တႄႇႁူဝ်လိူၼ်ၵျုၼ်ႊၼႆႉမႃး သိုၵ်းတဢၢင်း TNLA သႂ်ႇဢူတ်ႇဢူဝ် တၢပ်ႈၶိူင်ႈသဵင် သွင်းပွၵ်ႉၼိူဝ်ၵႃးသေ ပၼ်ႇပၢဝ်ႇသေႃႇ ၼႂ်းပွၵ်ႉၼႂ်းယွမ်ႇ ၸွမ်းၼႂ်းၼႃႈတီႈၶဝ်ၵုမ်းၵမ် ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

လွင်ႈသိုၵ်းၸၢဝ်းၶိူဝ်း ၸိူဝ်းၵုမ်းၵမ်လႆႈဝဵင်း ၸုမ်းၼိုင်ႈယဝ်ႉၸုမ်းၼိုင်ႈ ပိုၼ်ၽၢဝ်ႇ တဵၵ်းႁႂ်ႈၵူၼ်းမိူင်း ၵႂႃႇႁဵတ်းဝႂ်မုင်ႉႁေႃႁိူၼ်း၊ ႁဵတ်းဝႂ်ၵပ်းတူဝ်မၢႆၾၢင် ၸိူဝ်းၼႆႉ ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈ ႁူပ်ႉတၢင်းယၢပ်ႇၽိုတ်ႇတႄႉတႄႉၼႆ ၵူၼ်းမိူင်းၼႂ်းၸႄႈဝဵင်းၼမ်ႉတူႈၵေႃႉၼိုင်ႈ လၢတ်ႈၼႄတီႈ ၽူႈတွႆႇႁွၵ်ႈၼင်ႇ ၼႆ။

“ၶၢဝ်းၼႆႉ ပဵၼ်ၶၢဝ်းၶဝ်ႈႁႆႈၶဝ်ႈသူၼ်ယဝ်ႉလႄႈ ယၢပ်ႇၽိုတ်ႇလွင်ႈငိုၼ်းတွင်းၵေႃႈပိူင်ၼိုင်ႈ။ ပေႃးတေဢမ်ႇႁဵတ်းသမ်ႉၵူဝ်ၶဝ်ႁၼ်ထိုင်ဝႃႈသၢၼ်ၶတ်းၶဝ်။ မိူၼ်ၼင်ႇ ပေႃးႁဝ်းတေဢွၵ်ႇတႃႈဢွၵ်ႇတၢင်းၵႂႃႇ တၢင်ႇဝၢၼ်ႈတၢင်ႇဝဵင်းၼႆၵေႃႈ ပေႃးဢမ်ႇပႃးဝႂ်ၵပ်းတူဝ် ဢၼ်ၶဝ်ၸႂ်ႉႁဵတ်းၼၼ်ႉၶဝ်ၵေႃႈ တေထတ်း ႁဝ်းတႄႉတႄႉ။ ဝႂ်ဢၼ်ၶဝ်ႁဵတ်းပၼ်ၼၼ်ႉ ပေႃးပႃးၵႂႃႇထိုင်ၼႂ်းၼႃႈတီႈသိုၵ်းမၢၼ်ႈသမ်ႉ ၵူဝ်ပိူၼ်ႈ ထတ်းႁၼ်ႁႄ ႁဵတ်းတီႈႁဝ်းၶိုၼ်းၼႆ သမ်ႉလႆႈၵူဝ်ၸိူင်ႉၼႆ။ မိူဝ်ႈလဵဝ်ၼႆႉ ၼႂ်းဝဵင်းၵူၺ်းဢမ်ႇၵႃး ၼႂ်း ပွၵ်ႉၼႂ်းဢိူင်ႇၵေႃႈ ၶဝ်ပၢဝ်ႇသေႃႇ တဵၵ်းႁႂ်ႈၵႂႃႇႁဵတ်း။ မၢင်ၸိူဝ်းၵူၼ်းၼႂ်းမုင်ႉႁေႃႁိူၼ်းသမ်ႉၼမ် ပေႃးၵႂႃႇႁဵတ်းၼႆ တေလႆႈသဵင်ႈပဵၼ်ၼပ်ႉႁူဝ်သႅၼ်မၼ်းယဝ်ႉ”။

လႆႈႁူႉဝႃႈ ၼႂ်းၸႄႈဝဵင်းၼမ်ႉတူႈၼႆႉ သိုၵ်းတဢၢင်းၵဵပ်းၵႃႈႁဵတ်းသဵၼ်ႈမၢႆမုင်ႉႁေႃႁိူၼ်း ၼိုင်ႈၽိုၼ်ၼႆႉ  1 မိုၼ်ႇပျႃး၊ မၢႆၾၢင် ၼိုင်ႈၶႅပ်း 1 မိုၼ်ႇပျႃး၊ သမၢတ်ႉၵၢတ်ႉ ၼိုင်ႈၶႅပ်းလႂ် 5,000 ပျႃး ဝႃႈၼႆ။

