ်း ရူတ်ႉၵႃးဢမ်ႇမီးဝႂ်လၢႆႊသိၼ်ႊ၊ ၵူၼ်းမိူင်းပိုၼ်ႉတီႈ ၸိူဝ်းပဵၼ်ၸဝ်ႈၶွင် ရူတ်ႉၵႃးဢမ်ႇမီးဝႂ်လၢႆႊသိၼ်ႊမၢင်တီႈ ဢဝ်ရူတ်ႉၵႃး ဝႆႉၼႂ်းဝၢင်းဝတ်ႉဝၢင်းၵျွင်း၊ ယွၼ်ႉၼၼ်ႉ ပလိၵ်ႈသိုၵ်းမၢၼ်ႈ တၢင်ႇလဝ်ႈဝႆႉ တီႈမုၵ်ႉၸုမ်းသင်ၶ ၼႃယၵ ၼႂ်းၸႄႈဝဵင်း ၸႄႈတွၼ်ႈတိူင်းလႄႈ ၸႄႈမိူင်း ယႃႇပေႁပ်ႉဝႆႉရူတ်ႉၵႃး ၸိူဝ်းဢမ်ႇမီးဝႂ်လၢႆႊသိၼ်ႊ။ လိူဝ်ၼၼ်ႉ ႁႂ်ႈႁႄႉႁၢမ်ႈပႃး လွင်ႈဢဝ်မိၵ်ႈမၢႆ သႃသၼႃ RLG သေ ႁေႃႈ ၶပ်းရူတ်ႉၵႃး ဝႃႈၼႆ။

တႄႇႁၢင်လိူၼ်မေႊ ပူၼ်ႉမႃး ၼႂ်းၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်းၼႆႉ ပလိၵ်ႈသိုၵ်းမၢၼ်ႈ ၵူတ်ႇထတ်းတီႉၺွပ်း ရူတ်ႉၵႃး ဢမ်ႇမီးဝႂ်လၢႆႊသိၼ်ႊ။ ၼႂ်းဝတ်ႉၼႂ်းဝႃးၵေႃႈ ဢမ်ႇလိူၵ်ႈ ပလိၵ်ႈသိုၵ်းမၢၼ်ႈ ၶဝ်ႈၵူတ်ႇထတ်းတီႉၺွပ်း၊ ယၢမ်းလဵဝ် တီႈၸိုင်ႈတႆးပွတ်းဢွၵ်ႇလႄႈ ၼႂ်းၸိုင်ႈတႆးပွတ်းႁွင်ႇ တီႈဝဵင်းလႃႈသဵဝ်ႈၼႆႉ ပလိၵ်ႈသိုၵ်းမၢၼ်ႈ တိူဝ်းၵူတ်ႇထတ်းမႃးႁၢဝ်ႈႁႅင်း။ လွင်ႈၼႆႉ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇ တႃႇၵႂႃႇမႃးၵႃႉၶၢႆ ႁပ်ႉသူင်ႇလုၵ်ႈလၢင်းလႄႈ ယၢပ်ႇၽိုတ်ႇပႃး တႃႇႁႃၵိၼ်လဵင်ႉတွင်ႉ – သိုဝ်ႇၶၢဝ်ႇ Khit Thit Media ဢွၵ်ႇဝႆႉၼင်ႇၼႆ။