ဝၢႆးလင် ၽႅၼ်ယၼ်ႇသိုၵ်း 1027 မႃး ၾၢႆႇတပ်ႉသိုၵ်းတဢၢင်း TNLA ၶိုင်ပွင်ႁၢင်ႈႁႅၼ်း ၽိုၼ်လိၵ်ႈၽိုၼ်လၢႆး ၶေႃႈမုလ်း ၸိူဝ်းလူဝ်ႇၸႂ်ႉတိုဝ်းၼႂ်းၵၢၼ်ဢုပ်ႉပိူင် ၸွမ်းပိုၼ်ႉတီႈၼၼ်ႉသေ တဵၵ်းၶၢၼ်း မိပ်ႇငႅၼ်း ႁႂ်ႈၵူၼ်းမိူင်း ၸိူဝ်းယူႇၼႂ်းၸႄႈဝဵင်းၶဝ်ၵုမ်းၵမ်ၼၼ်ႉ ၵႂႃႇႁဵတ်းဝႂ်ၶပ်းရူတ်ႉၵႃးသေ ၵဵပ်းဢဝ်ၶွၼ်ႇၵႃႈႁဵတ်းပၼ်ၸိူဝ်းၼႆႉၵေႃႈမီး။

ၵဵဝ်ႇလူၺ်ႈလွင်ႈၸိူဝ်းၼႆႉသေ မိူဝ်ႈဝႃး ဝၼ်းတီႈ 05 ယူႇတီႈ လူၺ်းယေႇဢူး ၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA လၢတ်ႈၵႂႃႇ ၼႂ်းပၢင်သပ်းၸႅင်ႈၶၢဝ်ႇၼၼ်ႉဝႃႈ –“မိူဝ်ႈလဵဝ် ၾၢႆႇႁဝ်း တႄႇၵဵပ်းသဵၼ်ႈမၢႆမုင်ႉႁေႃ ႁိူၼ်း ၵူၼ်းၸိူဝ်းယူႇၼႂ်းၼႃႈတီႈႁဝ်း။ ယၢမ်းလဵဝ် ၼႂ်းၼႃႈတီႈႁဝ်း ဢၼ်လူဝ်ႇၼႅတ်ႈႁဵတ်းလိူဝ်ပိူၼ်ႈသုတ်းၼႆႉ ပဵၼ်ႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇၼၼ်ႉယဝ်ႉ။ မိူဝ်ႈလဵဝ် ၾၢႆႇႁဝ်းတႄႇႁဵတ်းပၼ် မၢႆၾၢင်လႄႈ ဝႂ်မုင်ႉႁေႃႁိူၼ်း တႃႇၵူၼ်းၼႂ်းပိုၼ်ႉတီႈႁဝ်းယူႇ”- ၼႆယဝ်ႉ။

တႄႇဝၼ်းတီႈ 01/05/2025 ၼႆႉမႃး ၾၢႆႇသိုၵ်းတဢၢင်း ၸတ်းပၢင်သွၼ် ၾၢႆႇႁွင်ႈၵၢၼ်ၵူတ်ႇထတ်းၵူၼ်း ၶဝ်ႈဢွၵ်ႇဝဵင်း ၸုပ်ႈ (1) ႁိုင် 15 ဝၼ်းသေ မီးၵူၼ်းသိုၵ်းတဢၢင်း ၵႂႃႇၶဝ်ႈႁဵၼ်းသွၼ်ဢဝ် တႃႇ 51 ၵေႃႉ။

ယၢမ်းလဵဝ် ၾၢႆႇသိုၵ်းတဢၢင်း TNLA ၵုမ်းၵမ်ဝႆႉ ၸႄႈဝဵင်းၼႂ်းမိူင်းတႆးပွတ်းႁွင်ႇ တႃႇ 12 ဝဵင်း။ တႄႇလိူၼ် ဢေႊပရိူဝ်ႊမႃး ႁူပ်ႉထူပ်းၵၼ်တင်း သိုၵ်းမၢၼ်ႈသေ ဢုပ်ႇဢူဝ်းၵၼ်တီႈ ၼႂ်းမိူင်းၶႄႇ ငူပ်ႉငီႉၵၼ်တႃႇ ၵိုတ်းပၢင်တိုၵ်းလႆႈ ၼႂ်းမိူင်းတႆးပွတ်းႁွင်ႇ။ ၼႂ်းပၢင်ဢုပ်ႇဢူဝ်းငူပ်ႉငီႉၼၼ်ႉ ၺႃးသိုၵ်းမၢၼ်ႈ မွၵ်ႇလၢတ်ႈႁႂ်ႈ ထွႆဢွၵ်ႇၵႂႃႇပၼ် ၼႂ်းၸႄႈဝဵင်းၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ မိူင်းၵုတ်ႈလႄႈ မိူင်းမိတ်ႈ ၸဵမ်ၸိူဝ်းၼႆႉသေ ဢမ်ႇလႆႈၶေႃႈတူၵ်းလူင်းသင်ၵၼ်မႃး။

ယွၼ်ႉၼၼ် ပေႃးထိုင်မႃး လိူၼ်ဢေႃႊၵတ်ႊသ်ၼႆႉ ၾၢႆႇသိုၵ်းမၢၼ်ႈတင်း သိုၵ်းတဢၢင်း မီးၽႅၼ်ၵၢၼ် တေႁူပ်ႉဢုပ်ႇဢူဝ်းငူပ်ႉငီႉၵၼ်ထႅင်ႈ တီႈၼႂ်းမိူင်းၶႄႇ ၼႆယဝ်ႉ။

တႅမ်ႈ – ၽူၺ်းၼုမ်ႇ